Sunday, August 11, 2013

ಕುಮಾರವ್ಯಾಸನ ಐತಿಹಾಸಿಕ ಕತೆ


ಕವಿಯ ನಿಜವಾದ ಹೆಸರು ನಾರಣಪ್ಪ. ಕಾವ್ಯ ನಾಮ ಕುಮಾರವ್ಯಾಸ (ತಾನು ವ್ಯಾಸನ ಮಗ), ಗದುಗಿನ ಕೋಳೀವಾಡದವರು.ಕಾಲ ೧೪೩೦. ಗದುಗಿನ ಭಾರತ/ಕುಮಾರವ್ಯಾಸ ಭಾರತವನ್ನ ಬರೆದ್ದದ್ದಕ್ಕೂ ಒಂದು ಐತಿಹಾಸಿಕ ಕತೆಯಿದೆ.  
ಒಮ್ಮೆ ಕುಮಾರವ್ಯಾಸನ ಕನಸಿನಲ್ಲಿ ವೀರನಾರಾಯಣನು ಬಂದು "ನೀನು ಭಾರತವನ್ನ ಕನ್ನಡದಲ್ಲಿ ಬರೆಯೆಂದಪ್ಪಣೆ ಕೊಟ್ಟನಂತೆ", ಆದ್ರೆ ನಾನು ವಿದ್ವಾಂಸನಲ್ಲ ನನಗೆ ಭಾರತದ ಕತೆ ಗೊತ್ತಿಲ್ಲವೆಂದದ್ದಕ್ಕೆ... ಗೊತ್ತಿಲ್ಲದಿದ್ದರೇನಂತೆ  ಭಾರತವನ್ನ ಕಣ್ಣಾರೆ ಕಂಡವರಿಂದ ಕೇಳಿ ಬರೆ ಎಂದರಂತೆ. ವೇದವ್ಯಾಸ, ಕೃಪ, ಅಶ್ವತ್ಥಾಮರು ಚಿರಂಜೀವಿಗಳು. ಆದ್ರೆ ಅವರನ್ನ ಕಾಣುವುದು ಹೇಗೆ? ಅಂತ ಕೇಳಿದ್ದಕ್ಕೆ. ನೀನು ಲಕ್ಷ ಬ್ರಾಹ್ಮಣ ಸಂತರ್ಪಣೆಗೆ   ಹೋಗು ಅಲ್ಲಿಗೆ ಅಶ್ವತ್ಥಾಮ ಬರುತ್ತಾನೆಂದರಂತೆ.
  
ಕುಮಾರವ್ಯಾಸ ಲಕ್ಷ  ಬ್ರಾಹ್ಮಣ ಸಂತರ್ಪಣೆಗೆ ಹೋದಾಗ ಊಟದ ಸಾಲಿನಲ್ಲಿ ಕುಳಿತ ಅವನ ಎದುರಿಗೆ ಮಹಾಬಲಶಾಲಿಯಾದ ವೃದ್ಧರೊಬ್ಬರು ಕುಳಿತಿದ್ದರಂತೆ. ಸಾಲಿನಲ್ಲಿ ಊಟದೆಲೆಯನ್ನ ಹಾಕುತ್ತಾ ಹೋದಾಗ ಪಕ್ಕದಲ್ಲಿದ್ದ ಸಣ್ಣಹುಡುಗನಿಗೆ ಸಣ್ಣ ಎಲೆಯನ್ನ ಹಾಕಿದ್ರಂತೆ, ಅವನು ನನಗೆ ದೊಡ್ಡ ಎಲೆ ಬೇಕೆಂದು ಹಠ ಮಾಡ್ದಾಗ "ಏಕೆ ದುರ್ಯೋಧನನ ಹಾಗೆ ಹಠಮಾಡುತ್ತಿರುವೆ" ಅಂತ ಬೈದಾಗ ಅದನ್ನ ಕೇಳಿದ ಕ್ಷಣವೇ ಆ ವೃದ್ಧ ಕಣ್ನೀರಿಟ್ಟು ಎದ್ದು ಹೋದರಂತೆ.

ಈತನೇ ಅಶ್ವತ್ಥಾಮನಿರಬೇಕೆಂದು ಹಿಂಬಾಲಿಸಿದಾಗ ಆತ ನನ್ನಿಂದೆ ಬರಬೇಡೆಂದು ಬೈದು ಹೇಳಿದರೂ ಬಿಡದಿದ್ದಕ್ಕೆ ಏತಕ್ಕೆ ನನ್ನಿಂದೆ ಬರುತ್ತಿರುವೆ ನಿನ್ನುದ್ದೇಶವೇಂದು ಕೇಳಿದಾಗ ಕುಮಾರವ್ಯಾಸ ತನ್ನ ಕನಸಿನ ಬಗ್ಗೆ ಹೇಳಿದನಂತೆ. ಆಗ ಅಶ್ವತ್ಥಾಮನು "ನೀನು ಗದುಗಿನ ವೀರನಾರಾಯಣನ ಗುಡಿಯ ಮುಂದೆ ಪುಷ್ಕರಣಿಯಲ್ಲಿ ಮುಳುಗಿ ದೇವಾಲಯದಲ್ಲಿ ಕುಳಿತುಕೋ ನಿನ್ನ ನೆಂದ ಬಟ್ಟೆ ಆರುವವರೆಗೆ ನಿನಗೆ ಕಾವ್ಯ ತಂತಾನೆ ಬರುತ್ತದೆ. ಆದ್ರೆ ಈ ವಿಷಯವನ್ನ ಯಾರಿಗಾದರೂ ಹೇಳಿದರೆ ನಿನ್ನ ತಲೆ ಒಡೆದು ಹೋಗುತ್ತೆ" ಅಂತೇಳಿ ಮಾಯವಾದರಂತೆ. ಕುಮಾರವ್ಯಾಸ ಹತ್ತು ಪರ್ವ ಬರೆದು ಸಂತೋಷದಿಂದ ಅದರ ಹಿಂದಿನ ರಹಸ್ಯವನ್ನ ಹೇಳಿದಾಗ ಆತನ ಮರಣವಾಯ್ತೆಂದು  ಹೇಳ್ತಾರೆ.

ಈ ಕತೆ ಕೇಳಿದ ಮೇಲೆ ಗದುಗಿನ ವೀರನಾರಾಯಣನ ಗುಡಿ,ಪುಷ್ಕರಣಿ, ಆತ ಕುಳಿತು ಕಾವ್ಯಬರೆದ ಸ್ಥಳವನ್ನೊಮ್ಮೆ ನೋಡಿಬರಬೇಕೆಂಬ ಕುತೂಹಲವಿದೆ. ನೀವ್ಯಾರಾದ್ರೂ ಹೋಗಿದ್ರೆ ನಿಮ್ಮನುಭವಗಳನ್ನ ತಿಳಿಸಿ.

1 comment:

Swarna said...

ನಿಮ್ಮ ಫೇಸ್ಬುಕ್ ಪುಟ ನೋಡಿದೆ.
ಪ್ರತಿ ಪದ್ಯದ ಬಗ್ಗೆ ನಿಮ್ಮ ಅಭಿಪ್ರಾಯವನ್ನು ಹಂಚಿಕೊಂಡರೆ ಚೆನ್ನಾಗಿರತ್ತೆ.