ಕದವ ತೆರೆ ಬೆಳಕು ಬರಲಿ ಓ ಚಿತ್ತಾ...

ಬದನೇಕಾಯಿ ಬಜ್ಜಿ...Brinjal Bajji

2011-08-14T09:24:00.000-07:00

ನಮ್ಮನೇಲಿ ಈ ಬದನೇಕಾಯಿ ಬಜ್ಜಿಯ ಪಾತ್ರ ಸೇವಿಯರ್ ತರಹದ್ದು!! ರಾತ್ರಿ ಊಟಕ್ಕೆ ಸಾರು ಸ್ವಲ್ಪ ಇದೆ, ಮತ್ತೆ ಸಾರು ಮಾಡ್ಬೇಕಾ??! ಅನ್ನುವ ಗಳಿಗೆ ಬಂದಾಗ ನೆರವಿಗೆ ಬರೋದು ಈ ಬದನೇಕಾಯಿ ಬಜ್ಜಿ, ಅತಿ ಬೇಗ ಮಾಡಬಹುದು ಮತ್ತು ರುಚಿ ರುಚಿ ಕೂಡಾ :)

ಬೇಕಾಗುವ ಪದಾರ್ಥಗಳು:
4-5 ಸಣ್ಣಗೆ ಹೆಚ್ಚಿದ ನೇರಳೇ ಬಣ್ಣದ ಬದನೇಕಾಯಿಗಳು
3 ಟೊಮ್ಯಾಟೋಗಳು
3 ಹಸಿ ಮೆಣಸಿನಕಾಯಿಗಳು
ಬೆಳ್ಳುಳ್ಳಿ - 5 ಎಸಳುಗಳು
ಕೊತ್ತಂಬರಿ ಸೊಪ್ಪು ಸ್ವಲ್ಪ
ಉಪ್ಪು - ರುಚಿಗೆ ತಕ್ಕಷ್ಟು
ಎಣ್ಣೆ - 3 ಚಮಚ
ನೀರು- ಬೇಕಾದರೆ ಮಾತ್ರ

ಮಾಡುವ ವಿಧಾನ:
1. ಬದನೇಕಾಯಿಗಳನ್ನ ಸಣ್ಣಗೆ ಹೆಚ್ಚಿಕೊಂಡು ದಪ್ಪ ತಳದ ಬಾಣಲೆಗೆ 2 ಚಮಚ ಎಣ್ಣೆ ಹಾಕಿ ಮಧ್ಯಮ ಉರಿಯಲ್ಲಿ ಬದನೇಕಾಯಿ ಬೇಯುವವರೆಗೆ (ಹತ್ತು ನಿಮಿಷದವರೆಗೆ) ಉರಿದುಕೊಳ್ಳಿ.
2. ನಂತರ ಬದನೇಕಾಯಿಯನ್ನ ತೆಗೆದು ಅದೇ ಬಾಣಲೆಯಲ್ಲಿ 1 ಚಮಚ ಎಣ್ಣೆ ಹಾಕಿ ಟೊಮ್ಯಾಟೋಗಳನ್ನ ಮತ್ತು ಹಸಿಮೆಣಸಿನಕಾಯಿಯನ್ನ ಉರಿದುಕೊಳ್ಳಿ.
3. ನಂತರ ಉರಿದ ಬದನೇಕಾಯಿ, ಟೊಮ್ಯಾಟೊ, ಮೆಣಸಿನಕಾಯಿ,ಹಸಿ ಬೆಳ್ಳುಳ್ಳಿ, ಕೊತ್ತಂಬರಿಸೊಪ್ಪು, ಉಪ್ಪನ್ನ ಹಾಕಿ ಒಳಕಲ್ಲಿನಲ್ಲಿ ಅಥವಾ ಮಿಕ್ಸರಿನಲ್ಲಿ ಒಂದೆರಡು ಸುತ್ತು ರುಬ್ಬಿದರೆ ಬದನೇಕಾಯಿ ಬಜ್ಜಿ ರೆಡಿ.

ಚಿತ್ರದುರ್ಗ, ಚಳ್ಳಕೆರೆ, ಬಳ್ಳಾರಿ ಕಡೆಯ ಮನೆಗಳಲ್ಲಿ ಈ ಬದನೇಕಾಯಿ ಬಜ್ಜಿ ಬಲು ಫೇಮಸ್!! ನಮ್ಮ ಪಕ್ಕದ ಮನೆಯಕ್ಕ ಮಾಡುತ್ತಿದ್ದ ರೀತಿ ಇನ್ನೂ ನೆನಪಿದೆ, ಮಣ್ಣಿನ ಒಲೆಯಲ್ಲಿ ಅಡುಗೆಯೆಲ್ಲಾ ಆದಮೇಲೆ ಉಳಿದ ಕೆಂಡದ ಮೇಲೆ ಈ ಬದನೇಕಾಯಿ,ಟೊಮ್ಯಾಟೊ, ಮೆಣಸಿನಕಾಯಿಯನ್ನ ಹಾಕಿ ನಿಧಾನ ಗತಿಯಲ್ಲಿ ಸುಟ್ಟು ತಣ್ಣಗಾದ ಮೇಲೆ ಉಳಿದ ಪದಾರ್ಥಗಳನ್ನ ಹಾಕಿಕೊಂಡು ಮಸೇಗುಂಡು/ಮಸೇಕಲ್ಲಿನಲ್ಲಿ ಮಸೆಯುತ್ತಿದ್ರು. ಮುದ್ದೆ,ಅನ್ನ,ರೊಟ್ಟಿ,ಚಪಾತಿಯೊಟ್ಟಿಗೆ ಒಳ್ಳೇ ಕಾಂಬಿನೇಷನ್.

ಚಿತ್ರಕೃಪೆ: ಸ್ವಂತದ್ದು
ಬಳಕೆ: 4-5 ಗಂಟೆಗಳು

ಬೀಟ್ರೂಟ್ ಚಟ್ನಿ..Beetroot Chutney!

2011-06-04T12:33:00.000-07:00

ಬೇಕಾಗುವ ಪದಾರ್ಥಗಳು:
ಒಂದು ಹಸಿ ಬೀಟ್ರೂಟ್ - ಸಣ್ಣಗೆ ಹೆಚ್ಚಿದ್ದು
ಕಡ್ಲೆ ಬೇಳೆ - 2 ಚಮಚ
ಉದ್ದಿನ ಬೇಳೆ - 2 ಚಮಚ
ಜೀರಿಗೆ - 1 ಚಮಚ
ತೆಂಗಿನ ತುರಿ - 6 ಚಮಚ
ಒಣ ಮೆಣಸಿನ ಕಾಯಿ - 6-7
ಕರಿಬೇವಿನ ಸೊಪ್ಪು -4 ಎಸಳು
ಹುಣಸೆ ಹಣ್ಣು ಮತ್ತು ಉಪ್ಪು -ರುಚಿಗೆ ತಕ್ಕಷ್ಟು
ಎಣ್ಣೆ - 3 ಚಮಚ
ಸಾಸಿವೆ - 1/4 ಚಮಚ
ಇಂಗು - ಚಿಟಕಿಯಷ್ಟು

ಮಾಡುವ ವಿಧಾನ:
1. ಬಾಣಲೆಯಲ್ಲಿ ಒಂದು ಚಮಚ ಎಣ್ಣೆಯನ್ನ ಹಾಕಿ, ಕಾದ ಮೇಲೆ ಕಡ್ಲೆ ಬೇಳೆ,ಉದ್ದಿನ ಬೇಳೆ, ಜೀರಿಗೆ, ಒಣ ಮೆಣಸಿನಕಾಯಿ, ಕರಿಬೇವಿನ ಸೊಪ್ಪು ಮತ್ತು ಸಣ್ಣಗೆ ಹೆಚ್ಚಿದ ಬೀಟ್ರೂಟನ್ನು ಹಾಕಿ ಸ್ವಲ್ಪ ಹೊತ್ತು ಬಾಡಿಸಿರಿ.
2. ಈ ಮಿಶ್ರಣಕ್ಕೆ ತೆಂಗಿನ ಕಾಯಿ ತುರಿ, ಹುಣಸೆ ಹಣ್ಣು, ಉಪ್ಪು ಸೇರಿಸಿ ಮಿಕ್ಸರಿನಲ್ಲಿ ನಯಸ್ಸಾಗುವವರೆಗೂ ರುಬ್ಬಿಕೊಳ್ಳಿ. ಬೇಕಾದರೆ ರುಬ್ಬುವಾಗ ಸ್ವಲ್ಪ ನೀರನ್ನು ಹಾಕಿಕೊಳ್ಳಿ.

3. ಬಾಣಲೆಗೆ ಎರಡು ಚಮಚ ಎಣ್ಣೆ ಹಾಕಿ, ಕಾದ ನಂತರ ಸಾಸಿವೆ, ಇಂಗು, ಕರಿಬೇವಿನ ಎಸಳುಗಳನ್ನ ಹಾಕಿ ನಂತರ ರುಬ್ಬಿಕೊಂಡ ಮಿಶ್ರಣವನ್ನ ಸುರಿದು ಐದು ನಿಮಿಷ ಕದಡುತ್ತಾ ಕುದಿಸಿದರೆ ಬೀಟ್ರೂಟ್ ಚಟ್ನಿ ರೆಡಿ.
ಚಪಾತಿ,ರೊಟ್ಟಿ, ದೋಸೆ, ಅನ್ನದೊಟ್ಟಿಗೆ ಈ ಚಟ್ನಿ ಸವಿಯಲು ಚೆಂದ.
ನೀವೂ ಕೂಡ ಇದನ್ನ ಮಾಡಿ ಸವಿದು ನೋಡಿ :)

ಚಿತ್ರಕೃಪೆ: ಸ್ವಂತದ್ದು
ಬಳಕೆ: ಫ್ರಿಜ್ಜಿನಲ್ಲಿಟ್ಟರೆ ಒಂದೆರಡು ದಿನ

Beetroot Chutney

Ingredients:

One Beetroot -cut in to small pieces

Masoor Dal - 2 Spoons

Urad Dal- 2 Spoons

Cumin Seeds - 1 Spoon

Grated Coconut - 6 Spoons

Curry Leaves - 10 leaves

Dry Chillies - 6-7

Tamarind & Salt - for taste

Oil - 3 Spoons,

Mustard & Asafoetida - pinch

Method:

1. Heat one spoon of oil in a pan, add Masoor dal, Urad Dal, Cumin Seeds, dry red chillies, curry leaves. After few seconds add the cut beetroot pieces. Saute them for 5 minutes.

2. Grind these ingredients along with tamarind, salt, coconut. can add little water if required.

3. Heat 2 spoons of oil in a pan, add mustard seeds, upon crackling add a pinch of asafoetida, few curry leaves, add the ground mixture. Boil it for 5 minutes in medium flame.

It is ready to be served with Rice, Roti & Dosa. :)

Best to Use: on the same day

In Refrigerator:1-2 days

ಬೀಟ್ರೂಟ್ ಲಡ್ಡು!!! Beetroot Laddu!!!

2011-05-07T07:01:00.000-07:00

ಕೆಂಪಗಿದೆಯೆಂದೋ, ಸಿಹಿಯಾದಿದೆಯೆಂದೋ, ತಿನ್ನಲು ಇಷ್ಟವಿಲ್ಲವೆಂದೋ.....ಹತ್ತಾರು ನೆಪವೊಡ್ಡಿ ನಾವು ದಿನೇ ತಿನ್ನುವ ತರಕಾರಿಗಳಲ್ಲಿ ಅತಿಯಾಗಿ ಕಡೆಗಣಿಸುತ್ತಿರುವುದೆಂದ್ರೆ ಬೀಟ್ರೂಟು. Beta vulgaris ಎಂಬ ಸಸ್ಯ ಶಾಸ್ತ್ರದ ಹೆಸರಿನಿಂದ ಕರೆಯಲ್ಪಡುವ ಈ ಬೀಟ್ರೂಟಿನ ಇತಿಹಾಸ ಎರಡನೇ ಶತಮಾನದಷ್ಟು ಹಳೆಯದಂತೆ. ಔಷಧೀಯ ಗುಣಗಳುಳ್ಳ ಈ ಬೀಟ್ರೂಟನ್ನ ಗ್ರೀಕ್ ಆರೋಗ್ಯ ದೇವತೆಯಾದ ಅಪೋಲೋವಿಗೆ ಅರ್ಪಿಸಿ ಅದರಷ್ಟೇ ತೂಕದ ಬೆಳ್ಳಿಯನ್ನ ಪಡೆಯುತ್ತಿದ್ದರಂತೆ!! ಅಷ್ಟು ಬೆಲೆಯುಳ್ಳದ್ದಾಗಿತ್ತು!!

ಪಾಲಕ್ ಸೊಪ್ಪಿನಂತೆಯೇ ಇರುವ ಬೀಟ್ರೂಟಿನ ಎಲೆಗಳನ್ನ ಮೊದಲಿಂದಲೂ ಆಹಾರವಾಗಿ ಬಳಸುತ್ತಿದ್ದರಂತೆ. ಆದರೆ ಬೀಟ್ರೂಟಿನ ಗಡ್ಡೆಯನ್ನ ಊಟಕ್ಕೆ ಬಳಸಬಹುದೆಂದು ಕಂಡುಕೊಂಡವರಲ್ಲಿ ಫ್ರೆಂಚರು ಮೊದಲಿಗರು. ಅಧಿಕ ರಕ್ತದೊತ್ತಡ, ಹೃದಯ, ಯಕೃತ್, ಅಜೀರ್ಣಕ್ಕೆ ಸಂಭಂದಿಸಿದ ಖಾಯಲೆಗಳಿಗೆ ಈ ಬೀಟ್ರೂಟ್ ಒಂಥರಾ ನೈಸರ್ಗಿಕ ಔಷಧಿಯೇ ಸರಿ. ಇದರ ಗಾಡವಾದ ಕೆಂಪು ಬಣ್ಣದಿಂದಾಗಿ ಬೀಟ್ರೂಟು ಪುಡಿಯನ್ನ ಫುಡ್ ಕಲರಿಂಗಾಗಿ ಜಾಮ್, ಜೆಲ್ಲಿ, ಜ್ಯೂಸು, ಐಸ್ಕ್ರೀಮ್,ಕೇಕುಗಳಲ್ಲಿ ಬಳಸುತ್ತಾರಂತೆ.

ಇನ್ಮೇಲಾದ್ರೂ ಒಂದೊಂದು ತರಕಾರಿಯ ಬಗ್ಗೆ ತಿಳಿದುಕೊಂಡು ಅಟ್ಲೀಸ್ಟ್ ಮೂರು ಆಹಾರ ಪದಾರ್ಥಗಳನ್ನ ಮಾಡಿ ಸವಿ ನೋಡುವ ಹೊಸ ಪ್ರಾಜೆಕ್ಟನ್ನ ನಾನು ಮತ್ತು ನನ್ನಮ್ಮ ಶುರು ಮಾಡಿದ್ದೇವೆ. ಹಸಿಯಾಗಿ, ತುರಿದು, ಬೇಯಿಸಿ, ಅರೆದು ಹೇಗೆಲ್ಲಾ ಸೇವಿಸಬಹುದಾದ ಈ ಬೀಟ್ರೂಟಿನಿಂದ ನಾವು ತಯಾರಿಸಿದ್ದು ಬೀಟ್ರೂಟ್ ಲಡ್ಡು, ಸೂಪ್ ಮತ್ತು ಚಟ್ನಿ.

ಬೀಟ್ರೂಟ್ ಲಡ್ಡು!!

ಬೇಕಾಗುವ ಪದಾರ್ಥಗಳು:

ತುರಿದ ಬೀಟ್ರೂಟ್ - 3 ಬಟ್ಟಲು
ತುರಿದ ಒಣ ಕೊಬ್ಬರಿ - 1 ಬಟ್ಟಲು
ಸಕ್ಕರೆ -1 ಬಟ್ಟಲು
ತುಪ್ಪ - 2 ಚಮಚ
ಏಲಕ್ಕಿ ಪುಡಿ -1/4 ಚಮಚ
ನಿಮಗೆ ಬೇಕಾದರೆ- ಬಾದಾಮಿ, ದ್ರಾಕ್ಷಿ, ಗೋಡಂಬಿ - ನಿಮ್ಮಿಷ್ಟದಷ್ಟು :)

ಮಾಡುವ ವಿಧಾನ:
1. ದಪ್ಪ ತಳದ ಬಾಣಲೆ/ಪಾತ್ರೆಗೆ 2 ಚಮಚ ತುಪ್ಪ ಹಾಕಿ, ಕಾದ ನಂತರ ತುರಿದ ಬೀಟ್ರೂಟನ್ನ ಹಾಕಿ ಹಸಿತನ ಹೋಗುವವರೆಗೂ ಒಂದೈದು ನಿಮಿಷ ಸಣ್ಣನೆಯ ಉರಿಯಲ್ಲಿ ಬಾಡಿಸಿ.
2. ಅದಕ್ಕೆ ಸಕ್ಕರೆ, ಏಲಕ್ಕಿ ಪುಡಿ,ತುರಿದ ಕೊಬ್ಬರಿಯನ್ನ ಹಾಕಿ.ಸಕ್ಕರೆ ಕರಗಿ ಮಿಶ್ರಣವು ಗಟ್ಟಿಯಾಗುವವರೆಗೂ ಚಮಚದಲ್ಲಿ ಕದಡುತ್ತಿರಿ, ತಳ ಹತ್ತಲು ಬಿಡಬೇಡಿ.
3. ಮಿಶ್ರಣವು ಉಂಡೆ ಕಟ್ಟುವ ಹದಕ್ಕೆ ಬಂದ ನಂತರ ಅದನ್ನ ಬೇರೊಂದು ತಟ್ಟೆಗೆ ಸುರಿದು, ತಣ್ಣಗಾಗುವ ಮೊದಲೇ ಚಮಚದಲ್ಲಿ ಸ್ವಲ್ಪ ತೆಗೆದುಕೊಂಡು ತುಪ್ಪ ಸವರಿಕೊಂಡ ಕೈಗಳದಿಂದ ಉಂಡೆ ಕಟ್ಟಿ. ಅದರ ಮೇಲೊಂದು ಗೋಡಂಬಿ, ಬಾದಾಮಿಯನ್ನ ಇಡಿ ಮತ್ತು ಮೇಲೆ ತುರಿದ ಕೊಬ್ಬರಿಯಿಂದ ಅಲಂಕರಿಸಿದರೆ ಬೀಟ್ರೂಟ್ ಲಡ್ಡು ಸವಿಯಲು ರೆಡಿ. :)

4. ನಿಮಗೆ ಉಂಡೆ ಬೇಡವೆಂದರೆ ತುಪ್ಪ ಸವರಿದ ತಟ್ಟೆಯ ಮೇಲೆ ಮಿಶ್ರಣವನ್ನ ಸಮತಟ್ಟಾಗಿ ಸುರಿದು ಚೌಕಾಕಾರ ಇಲ್ಲವೇ ನಿಮಗಿಷ್ಟವಾದ ಆಕಾರದಲ್ಲಿ ಕಟ್ ಮಾಡಿ, ಮೇಲೆ ಒಣ ದ್ರಾಕ್ಷಿ, ಗೋಡಂಬಿ,ಬಾದಾಮಿ, ತುರಿದ ಕೊಬ್ಬರಿಯನ್ನ ಹರಡಿ. ಇದು ತಣ್ಣಗಾದ ಮೇಲೆ ಮಿಠಾಯಿಯ ರೀತಿಯಲ್ಲಿ ಕೂಡಾ ತಿನ್ನಬಹುದು.

ಬಳಕೆ: 7-8 ದಿನಗಳು
ನೀವೂ ಕೂಡ ಇದನ್ನ ಮಾಡಿ ಸವಿದು ನೋಡಿ :)

ಚಿತ್ರಕೃಪೆ: ಸ್ವಂತದ್ದು
*********************************************************************************************

For all my friends who doesn't read kannada :)

Due to its color or sweetness, or some other reasons...In our daily life the most underrated & undertasted vegetable is found to be Beetroot!!

Having a botanical name Beta vulgaris, its history traces back to 2nd century. Due to its medicinal values, Beetroot was offered in Apollo’s temple & it was reckoned to be worth its own weight in silver!

Since beginning people were only using beet leaves, later its popularity was declined due to the introduction of Spinach. Beetroot was used only for medicine but in 1800's it became a popular food as French chefs recognized it's potential!!

Beetroot is a natural medicine for cardiovascular problems, Liver, blood pressure & indigestion etc.

Due to its Deep Dark Crimson color…. beetroot powder is used as a industrial Red Food Colorant in tomato sauces, jams, jellies, ice creams, cakes!!!

Me & my mom have started this project of exploring each vegetable by learning all the interesting facts, cooking at least 3 dishes using it & of course tasting it as well :)

This week we have triedout Beetroot Laddu, Beetroot Soup & Beetroot Chutney!!!

Here is the recipe for you!!

Beetroot Laddu

Ingredients:

Grated Beetroot - 3 bowls

Grated dry coconut - 1 bowl

Sugar - 1 bowl (you can use more according to your taste!)

Ghee - 2 Spoons

Cardamom powder – 1/4^th spoon

Dry fruits of your choice (Almond, cashew nut, raisins)

Method:

1. Take a thick bottom pan, add 2 spoons of Ghee add grated beetroot & fry for 5 mins till the raw smell & taste goes off.

2. Add Sugar, grated coconut, cardamom powder. Keep stirring for next 10-15 mins continuously till the mixture becomes sticky thick consistent.

3. Transfer the mixture on a ghee coated plate. Once it is cooled a bit, takeout 2 spoons of mixture on your palm make a small laddus by rolling it between your both palms. You can decorate with dry fruits of your choice & Sprinkle grated coconut on the laddus.

4. If you don't like it like laddu, pour the mixture on ghee coated plate & cut it like small square or shape of your imagination, decorate with dry fruits!

Best to consume before 7-8 days

Its rally tasty & kids will love it!! :) Try it out & share your experience :)

watch out my next article for Beetroot soup & chutney! :)

ಸಬಕ್ಕಿ ಉಪ್ಪಿಟ್ಟು

2011-04-23T10:59:00.000-07:00

ಬೇಕಾಗುವ ಪದಾರ್ಥಗಳು:
ಸಬ್ಬಕ್ಕಿ-1 ಬಟ್ಟಲು (4-5 ಗಂಟೆಗಳವರೆಗೆ ನೀರಿನಲ್ಲಿ ನೆನೆಸಿಟ್ಟುಕೊಳ್ಳಿ)
ಆಲೂಗಡ್ಡೆ-3 (ನೀರಿನಲ್ಲಿ ಬೇಯಿಸಿಕೊಂಡು, ಸಿಪ್ಪೆ ತೆಗೆದು, ಚಿಕ್ಕ ಹೋಳುಗಳನ್ನಾಗಿ ಕತ್ತರಿಸಿಕೊಳ್ಳಿ)
ಹೆಚ್ಚಿದ ಹಸಿಮೆಣಸಿನಕಾಯಿ - 4
ಕರಿಬೇವಿನ ಎಸಳು - 2
ಕೊತ್ತಂಬರಿ ಸೊಪ್ಪು
ಸೇಂಗಾ ಪುಡಿ - ಒಂದು ಹಿಡಿ
ನಿಂಬೆಹಣ್ಣು- 1/2 ಹೋಳು
ಸಾಸಿವೆ- 1/4 ಚಮಚ
ಜೀರಿಗೆ- 1/4 ಚಮಚ
ಎಣ್ಣೆ- 2 ಚಮಚ
ಹಿಂಗು - ಚಿಟಕಿಯಷ್ಟು
ಉಪ್ಪು-ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ:
ಬಾಣಲೆಯಲ್ಲಿ ಎಣ್ಣೆ ಹಾಕಿ, ಕಾದ ನಂತರ ಸಾಸಿವೆ, ಹಿಂಗು, ಜೀರಿಗೆ, ಕರಿಬೇವು, ಮೆಣಸಿನಕಾಯಿ ಹಾಕಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ, ನಿಂಬೆ ಹಣ್ಣಿನ ರಸ ಹಿಂಡಿ ಸ್ವಲ್ಪ ಬೆಂದನಂತರ ನೆನೆದ ಸಬ್ಬಕ್ಕಿಯನ್ನ ಹಾಕಿ ೫ ನಿಮಿಷದವರೆಗೆ ಮಧ್ಯಮ ಉರಿಯಲ್ಲಿ ಮೆತ್ತಗಾಗುವವರೆಗೆ ಬೇಯಿಸಿ, ತಳ ಸೀದುಹೋಗಲು ಬಿಡಬೇಡಿ. ಅದಕ್ಕೆ ಆಲೂಗಡ್ಡೆ ಹೋಳುಗಳನ್ನ ಮತ್ತು ಸೇಂಗಾ ಪುಡಿಯನ್ನ ಹಾಕಿ ಇನ್ನೆರಡು ನಿಮಿಷ ಬಿಸಿಮಾಡಿ. ಕೊನೆಗೆ ಕೊತ್ತಂಬರಿ ಸೊಪ್ಪನ್ನ ಹಾಕಿ ಅಲಂಕರಿಸಿ. ಸಂಜೆ ಕಾಫಿ/ಟೀ ಜೊತೆ ಇದನ್ನ ಸವಿಯಲು ಚೆಂದ :)

ಸಾಮಾನ್ಯವಾಗಿ ಉಪವಾಸದ ದಿನದಂದು ಇದನ್ನ ತಯಾರಿಸಿ ತಿನ್ನುತ್ತಾರೆ. ಯತೇಚ್ಚವಾಗಿ ಕಾರ್ಬೋಹೈಡ್ರ‍ೇಟ್ಸ್ ಸಿಗುವ ಈ ತಿಂಡಿಯನ್ನ ತಿಂದು ಉಪವಾಸ ಏತಕ್ಕೆ ಮಾಡುತ್ತರೆ ಅನ್ನುವುದು ನನ್ನನ್ನ ಅತಿಯಾಗಿ ಕಾಡುವ ಪ್ರಶ್ನೆ??! ಗೊತ್ತಿದ್ದರೆ ನೀವು ಉತ್ತರಿಸಿ :)

ಧನ್ಯವಾದಗಳು
ಸವಿತ ಎಸ್ ಆರ್

ರಾಗಿ ಹಲ್ವ ಅಥವಾ ರಾಗಿ ಕಿಲ್ಸ

2011-03-11T05:30:00.000-08:00

ಚಿಕ್ಕಂದಿನಿಂದಲೂ ನನ್ನ ಎಲ್ಲಾ ಹುಟ್ಟುಹಬ್ಬಗಳಿಗೆ ನನ್ನಮ್ಮ ಪ್ರೀತಿಯಿಂದ ಮಾಡಿಕೊಡುವ ಈ ರಾಗಿ ಕಿಲ್ಸವೇ ನನ್ನ ಅತಿ ಮೆಚ್ಚಿನ ಕೇಕು. ಇನ್ಮುಂದೆ ನನ್ನ ಮಗಳಿಗೂ ಸಹ ನಾನು ಮಾಡಿಕೊಡಲು ಕಲಿತ ರೆಸಿಪಿಯಿದು :) ಚಿತ್ರದುರ್ಗ,ದಾವಣಗೆರೆ ಕಡೆಗಳಲ್ಲಿ ಮತ್ತು ಹೆಚ್ಚಾಗಿ ರಾಗಿ ಬೆಳೆಯುವ ಪ್ರದೇಶಗಳಲ್ಲಿ ಇದನ್ನ ತಯಾರಿಸುತ್ತಾರೆ. ಆದರೆ ಇದಿನ್ನೂ ಹೆಚ್ಚು ಪ್ರಚುರ ಪಡಿಸದ ಸಿಹಿ ತಿನಿಸು. ಕಬ್ಬಿಣದಂಶ, ಕ್ಯಾಲ್ಸಿಯಂ ಹೆಚ್ಚಾಗಿರುವ ಇದನ್ನ ಮಾಡುವುದು ಅತಿ ಸುಲಭ ಮತ್ತು ರುಚಿಯಾದದ್ದು.

ಬೇಕಾಗುವ ಪದಾರ್ಥಗಳು:

ರಾಗಿ 1/4 ಕೆಜಿ

ಬೆಲ್ಲ 1/4 ಕೆಜಿ

ಏಲಕ್ಕಿ ಪುಡಿ 1/4 ಚಮಚ

ಗಸಗಸೆ 2 ಚಮಚ

ತುರಿದ ಕೊಬ್ಬರಿ 5 ಚಮಚ

ತುಪ್ಪ 1 ಚಮಚ

ಮಾಡುವ ವಿಧಾನ:

1. ಬೆಳಗ್ಗೆ ರಾಗಿಯನ್ನ 10-12 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ

2. ಸಂಜೆ ಹೊತ್ತಿಗೆ ನೆನೆದ ರಾಗಿಯನ್ನ ಮಿಕ್ಸರಿನಲ್ಲಿ ಸಾಕಷ್ಟು ನೀರಿನೊಟ್ಟಿಗೆ ನುಣ್ಣಗೆ ರುಬ್ಬಿಕೊಳ್ಳಿ. ಬಿಳಿ ಬಟ್ಟೆ

ಇಲ್ಲವೆ ಅತಿ ಸಣ್ಣ ರಂದ್ರದ ಜರಡಿಯಲ್ಲಿ ರಾಗಿ ಹಾಲನ್ನ ಸೋಸಿಟ್ಟುಕೊಳ್ಳಿ.

3. ಬೆಲ್ಲದಲ್ಲಿರುವ ಕಲ್ಲುಗಳನ್ನ ತೆಗೆಯಲು ಮೊದಲು ಬೆಲ್ಲವನ್ನ ಪುಡಿ ಮಾಡಿಕೊಂಡು ಬಿಸಿ ನೀರಿನಲ್ಲಿ ಹಾಕಿ,

ಕರಗಿದ ಬೆಲ್ಲದ ನೀರನ್ನ ಜರಡಿಯಲ್ಲಿ ಸೋಸಿಟ್ಟುಕೊಳ್ಳಿ.

4. ದೊಡ್ಡ ಪಾತ್ರೆಯಲ್ಲಿ ಈ ಬೆಲ್ಲದ ನೀರನ್ನ ಸುರಿದು ಸ್ಟವ್ ಮೇಲೆ ಮಧ್ಯಮ ಉರಿಯಲ್ಲಿ ಕುದಿಯಲು

ಬಿಡಿ,ಇದಕ್ಕೆ ಏಲಕ್ಕಿ ಪುಡಿಯನ್ನ ಹಾಕಿ. ಮೊದಲ ಕುದಿ ಬಂದಾಗ ಮುದ್ದೆ ಕೋಲು ಅಥವಾ ದೊಡ್ಡ

ಚಮಚದಲ್ಲಿ ಬೆಲ್ಲದ ನೀರನ್ನ ಕದಡುತ್ತಾ ನಿಧಾನವಾಗಿ ರಾಗಿಯ ಹಾಲನ್ನ ಸುರಿಯುತ್ತಾ ಬನ್ನಿ,

ಕದಡುವಿಕೆಯ ಕ್ರಿಯೆ ಹಾಗೇ 10 ರಿಂದ 15 ನಿಮಿಷದವರೆಗೆ ಮುಂದುವರೆಯಲಿ. ಈ ಮಿಶ್ರಣ ನಿಧಾನವಾಗಿ

ಗಟ್ಟಿಯಾಗುತ್ತಾ ಬರುತ್ತದೆ. ತಳ ಹತ್ತಲು ಅಥವಾ ತಳ ಸೀದುಹೋಗಲು ಬಿಡಬೇಡಿ.

5. ಹೀಗೆ ಗಟ್ಟಿಯಾದ ಮಿಶ್ರಣವನ್ನ ತುಪ್ಪ ಸವರಿದ ದೊಡ್ಡ ಹರಿವಾಣದಲ್ಲಿ ಸುರಿದು ಅದರ ಮೇಲೆ ಗಸಗಸೆ

ಮತ್ತು ತುರಿದ ಕೊಬ್ಬರಿಯನ್ನ ಹರಡಿರಿ.ಈ ತಟ್ಟೆಯನ್ನ ತಂಪಾದ ಜಾಗದಲ್ಲಿಟ್ಟು ರಾತ್ರಿಯಿಡೀ ಬಿಟ್ಟರೆ ಬೆಳಗ್ಗೆ

ಹೊತ್ತಿಗೆ ರಾಗಿ ಕಿಲ್ಸ ರೆಡಿ.

6. ತುಪ್ಪ ಸವರಿದ ಚಾಕುವಿನಿಂದ ಚೆಂದಾಗಿ ಚೌಕಾಕಾರ ಅಥವಾ ನಿಮಗಿಷ್ಟವಾದ ಆಕೃತಿಗೆ ಕತ್ತರಿಸಿಕೊಂಡು

ತುಪ್ಪದೊಟ್ಟಿಗೆ ತಿಂದರೆ ರಾಗಿ ಕಿಲ್ಸ ಬಲು ರುಚಿ ಮತ್ತು ದೇಹಕ್ಕೆ ತಂಪು.

ಬಾಳಿಕೆ:

ಹಾಗೇ ಹೊರಗಿಟ್ಟರೆ ಒಂದು ದಿನದವರೆಗೆ ಸೇವಿಸಬಹುದು, ಫ್ರಿಜ್ಜಿನಲ್ಲಿಟ್ಟರೆ 1-2 ದಿನಗಳವರೆಗೆ ಉಪಯೋಗಿಸಬಹುದು.

(ಚಿತ್ರಕೃಪೆ: ಸ್ವಂತದ್ದು )

ಕೃಷಿ ಮಾಧ್ಯಮ ಕೇಂದ್ರ ಅಹ್ವಾನಿಸಿರುವ ಸಿರಿಧಾನ್ಯ ಬಳಕೆಯ ಪಾಕವಿಧಾನಗಳ ಕಾಂಪಿಟೇಷನ್ನಿನಲ್ಲಿ ಭಾಗವಹಿಸಲು ನನ್ನಮ್ಮ ಈ ಪಾಕವಿಧಾನವನ್ನ ಕಳಿಸಿದ್ದಾರೆ. :)

ನಿಮ್ಮ ರೆಸಿಪಿಯನ್ನ ಕಳಿಸಿದ್ದೀರಾ? ಮಾರ್ಚ್ 20, 2011 ರವರೆಗೆ ಸಮಯವಿದೆ ಬೇಗ ಕಳಿಸಿ.

ಅಂಬಲಿ

2011-03-07T11:14:00.000-08:00

ವಾರದಲ್ಲಿ ಒಂದು ದಿನವಾದರೂ ನಮ್ಮನೇಲಿ ಬೆಳಗಿನ ಉಪಹಾರಕ್ಕೆ ಎಲ್ರಿಗೂ ಅಂಬಲಿ ಬೇಕೇ ಬೇಕು. :)
ಇದನ್ನ ಗಟ್ಟಿಯಾಗಿ ಮಾಡಿ ಅಗಿದು ನುಂಗಬಹುದು, ದ್ರವ ರೂಪದಲ್ಲಿ ಮಾಡಿಕೊಂಡು ಕೂಡಾ ಕುಡಿಯಬಹುದು.ಅದಕ್ಕೇ ಅಂಬಲಿಯನ್ನ ಮಾಡುವಾಗ ಬಳಸುವ ಪದಾರ್ಥಗಳ ಅಳತೆ ಇಂತಿಷ್ಟೇ ಇರಬೇಕೆಂದಿಲ್ಲ...ನಿಮಗೆ ಬಿಟ್ಟಿದ್ದು. ಹೇಗೆ ಮಾಡಿದರೂ ಚೆಂದ. :) ರಾಗಿ ನಮ್ಮ ದೇಶಕ್ಕೆ ಬಂದು ನಾಲ್ಕು ಸಾವಿರ ವರ್ಷಗಳಾಗಿವೆಯಂತೆ. ಕಬ್ಬಿಣದಂಶ, ಕ್ಯಾಲ್ಸಿಯಂ ಹೆಚ್ಚಾಗಿರುವ ಮತ್ತು ಸಿಕ್ಕಾಪಟ್ಟೆ ಶಕ್ತಿ ನೀಡುವ ಇದನ್ನ ತಯಾರಿಸಲು ಬಹಳ ಸುಲಭ ಮತ್ತು ದೇಹಕ್ಕೂ ತಂಪು.

ಬಳಸುವ ಪದಾರ್ಥಗಳು: [ಅಳತೆ ಇಂತಿಷ್ಟೇ ಇರಬೇಕೆಂದಿಲ್ಲ ನಿಮಗೆ ಬಿಟ್ಟಿದ್ದು]
ರಾಗಿ ಗಂಜಿ ಅಥವಾ ರಾಗಿ ಮುದ್ದೆ,
ಅನ್ನ,
ಉಪ್ಪು,
ಮೊಸರು,
ಈರುಳ್ಳಿ (ಸಣ್ಣಗೆ ಹೆಚ್ಚಿದ್ದು)
ರಾಗಿ ಗಂಜಿ -> ನೀರಿಗೆ ಸ್ವಲ್ಪ ರಾಗಿ ಹಿಟ್ಟನ್ನ ಕದಡಿ ಚೆನ್ನಾಗಿ ಕುದಿಸಿದರೆ ರಾಗಿ ಗಂಜಿಯಾಗುತ್ತದೆ
ರಾಗಿ ಮುದ್ದೆ ಉಪಯೋಗಿಸುವುದಾದರೆ: ರಾಗಿ ಮುದ್ದೆಯನ್ನ ಚಿಕ್ಕ ಚಿಕ್ಕ ತುತ್ತುಗಳನ್ನಾಗಿ ಮಾಡಿಕೊಂಡು, ನೀರಿನೊಟ್ಟಿಗೆ ಮಿಕ್ಸರಿನಲ್ಲಿ ಒಂದೆರಡು ಸಾರಿ ಸುತ್ತಿಸಿ ರಾಗಿ ಗಂಜಿಯ ರೀತಿ ತೆಳುವಾಗಿ ಮಾಡಿಕೊಳ್ಳಿ.

ಮಾಡುವ ವಿಧಾನ:
1. ಅನ್ನವನ್ನ ನೀರಿನೊಟ್ಟಿಗೆ ಮಿಕ್ಸರಿನಲ್ಲಿ ಒಂದೆರಡು ಸುತ್ತು ಸುತ್ತಿಸಿ, ಅನ್ನದಗಳು ಒಂದೆರಡು ತುಂಡಾದರೆ ಸಾಕು.
2. ಅನ್ನ ಮತ್ತು ರಾಗಿ ಗಂಜಿ ಮಿಶ್ರಣವನ್ನ ಒಂದು ಪಾತ್ರೆಯಲ್ಲಿ ಹಾಕಿ. ನಾನು ಸಾಮಾನ್ಯವಾಗಿ 60% ಅನ್ನದ ಮಿಶ್ರಣಕ್ಕೆ 40% ರಾಗಿ ಗಂಜಿಯನ್ನ ಬಳಸುತ್ತೇನೆ.
3. ಅದಕ್ಕೆ ಇನ್ನಷ್ಟು ನೀರನ್ನ ಹಾಕಿ ಕಲಸಿಡಿ. ಇದನ್ನ ರಾತ್ರಿ ಮಾಡಿಟ್ಟರೆ ಬೆಳಗ್ಗೆಗೆ ಚೆನ್ನಾಗಿ ನೆನೆದಿರುತ್ತದೆ.
4. ಬೆಳಗ್ಗೆ ಈ ಮಿಶ್ರಣಕ್ಕೆ ನೀರು, ಸಾಕಾಗುವಷ್ಟು ಉಪ್ಪು, ಮೊಸರು, ಸಣ್ಣಗೆ ಹೆಚ್ಚಿದ ಈರುಳ್ಳಿ ಹಾಕಿ ಕದಡಿದರೆ ಕುಡಿಯಲು ಅಂಬಲಿ ರೆಡಿ.
5. ಜೊತೆಗೆ ನೆಂಚಿಕೊಳ್ಳಲು ಕಾಯಿ ಚೆಟ್ನಿ ಮತ್ತು ಮಾವಿನಕಾಯಿ ಉಪ್ಪಿನಕಾಯಿದ್ದರೆ ರುಚಿ ಬಲು ಸೊಗಸು.

ಅಂಬಲಿಯನ್ನ ಮಾಡಿಕೊಂಡು ಕುಡಿದು ನೋಡಿ ಮತ್ತು ನೀವು ಬೇರೆ ರೀತಿಯಲ್ಲಿ ತಯಾರಿಸುತ್ತಿದ್ದರೆ ತಿಳಿಸಲು ಮರೆಯಬೇಡಿ :)
ಧನ್ಯವಾದಗಳು
ಸವಿತ ಎಸ್ ಆರ್

ದೃಷ್ಟಿ/ಕಣ್ಣು ಆಸರೆ ಅಂದ್ರೇನು?

2011-01-29T10:22:00.000-08:00

ನಮ್ಮನೆಗೆ ನಮ್ಮ ಪುಟಾಣಿ ಮಗಳನ್ನ ನೋಡಲು ಯಾರಾದ್ರು ನೆಂಟರು, ಸ್ನೇಹಿತರು ಬಂದು ಹೋದರೆ ಸಾಕು ಸಂಜೆ ಹೊತ್ತಿಗೆ ಮಗಳು ಒಂದೇ ಸಮ ಅಳಲು ಶುರುಮಾಡಿದರೆ ನಿಲ್ಲಿಸಲಾಗದು. ಆಕೆಗೆ "ಕಣ್ಣಾಸರೆಯಾಗಿದೆ" ಅಂತ ನಮ್ಮಮ್ಮ " ಉಪ್ಪು, ವೀಳ್ಯದೆಲೆ, ಅನ್ನ,ಮೆಣಸಿನಕಾಯಿ, ಹರಿಶಿಣ, ಕೆಂಡ, ನೀರು" ಉಪಯೋಗಿಸಿ ಅವರು ಕಲಿತ ರೀತಿಯಲ್ಲಿ ದೃಷ್ಟಿ ತೆಗೆಯುತ್ತಾರೆ. ನಂತರ ಮಗಳು ನೆಮ್ಮದಿಯಾಗಿ ಮಲಗುತ್ತಾಳೆ. ಈ ಪ್ರಕ್ರಿಯೆಯನ್ನ ಕಳೆದ ತಿಂಗಳಿನಿಂದ ಸುಮಾರು ಸಲ ನೋಡ್ತಾ ಇದರ ಬಗ್ಗೆ ಅನೇಕ ಪ್ರಶ್ನೆಗಳು ಮೂಡಿವೆ.

1. ದೃಷ್ಟಿ/ಕಣ್ಣು ಆಸರೆ ಎಂದರೇನು?
2. ಕಣ್ಣು ಆಸರೆ ಹೇಗೆ ಆಗತ್ತೆ? ಏಕೆ ಆಗತ್ತೆ?
3. ದೃಷ್ಟಿ ತೆಗೆಯುವಿಕೆಯ ವಿಧಾನಗಳೇನು?
4. ಉಪ್ಪು, ವೀಳ್ಯದೆಲೆ, ಅನ್ನ,ಮೆಣಸಿನಕಾಯಿ, ಹರಿಶಿಣ, ಕೆಂಡ, ಬೂದಗುಂಬಳಕಾಯಿ, ನಿಂಬೆ ಹಣ್ಣು ಇವುಗಳು ಹೇಗೆ ದೃಷ್ಟಿಯನ್ನ ತೆಗೆಯುತ್ತವೆ? ಈ ಪದಾರ್ಥಗಳಲ್ಲಿ ಅಂತಹ ಯಾವ ವಿಶಿಷ್ಟ ಗುಣಗಳಿವೆ?

ಮೊದಲೆರಡು ಪ್ರಶೆಗಳಿಗೆ ನನಗೆ ತಿಳಿದದ್ದು...
ನಮ್ಮ ಸೂಕ್ಷ್ಮ ಶರೀರದದಲ್ಲಿರುವ ಏಳು ಚಕ್ರಗಳು- ಸಹಸ್ರಾರ, ಆಜ್ಞಾ, ವಿಶುದ್ಧ, ಅನಾಹತ, ಮಣಿಪೂರ, ಸ್ವಾಧಿಸ್ಠಾನ, ಮೂಲಾಧಾರ. ಪ್ರತಿ ಚಕ್ರದಲ್ಲಿ ದೇಹಕ್ಕೆ ಸಾಕಾಗುವಷ್ಟು ಶಕ್ತಿ ಸಂಗ್ರಹವಾಗಿರುತ್ತದೆ. ಚಿಕ್ಕ ಮಕ್ಕಳಲ್ಲಿ ಎಲ್ಲಾ ಚಕ್ರಗಳು ತೆರೆದಿರೋದ್ರಿಂದ ಶಕ್ತಿಯ ಸಂಚಲನೆ ತುಂಬಾ ಸಲೀಸು. ಅಂದರೆ ಹೊರಗಿನಿಂದ ಬರುವ ಹೆಚ್ಚಿನ ಶಕ್ತಿಯನ್ನ ಸಂಗ್ರಹಿಸುವ/ಇರುವ ಶಕ್ತಿಯನ್ನ ಕ್ಷೀಣಿಸಿಕೊಳ್ಳುವ ಪ್ರಕ್ರಿಯೆ ಯಾವುದೇ ಅಡೆ ತಡೆಯಿಲ್ಲದೆ ನಡೆಯುತ್ತದೆ.

ಯಾರಾದ್ರೂ ಮಗುವನ್ನ ನೋಡಿ ಸಂತಸದಿಂದ "ವಾವ್! ಆ ಮಗು ಎಷ್ಟು ಮುದ್ದಾಗಿದೆ" ಅನ್ನೋ ಗುಣಾತ್ಮಕ ಶಕ್ತಿಯನ್ನ ವರ್ಗಾಯಿಸಿದಾಗ ಈ ಹೆಚ್ಚಿನ ಶಕ್ತಿಯನ್ನ ಸಂಗ್ರಹಿಸಿಕೊಂಡು ಮಗುವಿನ ಸೂಕ್ಷ್ಮ ಶರೀರದದಲ್ಲಿ ಆಗುವ ಶಕ್ತಿಯ ಅಸಮತೋಲನೆಯಿಂದ ದೇಹ ಪ್ರತಿಕ್ರಿಯಿಸುವ ರೋಧನೆಯೇ ದೃಷ್ಟಿ.

ಬೇಜಾರಿನಿಂದ "ಛೇ! ಆ ಮಗು ಲಕ್ಷಣವಾಗೇ ಇಲ್ವಲ್ಲ" ಅಂದಾಗ ಈ ನಕಾರಾತ್ಮಕತೆ ಚಕ್ರದಲ್ಲಿ ಇರುವ ಶಕ್ತಿಯನ್ನ ಕ್ಷೀಣಿಸುವಿಕೆಯಿಂದ ಕೂಡಾ ಅಸಮತೋಲನೆ ಆಗತ್ತೆ.
ಇದು ನಾನು ನನ್ನದೇ ಆದ ರೀತಿಯಲ್ಲಿ ಅರ್ಥೈಸಿಕೊಂಡಿರೋದು :) ಎಷ್ಟು ಸರಿ ಅಂತ ಗೊತ್ತಿಲ್ಲ. ಇದರ ಬಗ್ಗೆ ನಿಮ್ಮ ವಿಚಾರಗಳೇನು ತಿಳಿಸಿ.

ಮೇಲಿನವಷ್ಟು ಮನುಷ್ಯರಿಗೆ ಸಂಬಂಧ ಪಟ್ಟಂತ ಪ್ರಶ್ನೆಗಳು. ಇನ್ನು ವಸ್ತುಗಳ ಬಗ್ಗೆ.....ಹೊಸ ಮನೆ, ಹೊಸ ಗಾಡಿಯನ್ನ ಕೊಂಡಾಗ ಕೂಡ ದೃಷ್ಟಿಯಾಗದಿರಲೆಂದು ಬೂದಗುಂಬಳಕಾಯಿಯನ್ನ ನಿವಾಳಿಸಿ ಒಡೆಯುತ್ತಾರೆ ಮತ್ತು ನಿಂಬೆ ಹಣ್ಣನ್ನ ಉಪಯೋಗಿಸುತ್ತಾರಲ್ವಾ. ವಸ್ತುಗಳಿಗೆ ಹೇಗೆ ದೃಷ್ಟಿಯಾಗುತ್ತದೆ?

ಗೂಗಲಿಸಿ ನೋಡಿದೆ ಇದರ ಬಗ್ಗೆ ಯಾವ ವಿಚಾರಗಳು ಸಿಗಲಿಲ್ಲ, ಅದಕ್ಕೇ ಈ ಬರಹ :) ವೈಜ್ಞಾನಿಕವಾಗಿ ಈ ವಿಚಾರಗಳ ಬಗ್ಗೆ ನಿಮಗೆ ಗೊತ್ತಿದ್ದರೆ ದಯವಿಟ್ಟು ಹಂಚಿಕೊಳ್ಳಿ.
ಧನ್ಯವಾದಗಳು
ಸವಿತ ಎಸ್ ಆರ್

ಮಜ್ಜಿಗೆ ಹುಳಿ/ಸಾರು/ಖಾರ/ಖಡಿ

2011-01-24T09:45:00.000-08:00

ಈವತ್ತು ಆಂಧ್ರ ಶೈಲಿಯಲ್ಲಿ ಮಜ್ಜಿಗೆ ಹುಳಿ(ಮಜ್ಜಿಗ ಪುಲುಸು) ಮಾಡುವುದನ್ನ ನಮ್ಮತ್ತೆ ಹೇಳಿಕೊಟ್ಟರು, ಇಂದೇ ಮಾಡಿ...ಕಲಿತದ್ದು ಮರೆತು ಹೋಗದಿರಲೆಂದು ಬರೆದುಕೊಂಡ ಬರಹವಿದು :)

ಅತ್ತೆ ಮಾಡುವ ಮಜ್ಜಿಗೆ ಹುಳಿ(ಮಜ್ಜಿಗ ಪುಲುಸು)

ಬಳಸುವ ಪದಾರ್ಥಗಳು:
1/2 ಲೀಟರ್ ಮಜ್ಜಿಗೆ(ಹುಳಿಯಾಗಿದ್ದರೆ ಓಕೆ, ತುಂಬಾ ನೀರಾಗಿರಬಾರದು)
ಒಗ್ಗರೆಣೆಗೆ: 1-2 ಚಮಚ ಎಣ್ಣೆ,ಸಾಸಿವೆ, ಒಂದು ಚಿಟಿಕೆ ಹಿಂಗು, 2 ಎಸಳು ಕರಿಬೇವಿನ ಎಲೆ, ಒಂದು ಈರುಳ್ಳಿ (ಸಣ್ಣಗೆ ಹೆಚ್ಚಿದ್ದು)
ಉಪ್ಪು ರುಚಿಗೆ ತಕ್ಕಷ್ಟು
ಕುಂಬಳಕಾಯಿ: ನಿಮಗೆ ಬೇಕಾದ ಗಾತ್ರ, ಆಕಾರಕ್ಕೆ ಕತ್ತರಿಸಿಕೊಂಡು, ಪಾತ್ರೆಗೆ ನೀರು,ಸ್ವಲ್ಪ ಉಪ್ಪು ಹಾಕಿ ಕುಂಬಳಕಾಯಿಯನ್ನ ಬೇಯಿಸಿಕೊಳ್ಳಿ.

ರುಬ್ಬಿಕೊಳ್ಳಲು:
ಒಂದು ಚಮಚ ಅಕ್ಕಿ ಮತ್ತು ಒಂದೂವರೆ ಚಮಚ ಕಡಲೆ ಬೇಳೆಯನ್ನ ನೀರಲ್ಲಿ ಹಾಕಿ 2 ಗಂಟೆಗಳವರೆಗೆ ನೆನೆಸಿಡಿ
4 ಹಸಿಮೆಣಸಿನ ಕಾಯಿ (ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಮೆಣಸಿನಕಾಯನ್ನ ಹುರಿದುಕೊಳ್ಳಿ)
ಸ್ವಲ್ಪ ಹಸಿ ಶುಂಠಿ
1/4 ಚಮಚ ಹರಿಸಿಣ ಪುಡಿ
1/2 ಚಮಚ ಜೀರಿಗೆ
ಸ್ವಲ್ಪ ಕೊತ್ತಂಬರಿ ಸೊಪ್ಪು(ಅಲಂಕಾರಕ್ಕೆ)

ಮಾಡುವ ವಿಧಾನ:
ಮೇಲೆ ರುಬ್ಬಿಕೊಳ್ಳಲು ಹೇಳಿದ ಪದಾರ್ಥಗಳನ್ನ ಚೆನ್ನಾಗಿ ನುಣ್ಣಗೆ ರುಬ್ಬಿಕೊಂಡು ಅದನ್ನ ಮಜ್ಜಿಗೆಯೊಂದಿಗೆ ಬೆರೆಸಿಡಿ
ಒಗ್ಗರಣೆ:
ಪಾತ್ರೆಗೆ 1-2 ಚಮಚ ಎಣ್ಣೆ ಹಾಕಿ ಚೆನ್ನಾಗಿ ಕಾದ ನಂತರ ಸಾಸಿವೆ, ಹಿಂಗು, ಕರಿಬೇವಿನ ಎಲೆ, ಈರುಳ್ಳಿ ಹಾಕಿರಿ. ಈರುಳ್ಳಿ ಸ್ವಲ್ಪ ಕೆಂಪಗಾದ ಮೇಲೆ ಅದಕ್ಕೆ ಮಜ್ಜಿಗೆಯ ಮಿಶ್ರಣವನ್ನ ನಿಧಾನವಾಗಿ ಸುರಿಯಿರಿ. ಆ ಮಿಶ್ರಣವನ್ನ ಸೌಟಿನಲ್ಲಿ ನಿಧಾನವಾಗಿ ಕದಡುತ್ತಿರಿ. ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ. ಒಂದು ಕುದಿ ಬಂದಮೇಲೆ ಬೇಯಿಸಿಕೊಂಡ ಕುಂಬಳಕಾಯಿಯನ್ನ ಅದಕ್ಕೆ ಹಾಕಿ ಇನ್ನಷ್ಟು ಹೊತ್ತು ಕುದಿಸಿ. ಕೊನೆಗೆ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನ ಮೇಲೆ ಹಾಕಿದರೆ ಮಜ್ಜಿಗೆ ಹುಳಿ(ಮಜ್ಜಿಗ ಪುಲುಸು) ರೆಡಿ.

ಮಾಡಿದೊಡನೆ ಖಾಲಿಯಾದ್ದರಿಂದ ಪೋಟೋ ತೆಗೆದುಕೊಳ್ಳಲು ಸಾಧ್ಯವಾಗಲ್ಲಿಲ್ಲ :( ಮತ್ತೊಮ್ಮೆ ಹಾಕುವೆ :)
----------------------------------------------------------------------------------
ಹಾಗೇ ಇದೇ ಮಜ್ಜಿಗೆ ಹುಳಿಯನ್ನ ನಮ್ಮಮ್ಮ ಮತ್ತು ಪಕ್ಕದ ಮನೆ ಅಜ್ಜಿ ಬೇರೆ ವಿಧಾನದಲ್ಲಿ ಮಾಡುತ್ತಾರೆ.

ಅಮ್ಮ ಮಾಡುವ ಮಜ್ಜಿಗೆ ಸಾರು:
ಬಳಸುವ ಪದಾರ್ಥಗಳು:
1/2 ಲೀಟರ್ ಮಜ್ಜಿಗೆ(ಹುಳಿಯಾಗಿದ್ದರೆ ಓಕೆ, ತುಂಬಾ ನೀರಾಗಿರಬಾರದು)
ಒಗ್ಗರೆಣೆಗೆ: 1-2 ಚಮಚ ಎಣ್ಣೆ,ಸಾಸಿವೆ, ಒಂದು ಚಿಟಿಕೆ ಹಿಂಗು, 2 ಎಸಳು ಕರಿಬೇವಿನ ಎಲೆ, ಒಂದು ಈರುಳ್ಳಿ (ಸಣ್ಣಗೆ ಹೆಚ್ಚಿದ್ದು)
ಉಪ್ಪು ರುಚಿಗೆ ತಕ್ಕಷ್ಟು
ರುಬ್ಬಿಕೊಳ್ಳಲು: 1 ಚಮಚ ಖಾರದಪುಡಿ,1/2 ಚಮಚ ಜೀರಿಗೆ,5 ಹೋಳು ಬೆಳ್ಳುಳ್ಳಿ,1/4 ಚಮಚ ಹರಿಸಿಣ ಪುಡಿ,ಸ್ವಲ್ಪ ಕೊತ್ತಂಬರಿ ಸೊಪ್ಪು,3 ಚಮಚ ತೆಂಗಿನ ಕಾಯಿ,2 ಚಮಚ ಹುರಿಗಡಲೆ

ಮಾಡುವ ವಿಧಾನ:
ಮೇಲೆ ರುಬ್ಬಿಕೊಳ್ಳಲು ಹೇಳಿದ ಪದಾರ್ಥಗಳನ್ನ ಚೆನ್ನಾಗಿ ನುಣ್ಣಗೆ ರುಬ್ಬಿಕೊಳ್ಳಿ.
ಒಗ್ಗರಣೆ:
ಪಾತ್ರೆಗೆ 1-2 ಚಮಚ ಎಣ್ಣೆ ಹಾಕಿ ಚೆನ್ನಾಗಿ ಕಾದ ನಂತರ ಸಾಸಿವೆ, ಹಿಂಗು, ಕರಿಬೇವಿನ ಎಲೆ, ಈರುಳ್ಳಿ ಹಾಕಿರಿ. ಈರುಳ್ಳಿ ಸ್ವಲ್ಪ ಕೆಂಪಗಾದ ಮೇಲೆ ಅದಕ್ಕೆ ರುಬ್ಬಿಕೊಂಡ ಮಿಶ್ರಣವನ್ನ ಹಾಕಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ. ಒಂದು ಕುದಿ ಬಂದಮೇಲೆ ಮಜ್ಜಿಗೆಯನ್ನ ಹಾಕಿ ಕುದಿಸಿದರೆ ಮಜ್ಜಿಗೆ ಸಾರು ರೆಡಿ :) ಶೀತ,ಗಂಟಲು ನೋವು ಬಂದಾಗ ಈ ಮಜ್ಜಿಗೆ ಸಾರನ್ನ ಅಮ್ಮ ಜಾಸ್ತಿ ಮಾಡ್ತಾರೆ :)
--------------------------------------------------------------------------------
ಅಮ್ಮ ಮಾಡುವ ಮೊಸರಿನ ಖಾರ:
ಬಳಸುವ ಪದಾರ್ಥಗಳು:
1/2 ಲೀಟರ್ ಮೊಸರು (ಹುಳಿಯಾಗಿದ್ದರೆ ಓಕೆ)
ಒಗ್ಗರೆಣೆಗೆ: 1-2 ಚಮಚ ಎಣ್ಣೆ,ಸಾಸಿವೆ, ಒಂದು ಚಿಟಿಕೆ ಹಿಂಗು, 2 ಎಸಳು ಕರಿಬೇವಿನ ಎಲೆ, ಒಂದು ಈರುಳ್ಳಿ (ಸಣ್ಣಗೆ ಹೆಚ್ಚಿದ್ದು)
ಉಪ್ಪು ರುಚಿಗೆ ತಕ್ಕಷ್ಟು
ಉಪ್ಪಿನ ನೀರಲ್ಲಿ ಬೇಯಿಸಿದ ಕುಂಬಳಕಾಯಿಯ ಹೋಳುಗಳು
ರುಬ್ಬಿಕೊಳ್ಳಲು: 4-5 ಹಸಿ ಮೆಣಸಿನ ಕಾಯಿ,1/2 ಚಮಚ ಜೀರಿಗೆ, ಬೆಳ್ಳುಳ್ಳಿ, ಕೊತ್ತಂಬರಿ ಸೊಪ್ಪು, ತೆಂಗಿನ ಕಾಯಿ, 1/4 ಚಮಚ ಹರಿಸಿಣ ಪುಡಿ

ಮಾಡುವ ವಿಧಾನ:
ಮೇಲೆ ರುಬ್ಬಿಕೊಳ್ಳಲು ಹೇಳಿದ ಪದಾರ್ಥಗಳನ್ನ ಚೆನ್ನಾಗಿ ನುಣ್ಣಗೆ ರುಬ್ಬಿಕೊಳ್ಳಿ.
ಒಗ್ಗರಣೆಗೆ: ಪಾತ್ರೆಯಲ್ಲಿ 1 ಚಮಚ ಎಣ್ಣೆ ಹಾಕಿ,ಕಾದ ಮೇಲೆ ಸಾಸಿವೆ, ಜೀರಿಗೆ,ಹಿಂಗು, ಕರಿಬೇವಿನ ಎಲೆ, ಈರುಳ್ಳಿ ಹಾಕಿರಿ.ಈರುಳ್ಳಿ ಸ್ವಲ್ಪ ಕೆಂಪಗಾದ ಮೇಲೆ ಅದಕ್ಕೆ ರುಬ್ಬಿಕೊಂಡ ಮಿಶ್ರಣ ಮತ್ತು ಬೇಯಿಸಿದ ಕುಂಬಳಕಾಯಿಯ ಹೋಳುಗಳನ್ನ ಹಾಕಿ,ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಒಂದು ಕುದಿ ಕುದಿಸಿರಿ.
ನಂತರ ಅದು ತಣ್ಣಗಾದ ನಂತರ ಮೊಸರನ್ನ ಹಾಕಿ ಕದಡಿದರೆ ಮೊಸರಿನ ಖಾರ ರೆಡಿ :)
------------------------------------------------------------------------------
ಪಕ್ಕದ ಮನೆ ಅಜ್ಜಿ ಮಾಡುವ ಮೊಸರಿನ ಖಡಿ:
ಬಳಸುವ ಪದಾರ್ಥಗಳು:

2 ಚಮಚ ಕಡಲೆ ಹಿಟ್ಟು(ನೀರಿನಲ್ಲಿ ಕದಡಿಟ್ಟುಕೊಳ್ಳಿ), 1/4 ಚಮಚ ಜೀರಿಗೆ, ಸಾಸಿವೆ, ಉಪ್ಪು, 2 ಮೆಣಸಿನ ಕಾಯಿ ,5-6 ಹೋಳು ಬೆಳ್ಳುಳ್ಳಿ, 1/4 ಚಮಚ ಹರಿಸಿಣ ಪುಡಿ

ಮಾಡುವ ವಿಧಾನ:
ಒಗ್ಗರಣೆಗೆ: ಪಾತ್ರೆಯಲ್ಲಿ ೧ ಚಮಚ ಎಣ್ಣೆ ಹಾಕಿ,ಕಾದ ಮೇಲೆ ಸಾಸಿವೆ, ಜೀರಿಗೆ,ಸ್ವಲ್ಪ ಜಜ್ಜಿದ ಬೆಳ್ಳುಳ್ಳಿ,ದೊಡ್ಡಕೆ ಹೆಚ್ಚಿದ ಮೆಣಸಿನ್ಕಾಯಿ ಹಾಕಿ ಸ್ವಲ್ಪ ಫ಼್ರೈ ಆದನಂತರ ಅದಕ್ಕೆ ಕಡಲೆ ಹಿಟ್ಟಿನ ಮಿಶ್ರಣವನ್ನ ಹಾಕುತ್ತಾ ಕದಡಿ, ನಂತರ ಅದಕ್ಕೆ ಮೊಸರನ್ನ ಹಾಕಿ ಒಂದು ಕುದಿ ಕುದಿಸಿ ಅದಕ್ಕೆ ಕಡಲೆ ಹಿಟ್ಟಿನ ಪಕೋಡಾಗಳನ್ನ ಹಾಕಿದರೆ ಮೊಸರಿನ ಖಡಿ ತಯ್ಯಾರು :)

ಧನ್ಯವಾದಗಳು
ಸವಿತ ಎಸ್ ಆರ್

ಕಾಡಿಗೆ..!

2011-01-20T05:30:00.000-08:00

ನನ್ನ ಪುಟಾಣಿ ಮಗಳ ಹಣೆಗೆ ಪ್ರತಿ ದಿನ ಹಚ್ಚಲು ಅಂಗಡಿಯ ಕಾಡಿಗೆ ಉಪಯೋಗಿಸಬೇಡ, ಮನೆಯಲ್ಲೇ ಮಾಡಿಕೋ ಅಂತ ನನ್ನ ಅಜ್ಜಿ ಹೇಳಿ ಕೊಟ್ಟದ್ದರ ಬಗ್ಗೆ ಈ ಬರಹ. ಚಿಕ್ಕಮಕ್ಕಳಿಗಷ್ಟೇ ಅಲ್ಲ ನಾವು ಕೂಡಾ ಬಳಸಬಹುದು.

ಬೇಕಾಗುವ ಸಾಮಾನುಗಳು:
ಸಬ್ಬಕ್ಕಿ - ನಿಮಗೆ ಬೇಕಾದಷ್ಟು ( ಮೊದಲ ಸಲ ಮಾಡುವವರು 2 ಹಿಡಿಯಷ್ಟನ್ನ ತೆಗೆದುಕೊಳ್ಳಿ), ನೀರು

1. ಮೊದಲಿಗೆ ಸಬ್ಬಕ್ಕಿಯನ್ನ ಬಾಣಲೆಯಲ್ಲಿ ಹಾಕಿ ಸಣ್ಣ ಹುರಿಯಲ್ಲಿ ಚೆನ್ನಾಗಿ ಹುರಿಯಿರಿ, ಬಂಗಾರದ ಬಣ್ಣ/ಸ್ವಲ್ಪ ಕಪ್ಪು ಬಣ್ಣ ಬರುವವರೆಗು.
2. ಹುರಿದ ಸಬ್ಬಕ್ಕಿಯ ಬಾಣಲಿಗೆ ನೀರನ್ನು ಹಾಕಿ ಚೆನ್ನಾಗಿ ಕುದಿಸಿರಿ.
3. ಸಬ್ಬಕ್ಕಿ ಬೇಯುತ್ತಾ ಕಪ್ಪನೆಯ ಪಾಕದಂತೆ ಆಗುವವರೆಗೂ ಚಮಚದಲ್ಲಿ ಕದಡುತ್ತಿರಿ
4. ಬೆಂದ ಸಬ್ಬಕ್ಕಿಯನ್ನ ಅದೇ ಬಾಣಲೆಯಲ್ಲಿ ಮಸೆದು, ಗಟ್ಟಿಯಾದ ಪಾಕವನ್ನ ಟೀ ಸೋಸುವ ಜರಡಿಯಲ್ಲಿ ಸೋಸಿಕೊಂಡು ಪುಟಾಣಿ ಡಬ್ಬದಲ್ಲಿ ಶೇಖರಿಸಿಡಿ.
5. ಪಾಕವನ್ನ ಮನೆಯೊಳಗೇ ಒಣಗಿ ಗಟ್ಟಿಯಾಗಲು ಬಿಡಿ
6. ಬೆರಳನ್ನ ನೀರಲ್ಲಿ ಅದ್ದಿಕೊಂದು ಸ್ವಲ್ಪ ಕಪ್ಪನ್ನ ತೀಡಿದರೆ ಹಣೆಗೆ ಬೊಟ್ಟು ಇಡಲು ರೆಡಿ :)

ಒಮ್ಮೆ ಮಾಡಿಟ್ಟುಕೊಂಡ ಕಾಡಿಗೆಯನ್ನ ಬಹಳ ದಿನಗಳವರೆಗೆ ಬಳಸಬಹುದು, ಹಾಳಾಗುವುದಿಲ್ಲ.

ಮುವ್ವತ್ತು ವರ್ಷಗಳ ಹಿಂದೆ ನನ್ನಜ್ಜಿ ಕಾಡಿಗೆಯನ್ನ ತಯಾರಿಸಿ ತೆಂಗಿನ ಚಿಪ್ಪಿನಲ್ಲಿ ಶೇಖರಿಸಿಟ್ಟು ತನ್ನ ಮಕ್ಕಳಿಗೆ & ಮೊಮ್ಮಕ್ಕಳಿಗೂ ಕೂಡ ಬಳಸಿ...ಕೊನೆಗೆ ನೆನಪಿಗಿರಲಿ ಅಂತ ನನಗೆ ಕೊಟ್ಟಿದ್ದಾರೆ. :)

ನಿಮಗೆ ಕಾಡಿಗೆ ತಯಾರಿಸೋ ಬೇರೆ ವಿಧಾನಗಳು ಗೊತ್ತಿದ್ದರೆ ಹಂಚಿಕೊಳ್ಳಿ, ಉಪಯೋಗವಾದೀತು.
ಧನ್ಯವಾದಗಳು
-ಸವಿತ ಎಸ್ ಆರ್

(ಚಿತ್ರ ಕೃಪೆ: ಸ್ವಂತದ್ದು)

ಬೇಕಿವೆ ಜೋಗುಳಗಳು...

2011-01-06T00:25:00.000-08:00

ತಿಂಗಳು ತುಂಬದ
ನನ್ನ ಕಂದಮ್ಮ
ರಚ್ಚೆ ಹಿಡಿದು
ಅತ್ತು ಕೂಗಿ ಕರೆವಾಗ
ಹಾಡಿ ತೂಗಿ ಮಲಗಿಸಲು
ಜೋಗುಳಗಳು ಬೇಕಿವೆ...

ಸದ್ಯಕ್ಕೆ ಗೊತ್ತಿರುವ
ಭಾವಗೀತೆಗಳನ್ನೇ
ತಿರು ತಿರುಗಿ
ಹಾಡಿ ಮಲಗಿಸುತ್ತಿರುವೆ!!

ಪ್ರಾಸ ಲಯಬದ್ದವಾಗಿ
ಹಳಬರು ರಚಿಸಿರುವ
ಸವಿಯಾಗಿ ಹಾಡಿ ಹೊಗಳಿ
ಮಕ್ಕಳನ್ನ ನಿದ್ರಾಲೋಕಕ್ಕೆ
ಕರೆದೊಯ್ಯುವ
ಲಾಲಿ ಪದಗಳಿರುವಾಗ...
ಭಾವಗೀತೆಗಳೇಕೆ?
ಇಷ್ಟು ಬೇಗ
ಎಂದೆನಿಸಿದೆ!

ಅದಕ್ಕೇ ಗೊತ್ತಿರುವವರು
ಬೇಗ ಹಂಚಿಕೊಳ್ಳಿ
ನಿಮ್ಮ ಬಳಿಯಿರುವ
ಲಾಲಿ ಪದಗಳನ್ನ
ಗೊತ್ತಿರದಿದ್ದರೆ ಕೇಳಿ ಬರೆಯಿರಿ
ನಿಮ್ಮ ಅಜ್ಜಿ, ತಾಯಿ,
ಸಹೋದರಿಯರನ್ನ :)

ಧನ್ಯವಾದಗಳು
ಸವಿತ ಎಸ್ ಆರ್

Our Newest & Cutest Little Angel :)

2010-12-29T08:20:00.000-08:00

Me & Bhargav are most excited to share ---> our Newest & Cutest little Angel - a baby girl has arrived to our lives on 20th Dec 2010 :)

Need your help in finding a beautiful name for her, few criterion :)

1. Should start with Va/Vu/Vo

2. Should be a common name in both Kannada & Telugu

3. Should have only 3 letters (when written in Kannada & Telugu)

4. Name should indicates anything which belongs to Nature

5. Should be Simple :)

My maternity vacation has started :) and am hoping to write down all the beautiful experiences i had in the journey of these past 9 months :)

-Savitha SR

ಮಹಾತ್ಮ ಗಾಂಧೀಜಿಯವರ ಮಾಹಿತಿಗಳು

2010-10-02T01:21:00.000-07:00

ಮಹಾತ್ಮ ಗಾಂಧೀಜಿಯವರ ಬಗ್ಗೆ ಹೆಚ್ಚಿನ ಮಾಹಿತಿಗಾಗಿ ಕೆಳಗಿನ ಲಿಂಕ್ ಚಿಟುಕಿಸಿ.
www.mkgandhi.org

ತಿಳಿದುಕೊಳ್ಳಲು ಸಾಕಷ್ಟು ವಿಚಾರಗಳು, ಅವರು ಮತ್ತು ಅವರ ಬಗ್ಗೆ ಬರೆದಿರುವ ಆನ್ಲೈನ್ ಪುಸ್ತಕಗಳು, ಉಪನ್ಯಾಸಗಳು, ಅವರ ನೆಚ್ಚಿನ ಭಜನೆಗಳು, ಫೋಟೋಗಳು ಮುಂತಾದ ಅನೇಕ ಉಪಯುಕ್ತ ಮಾಹಿತಿಗಳಿವೆ.
-ಸವಿತ

ಬದುಕು ಬದಲಿಸಬಹುದು!

2010-09-06T09:18:00.000-07:00

ನಾ ಹತ್ತನೇ ತರಗತಿ ಮುಗಿಸಿದ ನಂತರ ನನ್ನಣ್ಣ ಕೊಟ್ಟ ಪುಟಾಣಿ ಪುಸ್ತಕ "ಬೆಳಕಿನೊಂದು ಕಿರಣ ಮೇಡಂ ಕ್ಯೂರಿ". ವಿಜ್ಞಾನದ ಬಗ್ಗೆ ಬೆರಗು ಮೂಡಿಸಿ ಹೆಚ್ಚು ಕಲಿಯಲು ಪ್ರ‍ೇರೇಪಿದ ಬರವಣಿಗೆಯದು. ಬರೆದವರು ನೇಮಿ ಚಂದ್ರ. ಆ ಪುಸ್ತಕದ ಮೊದಲ ಪುಟದಲ್ಲಿ ಓದಿದ ಅರ್ಪಣೆಯ ಸಾಲುಗಳು ಈ ದಿನಕ್ಕೂ ನೆನಪಿವೆ...

"ಚೆನ್ನಾಗಿ ಓದಮ್ಮ, ರ‍್ಯಾಂಕ್ ಬರಬೇಕು. ಈ ಕಸ ಮುಸುರೆಯಲ್ಲೇನಿದೆ? ಎಂದು ಸದಾ ಹುರಿದುಂಬಿಸಿದ, ಬಯಲು ಸೀಮೆಯ ಹಳ್ಳಿಗಾಡಿನ ಅಪ್ಪಟ ಅನಕ್ಷರಸ್ಥೆ ನನ್ನಮ್ಮನಿಗೆ"

ಪುಸ್ತಕ ಮುಗಿಯೊದರೊಳಗೆ ನನ್ನ ಮುಂದಿನ ಓದಿನ ದಾರಿ ಕಾಣಿಸತೊಡಗಿತ್ತು. ಕೊನೆಯ ಪುಟದಲ್ಲಿ ಇದ್ದ ಲೇಖಕರ ಬಗ್ಗೆ ಓದುತ್ತಾ ಹೋದಂತೆ..ಅನ್ನಿಸತೊಡಗಿತ್ತು... ನೇಮಿ ಚಂದ್ರ...ಅಬ್ಬಾ!! ಹೆಣ್ಮಗಳೊಬ್ಬಳು ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಓದಬಹುದೇ....ನಾನೂ ಓದಬಾರದೇಕೆ ಅಂತ ಅವತ್ತೇ ಅನ್ನಿಸಿತ್ತು. ನಂತರ ನನ್ನ ಆಯ್ಕೆ ಕೂಡಾ ಅದೇ ಆಯ್ತು :)

ಅಂದಿನಿಂದ ಇಂದಿನವರೆಗೆ ಯಾವಾಗ ಲೈಫು ಡಲ್ ಅನಿಸಿದಾಗಲೆಲ್ಲಾ "ಬೆಳಕಿನೊಂದು ಕಿರಣ" ಪುಸ್ತಕ ಧೈರ್ಯ ತುಂಬಿ ಹೊಸ ಕನಸುಗಳನ್ನ ಕಾಣಲು ಸ್ಫೂರ್ತಿ ನೀಡುತ್ತಿದೆ.

ಮೊನ್ನೆ ಸಪ್ನ ಬುಕ್ ಸ್ಟಾಲಿಗೆ ಹೋದಾಗ ಹಾಗೇ ಕಣ್ಣಾಡಿಸುತ್ತಿರುವಾಗ ಕಂಡದ್ದು "ಬದುಕು ಬದಲಿಸಬಹುದು" - ನೇಮಿಚಂದ್ರ.. ಅರೆ ವಾವ್ ನನ್ನ ನೆಚ್ಚಿನ ಪುಸ್ತಕದ ಲೇಖಕರು...ಕೊನೆಯ ಪುಟದಲ್ಲಿ..ಮೊದಲ ಬಾರಿಗೆ..ಅವರ ಪೋಟೋ ನೋಡಿ ಸಕತ್ ಖುಷಿಯಾಯ್ತು. ಮನೆಗೆ ತಂದ ಪುಸ್ತಕ ಒಂದೆರಡು ದಿನ ಮನಃ ಪೂರ್ತಿಯಾಗಿ ಓದಿದೆ. : )

ಪ್ರತಿ ಪುಟಗಳಲ್ಲಿ ಅದೆಷ್ಟೊಂದು ಕಾನ್ಫಿಡೆನ್ಸ್ ತುಂಬಿದ ಬರಹಗಳು, ಕೆಲವು ಲೇಖನಗಳ ಶೀರ್ಷಿಕೆಗಳು ಹೀಗಿವೆ...

ಸಮಯವಿಲ್ಲವೆ ಹೇಳಿ
ಕನಸು ಕಾಣುವ ಬನ್ನಿ
ಸ್ನೇಹಕ್ಕೆ ಯಾವ ಸರಹದ್ದು
ಸೋಲಿಲ್ಲದ ಮನೆಯ ಸಾಸಿವೆ
ಜಗತ್ತು ಬದಲಾಗಬಹುದು
ಆಯ್ಕೆಯಿದೆ ನಮ್ಮ ಕೈಯಲ್ಲಿದೆ
ಬರೆದಿಡಿ....ಬರೆದಿಡಿ
ಆತ ಕೊಟ್ಟ ವಸ್ತು ಒಡವೆ, ನನಗೆ ಅವಗೆ ಗೊತ್ತು
ಮುಗಿಲು ಕೂಡ ಮಿತಿಯಿಲ್ಲ
ಬದುಕು...ನಿನ್ನಲ್ಲೆಂಥಾ ಮುನಿಸು
ಆದದ್ದೆಲ್ಲಾ ಒಳಿತು ಆಯಿತು
ಕತ್ತಲ ಹಾದಿಯಲ್ಲಿ ದೊಂದಿ ಹಿಡಿದು
ಕಾಸಿಲ್ಲದೆ ಕಲಿಸಿದ್ದು
ದುಡಿಯಬಲ್ಲೆವು ನಾವು
ಚಿಗುರಿಸಿ ಕನಸುಗಳನ್ನು
ಬದುಕು ಬರಿದಾಗದಿರಲಿ
.
.
.
.
.
ಇಷ್ಟು ಚೆಂದದ ಶೀರ್ಷಿಕೆಯ ಲೇಖನಗಳೊಂದಿಗೆ ಲೇಖಕಿಯವರು ನಮ್ಮ ದಿನ ನಿತ್ಯದ ಜೀವನವನ್ನ ಬೇರೆ ಪರಿಮಾಣದಲ್ಲೂ ನೋಡಬಹುದೆಂಬುದನ್ನ...ಕಲಿಸುವಿಕೆ ಪರಿ ಮಾತ್ರ... ತುಂಬಾ ತುಂಬಾ ಇಷ್ಟವಾಯ್ತು.
ನೀವೂ ಕೂಡ ಓದಿ, ಮೆಚ್ಚಿನ ಪುಸ್ತಕಗಳ ಸಾಲಿಗೆ ಈ ಪುಸ್ತಕದ ಹೆಸರು ಸೇರುವುದು ಖಂಡಿತ :)
ಧನ್ಯವಾದಗಳು
ಸವಿತ

Khalil Gibran on Marriage..togetherness..

2010-07-20T03:11:00.000-07:00

Yesterday's tea time topic in cafeteria was "Marriage..togetherness"
Felt like posting these beautiful & most favorite lines....from Khalil Gibran :)

Then Almitra spoke again and said, "And what of Marriage, master?"

And he answered saying:
You were born together, and together you shall be forevermore.
You shall be together when white wings of death scatter your days.
Aye, you shall be together even in the silent memory of God.
But let there be spaces in your togetherness,
And let the winds of the heavens dance between you.
Love one another but make not a bond of love:
Let it rather be a moving sea between the shores of your souls.
Fill each other's cup but drink not from one cup.
Give one another of your bread but eat not from the same loaf.
Sing & dance together & be joyous, but let each one of you be alone,
Even as the strings of a lute are alone though they quiver with the same music.
Give your hearts, but not into each other's keeping.
For only the hand of Life can contain your hearts.
And stand together, yet not too near together:
For the pillars of the temple stand apart,
And the oak tree and the cypress grow not in each other's shadow...

ದಿಬ್ಬಣ..ಮದುವೆ..ಸಂಭ್ರಮ!

2010-03-29T19:27:00.000-07:00

ಎಚ್ಚರವಾಗಿರ್ಬೇಕು!!

2010-03-15T08:47:00.000-07:00

ಹೊಸ ಜವಾಬ್ಧಾರಿಗಳು ಬಂದಾಗ ಬಹಳ ಎಚ್ಚರವಾಗಿರ್ಬೇಕು :)

ಸಮಯ ಬೆಳಗ್ಗೆ ಸುಮಾರು ಹನ್ನೊಂದೂವರೆ, ಆಫೀಸಲ್ಲಿ ಕಂಪ್ಯೂಟರ್ ಪರದೆಯ ಮೇಲೆ ದಿಟ್ಟಿಸಿ ನೋಡುತ್ತಾ ದೀರ್ಘಾಲೋಚನೆಯಲ್ಲಿ ತಲ್ಲೀನಳಾಗಿ ಕೆಲಸ ಮಾಡೋವಾಗ ಅದೊಂದು ಮಿಂಚಿನ ಕ್ಷಣ ಹಾಯ್ದು ಬಂತು...ತಟ್ಟನೆ ನೆನಪಾಯ್ತು...

"ಬೆಳಗ್ಗೆ ಮನೆಯಿಂದ ಬರೋವಾಗ ಉರಿಯುತ್ತಿದ್ದ ಗ್ಯಾಸ್ ಸ್ಟವ್ ಆಫ್ ಮಾಡಿದ್ನಾ ಇಲ್ವಾ ಅಂತ!?!!"

ಟೈಮ್ ನೋಡಿದೆ...ಹನ್ನೊಂದೂವರೆ, ನಾ ಮನೆ ಬಿಟ್ಟದ್ದು ಬೆಳಗ್ಗೆ ಎಂಟೂವರೆ..ಸರಿಯಾಗಿ ಮೂರು ಗಂಟೆಗಳು ಕಳೆದಿವೆ! ತಕ್ಷಣ ಒಂದೇ ಉಸಿರಿಗೆ ಪರ್ಸ್, ಮನೆ ಕೀ ತೆಗೆದವಳೇ ಓಡಿದೆ...ಪುಣ್ಯಕ್ಕೆ ಆಫೀಸ್ ಹೊರಗಡೆ ಆಟೋದವನಿದ್ದ, ಹತ್ತಿದವಳೇ...

"ಕೋರಮಂಗ್ಲ...ಸಿಕ್ಕಾಪಟ್ಟೇ ಎಮ್ಮರ್ಜೆನ್ಸಿ..."

ಅಂತ ನಾ ಹೇಳಿ ಹತ್ತಿದ ರಭಸಕ್ಕೆ ಆ ಆಟೋಡ್ರೈವರ್ರೂ ಕೂಡ ಎಮ್ಮರ್ಜ್ನೆನ್ಸಿ ಸೆನ್ಸ್ ನೊಂದಿಗೆ ಹೊರಟ...

"ಮುಂದೆ ರೆಡ್ ಸಿಗ್ನಲ್ ಇದೆ ಕ್ರಾಸ್ ಮಾಡ್ಲಾ ಮೇಡಮ್"

(ಹೇಗಿದ್ರೂ 3 ಗಂಟೆ ಕಳೆದಿವೆ ಇನ್ನು ಒಂದೆರಡು ನಿಮಿಷ ಮುಂಚೆ ಹೋಗಿ ನಾ ಇನ್ನೇನನ್ನೂ ಮಾಡೋಕಾಗಲ್ಲ!!)
"ಬೇಡ ಸಿಗ್ನಲ್ ಗ್ರ‍ೀನ್ ಆದ್ಮೇಲೆ ಹೋಗಿ" ಅಂತಂದೆ.
ಮನೇಲಿ ಏನು ಏನಾಗಿದೆಯೋ ಅಂತ ಹೆದರಿಕೆಯಿಂದ ಬೆವೆತು ಹೋಗಿದ್ದೆ!!
ಮೈಂಡ್ನಲ್ಲಿ ಅವೆಷ್ಟೋ ಆಲೋಚನೆಗಳು ಒಂಚೂರು ಗ್ಯಾಪ್ ಕೊಡದೆ ಓಡ್ತಾ ಇದ್ವು...

.......
ಊರಿಗೆ ಹೊರಟಿದ್ದ ನಮ್ಮಮ್ಮ ಬೆಳಗ್ಗೆಯೇ ಬೇಗ ಎದ್ದು ಸಾರು ಅನ್ನ ಎಲ್ಲವನ್ನ ಮಾಡ್ತಿದ್ರು.
ಸಾರಿನಲ್ಲಿ ತರಕಾರಿ ಇನ್ನೂ ಬೆಂದಿರದಿದ್ದರಿಂದ ಇನ್ನಷ್ಟು ಹೊತ್ತು ಕುದಿಸಿ ಸ್ಟವ್ ಆಫ್ ಮಾಡು...
ಆಫೀಸ್ಗೋಗೋ ಮುಂಚೆ ಸ್ಟವ್, ಗೀಸರ್ ಆಫ್ ಆಗಿದೆಯಾ, ಬೀಗ ಹಾಕಿದೆಯಾ ಒಮ್ಮೆ ನೋಡಿಕೊಂಡು ಹೋಗು ಅಂತ ಹೇಳಿ ಹೊರಟ್ರು.
ಅಮ್ಮ ಹೊರಟ ಸ್ವಲ್ಪ ಹೊತ್ತಿಗೆ ಬೀಗ ಹಾಕಿ ಮನೆ ಬಿಟ್ಟ ನನಗೆ ಅದ್ಯಾಕೋ ಅವರು ಹೇಳಿದ ಯಾವ ಕೆಲಸವೂ ನೆನಪಾಗಲಿಲ್ಲ.
ಮತ್ತೆ ನೆನಪಾಗಿದ್ದು ಹನ್ನೊಂದೂವರೆಗೆ!!
.
.
ಮೂರು ಗಂಟೆಗಳವರೆಗೆ ಸಾರಿನ ಪಾತ್ರೆ ಸ್ಟವ್ ಮೇಲೆ!!
ಏನಾಗಿದೆಯೋ...ಏನು ಕತೆಯೋ?! ಅಂತ ಹೆದರಿಕೆ ಸಿಕ್ಕಾಪಟ್ಟೆ ಕಾಡುತ್ತಿತ್ತು!!
ಬಾಡಿಗೆ ಮನೆ ಬೇರೆ! ಅಕ್ಕ ಪಕ್ಕ ಹೊಂದಿಕೊಂಡಂತೆ ಸಾಲು ಮನೆಗಳು...
ಫಯ್ರ್ ಎಂಜಿನ್ನವರಿಗೆ ಈಗಲೇ ಕಾಲ್ ಮಾಡ್ಲಾ ಇಲ್ಲ? ಮನೆಗೆ ಹೋದ ಮೇಲೆ ಮಾಡ್ಲಾ?
ಅಮ್ಮಂಗೆ ಫೋನ್ ಮಾಡ್ಲಾ ಬೇಡ್ವಾ?!
ಕೆಳಗಿನ ಮನೆಯವರಿಗೆ ಹೇಳುವಾ ಅಂದ್ರೆ ಮನೆ ಕೀ ಬೇರೆ ನನ್ನ ಬಳಿಯಿದೆ!
ಹೊರಗಿನ ಸುಡು ಬಿಸಿಲನ್ನ ಕಂಡು ಯಾವ ಪ್ರತಿಕ್ರಿಯೆಯೂ ಬರಲಿಲ್ಲ!
ಸಂಜೆ ಬೇರೆ ಟೆಲಿಕಾನ್ ಇದೆ! ಇನ್ನೂ ಮೇಲ್ ಕಳಿಸಿಲ್ಲ, ಕ್ಯಾನ್ಸಲ್ ಕೂಡಾ ಮಾಡ್ಲಿಲ್ಲ!
ಏನು ಮಾಡಲಿ...ಏನು ಬಿಡಲಿ!?!
.......

ಆಟೋ ನಮ್ಮನೆ ರೋಡಲ್ಲಿ ಬರೋವಾಗ ಗಮನವೆಲ್ಲಾ ಮನೆಯ ಸುತ್ತ ಮುತ್ತಲೇ...
ಜನಗಳೇನಾದ್ರೂ ಜಮಾಯಿಸಿದ್ದಾರಾ?! ಕಿಟಕಿಯ ಬಳಿ ಹೊಗೆ ಏನಾದ್ರೂ ಬರ್ತಿದೆಯೇ?!!
ಅಬ್ಬಾ ಅವ್ಯಾವೂ ಇರ್ಲಿಲ್ಲ!! ಆಟೋದನವನ್ನ ಮನೆ ಮುಂದೆಯೇ ಇರಲು ಹೇಳಿ.. ಮೆಟ್ಟಿಲು ಹತ್ತಿ ಬೀಗ ತೆಗೆದವಳೇ ಅಡುಗೆ ಮನೆಗೆ ಓಡಿದೆ...

ಸ್ಟವ್ ಆಫ್ ಆಗಿತ್ತು...!!!! ಬೆಳಗ್ಗೆ ನಾನೇ ಸ್ಟವ್ ಆಫ್ ಮಾಡಿದ್ದೆ!! :) :) :)

ಅದನ್ನ ಕಂಡು ಅಬ್ಬಾ!!! ಅದೆಷ್ಟು ನಿರಾಳವೆನಿಸಿತು!!!!!!!!! ಅಂದ್ರೆ ಆ ಅನುಭವವನ್ನ ಪದಗಳು ಹಿಡಿದಿಡಲಾರವು ಮತ್ತು ತಿಳಿಸಲಾರವು ಕೂಡ!!!
ಆ ಕ್ಷಣ ಏನು ಮಾಡಬೇಕಂತಾನೇ ತೋಚಲಿಲ್ಲ!!

ಒಂತರಾ ಬ್ಲಾಂಕ್!! : )

..............

ಆಮೇಲೆ ಬೀಗ ಹಾಕಿ ವಾಪಸ್ ಆಫೀಸಿಗೆ ಹೊರಟೆ, ಬರುವಾಗ ಅದೆಷ್ಟು ಗಾಬರಿಯೊಂದಿಗೆ ಬಂದೆ...ಹೋಗೋವಾಗ ನನ್ನ ಬಗ್ಗೆಯೇ ಅದೆಷ್ಟು ಸಿಲ್ಲಿಯೆನಿಸಿತು..ಆಟೋದವನಿಗೆ ಅದೇನು ಎಮ್ಮರ್ಜೆನ್ಸಿ ಅಂತ ಹೇಳುವ ಅಂತ ಅನಿಸಿತು... ಹೇಳಲಿಲ್ಲ...ಹೊರಗೆ ಅದೆಷ್ಟು ಬಿಸಿಲು ಇದೆ ಅಂತ ಈಗ ಅನ್ನಿಸ್ತಿತ್ತು.!! :)

...........

ಮನೆಗೆ ಸಂಜೆ ಬಂದು...ಹಾಲು ಕಾಯಿಸಲಿಟ್ಟಾಗ ಕಾಲ್ ಬಂತು...ಬೆಳಗ್ಗೆ ನಡೆದದ್ದನ್ನ ಒಂಚೂರೂ ಬಿಡದೆ ಎಕ್ಸ್ ಪ್ಲೇನ್ ಮಾಡ್ತಾ ಮಾಡ್ತಾ.....ಹಾಲು ಹುಕ್ಕಿ..ಹರಿದು ಪಾತ್ರೆ ಕರ್ರಗಾಗಿ...ಸೀದು ಹೊಗೆ ಬಂದಾಗ ನೆನಪಾಯ್ತು....

ಹಾಲು ಕಾಯಿಸಲಿಟ್ಟಿದ್ದೆ.....ಸ್ಟವ್ ಆಫ್ ಮಾಡಿಲ್ಲ ಅಂತ!! : )

ಈಗಲೇ ಹೀಗೆ ಇನ್ನು ಮುಂದಿನ ತಿಂಗಳಿಂದ ಹೇಗೋ ಕಾಣೆ!??!!!
ಅನ್ನಿಸ್ತಿದೆ ಹೊಸ ಜವಾಬ್ಧಾರಿಗಳು ಬಂದಾಗ ಬಹಳ ಎಚ್ಚರವಾಗಿರ್ಬೇಕು ಅಂತ! ಏನಂತೀರಾ : )

" ನಿಮಗೆಲ್ಲಾ ಯುಗಾದಿಹಬ್ಬದ ಶುಭಾಶಯಗಳು :) "

ಧನ್ಯವಾದಗಳು
ಸವಿತ

(ಚಿತ್ರ ಕೃಪೆ: ಸ್ವಂತದ್ದು)

Into the Wild

2010-02-26T22:54:00.000-08:00

ಹೀಗೇ ಇದ್ದಕ್ಕಿದ್ದಂತೆ ಇರುವ ಕೆಲಸಕ್ಕೆ ರಿಸೈನ್ ಮಾಡಿ....
ದುಡಿದ ಕೂಡಿಟ್ಟ ಹಣವನ್ನೆಲ್ಲಾ ಅನಾಥಾಶ್ರಮಕ್ಕೆ ಚೆಕ್ ಬರೆದು ಪೋಸ್ಟ್ ಮಾಡಿ....
ತನ್ನ ಇರುವಿಕೆಯನ್ನ ಸಾರುವ ಎಲ್ಲಾ ರೀತಿಯ ಐಡಿ ಕಾರ್ಡ್ಗಳನ್ನ ಕತ್ತರಿಸಿ ಬಿಸಾಡಿ...
ಬೇಕಾದ ಒಂದಷ್ಟು ಬಟ್ಟೆ ಪುಸ್ತಕಗಳನ್ನ ಬ್ಯಾಕ್ ಪ್ಯಾಕ್ನಲ್ಲಿ ತುಂಬಿಕೊಂಡು...
ಅಳಿದುಳಿದ ಹಣವನ್ನ ಬೆಂಕಿಗರ್ಪಿಸಿ...
ಕಾಡುವ ಸಂಬಂಧಗಳಿಗೊಂದು ಗುಡ್ಬೈ ಹೇಳಿ...
ಇರುವುದೆಲ್ಲವ ಬಿಟ್ಟು
ಇರದುದರೆಡೆಗೆ ಹೊರಟ ಸಾಹಸಿಗನ
ನೈಜ ಜೀವನದ ಅನುಭವಗಳೇ ಈ ಚೆಂದನೆಯ ಚಿತ್ರ...
"ಇನ್ ಟು ದ ವೈಲ್ಡ್" Into the Wild

ತೀರ ಇಷ್ಟವಾಗಿ ಪದೇ ಪದೇ ನೋಡಿದಂತೆಲ್ಲಾ

ಹಾಗೊಮ್ಮೆ ಬದುಕಿಬಿಡಬೇಕೆಂಬ ವಾಂಛೆ ಬಹಳ ಕಾಡುತ್ತಿದೆ...
-ಸವಿತ

ಮೆಚ್ಚಿನ ಕೆಲ ಸಾಲುಗಳು:

There is a pleasure in the pathless woods,

There is rapture on the lonely shore,

There is society where none intrudes,

By the deep Sea, and music in its roar:

I love not Man the less, but Nature more,
-Lord George Gordon Byron

Rather than love,than money,than faith,than fame,than fairness…give me truth.

The core of mans’ spirit comes from new experiences

When you forgive, you love. And when you love, God’s light shines upon you.

Conscious attention to the basics of life, and a constant attention to your immediate environment and its concerns, example- A job, a task, a book; anything requiring efficient concentration (Circumstance has no value. It is how one relates to a situation that has value. All true meaning resides in the personal relationship to a phenomenon, what it means to you)

I read somewhere… how important it is in life not necessarily to be strong… but to feel strong.

Some people feel like they don’t deserve love. They walk away quietly into empty spaces, trying to close the gaps of the past.

If we admit that human life can be ruled by reason, then all possibility of life is destroyed.

If you want something in life – reach out and grab it.

Mr. Franz I think careers are a 20th century invention and I don’t want one.

“Happiness is real when shared”

“The joy of life comes from our encounters with new experiences, and hence there is no greater joy than to have an endlessly changing horizon, for each day to have a new and different sun.”

“Two years he walks the earth.

No phone, no pool, no pets, no cigarettes. Ultimate freedom. An extremist. An aesthetic voyager whose home is the road. Escaped from Atlanta. Thou shall not return, ’cause “the West is the best.” And now after two rambling years comes the final and greatest adventure. The climactic battle to kill the false being within and victoriously conclude the spiritual pilgrimage. Ten days and nights of freight trains and hitchhiking bring him to the Great White North. No longer to be poisoned by civilization he flees, and walks alone upon the land to become lost in the wild.

— Alexander Supertramp,May 1992

(ಚಿತ್ರಕೃಪೆ:ಗೂಗಲ್ನಿಂದ)

ಅದು ಯಾರೋ?

2010-02-13T18:34:00.000-08:00

ಒಂದು ದಿನ..
    ಯಾರೋ..
    ದೂರ ನಿಂತು
    ಹತ್ತಿರಕ್ಕೆ ಒಂದು ಕ್ಷಣ ಬಂದು
    ಪಿಸು ಮಾತಿನಲ್ಲಿ
    ಹೇಳಿಬಿಡುತ್ತಾರೆ,
    ಜೀವನವಿಡೀ ಕೇಳಬೇಕೆಂದು
    ಬಯಸಿ ಕಾದಿದ್ದ
    ಆ ಮಾತು!

    ಆ ಯಾರೋ
    ಮತ್ತು
    ಆ ಮಾತು
    ಬದುಕಿನಲ್ಲಿ ಯಾವಾಗಲೂ
    ನೆನಪಿಡುವ ಘಟನೆಯಾಗಿ
    ಉಳಿದುಬಿಡುತ್ತವೆ. :)

    ನೀವು ಕಾದಿದ್ದೀರಾ?
    ಅದು ಯಾರೋ?

    -ಸವಿತ

ಕನಸುಗಳು

2010-01-24T05:00:00.000-08:00

ಈ ವಾರಾಂತ್ಯದಲ್ಲಿ ಬಿಡಿಸಿದ ಚಿತ್ರ : )
-ಸವಿತ

ಹಲೋ ಹಲೋ ಚಂದಮಾಮ

2010-01-02T23:51:00.000-08:00

ಎಲ್ರಿಗೂ ಹೊಸ ವರ್ಷದ ಶುಭಾಶಯಗಳು :)

ಛಂದ ಪುಸ್ತಕ ಮುಖಪುಟ ಸ್ಪರ್ಧೆಗೆ ನಾ ರಚಿಸಿದ ‘ಹಲೋ ಹಲೋ ಚಂದಮಾಮ’ ಮುಖಪುಟ :) ನಿಮಗೆ ಇಷ್ಟವಾಯ್ತಾ?! ತಿಳಿಸಿ :)

ಧನ್ಯವಾದಗಳು
-ಸವಿತ
(ಪೂರ್ಣ ಆವೃತ್ತಿಗೆ ಚಿತ್ರದ ಮೇಲೆ ಕ್ಲಿಕ್ ಮಾಡಿ)

ಕಲಾ ದಿನ...

2009-12-26T09:48:00.000-08:00

ದಿನ ನಿತ್ಯ ಮಾಡೋ ಕೆಲಸಗಳ ಹೊರತಾಗಿ ಆಗೀಗೊಮ್ಮೆ ಮಾಡುವ ಹೊಸ ರೀತಿಯ ಚಟುವಟಿಕೆಗಳು ಹೊಸತನ ತರುವುದರೊಂದಿಗೆ ನಮ್ಮನ್ನ ಕ್ರಿಯಾಶೀಲರನ್ನಾಗಿಸುತ್ತವೆ. ಸ್ಟ್ಯಾಗ್ನೆಂಟ್ ಅನಿಸುವಿಕೆ ಕಡಿಮೆಯಾಗುತ್ತೆ. ನನಗೆ ಈವತ್ತೊಂದು ಸಖತ್ ದಿನವಾಗಿತ್ತು.

ಮುಂದಿನ ತಿಂಗಳ ಚಿತ್ರ ಸಂತೆಯಲ್ಲಿ ನಾನು ಮತ್ತು ಪಾಲ ಭಾಗವಹಿಸಲು ತುಂಬಿದ ಅಪ್ಲಿಕೇಶನ್ನ ಚಿತ್ರ ಕಲಾ ಪರಿಷತ್ನಲ್ಲಿ ಕೊಟ್ಟು, ಅರಮನೆ ರಸ್ತೆ ಮೂಲಕ ಹಿಂತಿರುಗುತ್ತಿರುವಾಗ ಬಸ್ ಕಿಟಕಿಯಿಂದ ಕಂಡ "ರಾಷ್ಟ್ರೀಯ ಆಧುನಿಕ ಕಲಾ ಸಂಗ್ರಹಾಲಯದ (National Gallery of Modern Art)" ಹೊರಗಿನ ಚಿತ್ರಗಳು ಹಾಗೇ ಸೆಳೆದವು.ಅಲ್ಲೇ ಸ್ಟಾಪ್ ಕೊಟ್ಟಿದ್ದರಿಂದ ಮರು ಆಲೋಚಿಸದೆ ಬಸ್ಸಿಂದ ಕೆಳಗಿಳಿದು ಹೊರಟೆ. :)

ಪ್ರವೇಶ ದರ ೧೦ ರೂ. ಕ್ಯಾಮೆರಾದಿಂದ ಪೋಟೋ ತೆಗೆಯುವಂತಿಲ್ಲ ಕಣ್ಗಳ ಮೂಲಕ ತೆಗೆಯಬಹುದಷ್ಟೇ!!

ಒಳ ಹೋದಂತೆ ವಾವ್! ಕೋಣೆಯೊಳಗಿನ್ನೊಂದು ಮತ್ತೊಂದು ಮಗದೊಂದು ಕೋಣೆಗಳು!! ಪ್ರತಿ ಕೋಣೆಯೊಳಗೂ ಬೆರಗುಗೊಳಿಸುವ ರೇಖಾ,ಜಲ,ಆಯಿಲ್ ವರ್ಣ ಚಿತ್ರಗಳು!! ೧೮೫೦ ರಿಂದ ಈಗಿನವರೆಗಿನ ಹಲವಾರು ಕಲಾವಿದರ ಚಿತ್ರಗಳು. ಮೈಸೂರು ಶೈಲಿಯಿಂದ ಮಾಡ್ರನ್ ಆರ್ಟ್ವರೆಗೆ ಲೆಕ್ಕವಿರಿಸಲಾಗದಷ್ಟು ಕಲಾಕೃತಿಗಳು!! ನನಗಿಷ್ಟವಾದ ಕಲಾಕೃತಿಗಳ ಮತ್ತು ಕಲಾವಿದರ ಹೆಸರುಗಳನ್ನ ಟಿಕೇಟ್ ಹಿಂದೆ ಗೀಚಿಕೋಳ್ಳುತ್ತಾ ಹೋದೆ.:)

ರವೀಂದ್ರನಾಥ್ ಟ್ಯಾಗೋರ್,
ಅರಬಿಂದ ನಾಥ್ ಟ್ಯಾಗೋರ್,
ರಾಜಾ ರವಿವರ್ಮ,
ಶಾರ್ದಾ ಯುಕಿಲ್ ರ Chaitanya,
ಮಹದೇವನ್ ಮೆನನ್ ರ Cow Heards & Bamboo Grooves
ಎಮ್.ಎ.ಆರ್ ರ Omar Khayyam,
ಹೇಮ ಉಪಾಧ್ಯಾಯರ The Red End,
ಖೇಮ್ರಾಜ್ ರ Une Vie,
ಜಗದೀಶ್ ಚಂದರ್ ರವರ After Image II
ಸೋಹನ್ ಕದ್ರಿಯವರ Invocation,
ನಂದಲಾಲ್ ಬೋಸ್ ರ Chandilka,
ಅಮ್ರಿತಾ ಷೇರ್ಗಿಲ್ ರವರ Village Girl,
ಜಾಮಿನಿ ರಾಯ್ ರವರ Bengali Woman,
ಕೃಷ್ನಮಾಚಾರಿ,
ಹರ್ಶ,
ಮುಖುಲ್ ದೇ,
.
.
.
.
.
.
ಎಣಿಸಲಾರದಷ್ಟು ಚಿತ್ರಗಳು!!! ಚೆಂದದ ಅನುಭವ

ಜೊತೆಗೆ ಸತ್ಯಜಿತ್ ರೇ ರವರ "ಸಿನೆಮಾ ಮೇಕಿಂಗ್" ಬದುಕಿನ ಹಲವಾರು ಪೋಟೋಗಳನ್ನ ನೋಡುವ ಅವಕಾಶ ಸಿಕ್ಕಿದ್ದು ಸಕತ್ ಖುಷಿಯಾಯ್ತು!!.ಸತ್ಯಜಿತ್ ರೇ ಬಗ್ಗೆ ಹೆಚ್ಚು ಗೊತ್ತಿರದಿದ್ದರೂ ಆ ಪೋಟೋಗಳಲ್ಲಿ ಅವರ ಮುಖದಲ್ಲಿ ಎದ್ದು ಕಾಣುವ "ಪ್ರತಿ ಕ್ಷಣವನ್ನೂ ಬಿಡದೆ ಬದುಕಿದ ತೀಕ್ಷ್ಣತೆ ಮತ್ತು ಆ ಪ್ಯಾಶನ್, ಮಾಡುವ ಕೆಲಸದಲ್ಲಿನ ಪರ್ಫೆಕ್ಟಿಸಮ್" ಹೆಚ್ಚು ಹಿಡಿಸಿತು. ಜೊತೆಗೆ ಅವರ ಸಿನೆಮಾಗಳನ್ನ ನೋಡುವ ಕುತೂಹಲವನ್ನೂ ಹುಟ್ಟಿಸಿದೆ.

ಈ ಆರ್ಟ್ ಗ್ಯಾಲರಿಯನ್ನ ಹಾಗೇ ಒಮ್ಮೆ ನೋಡಲು ಮಿನಿಮಮ್ ಅರ್ಧ ದಿನ, ವಿವರವಾಗಿ ನೋಡಲು ಒಂದು ದಿನ ಪೂರ್ತಿಯಾಗಿ ಬೇಕು. :) ನೀವು ನೋಡಲು ಮಾತ್ರ ಮಿಸ್ ಮಾಡಬೇಡಿ.

------------------------------------------------

ನಂತರ ಚರ್ಚ್ ಸ್ಟೀಟ್ನಲ್ಲಿನಲ್ಲಿನ ಪುಸ್ತಕದಂಗಡಿಗಳಲ್ಲಿ ಸುತ್ತಾಡಿ, ಹೈದರಾಬಾದ್ ಬಿರಿಯಾನಿ ಸವಿ ನೋಡಿ, ನಾಲ್ಕರ ಹೊತ್ತಿಗೆ ಮಿಡ್ಫ಼ೋರ್ಡ್ ರೋಡ್ ಕಡೆ ಪಯಣ.

ಈವತ್ತು ಜನಾರ್ಧನ ಸ್ವಾಮಿಯವರ (ಜೆ.ಸ್ವಾಮಿಯೆಂದು ಹೆಚ್ಚು ಪರಿಚಿತ) "ವ್ಯಂಗ್ಯ ಚಿತ್ರಗಳ" ಪ್ರದರ್ಶನ "Indian Institute of Cartoonists" ನಲ್ಲಿತ್ತು. ಬೆಳಗಿನ ಕಾರ್ಯಕ್ರಮಗಳೆಲ್ಲಾ ಬೆಳಗ್ಗೆಯೇ ಮುಗಿದಿದ್ದವು, ಲೇಟಾಗಿ ಹೋದದ್ದರಿಂದ ಆರಾಮಾಗಿ ನೋಡಿಕೊಂಡು ಬರಲಾಯ್ತು.ಬೆಳಗಿನ ಕಾರ್ಯಕ್ರಮದ ಕೆಲ ಪೋಟೋಗಳನ್ನ ನೋಡಲಿಕ್ಕೆ ಸಿಕ್ತು.

ಅವರು ಕಾಲೇಜಿನ ಸಮಯದಿಂದ ಈಗಿನವರೆಗೆ ರಚಿಸಿದ ಚೆಂದದ ವ್ಯಂಗ್ಯ ಚಿತ್ರಗಳು ಇಲ್ಲಿವೆ

ಹಾಗೇ ಅಚಾನಕ್ಕಾಗಿ ಮತ್ತೊಂದು ಫೋಟೋದಲ್ಲಿದವರೊಬ್ಬರನ್ನ ಗುರುತಿಸಿದಾಗ ಸಖತ್ ಷಾಕ್!! ಜೊತೆಗೆ ಸಖತ್ ಸಂತಸವಾಯ್ತು!! :)

ಸಂಜೆ ಮನೆಗೆ ವಾಪಸ್ ಬರುವಾಗ ಕ್ಲಿಕ್ಕಿಸಿದೊಂದು ಚಿತ್ರ :)

ನನಗೆ ಈವತ್ತು ಒಂಥರಾ ಕಂಪ್ಲೀಟ್ "ಕಲಾ ದಿನ" ವಾಗಿತ್ತು. :)
ನಿಮ್ಮ ದಿನ ಹೇಗಿತ್ತು?! ತಿಳಿಸಿ :)

ಧನ್ಯವಾದಗಳು
ಸವಿತ :)

ರೈಲು ಪ್ರಯಾಣ ಬರೀ 5,000 ಕಿ.ಮೀ....!!

2009-12-12T04:54:00.000-08:00

ಮೊನ್ನೆ ನನ್ನ ದೊಡ್ಡಮ್ಮನ ಊರಿಗೆ ಹೋಗೋ ತಯಾರಿಯಲ್ಲಿದ್ದೆ..ಯಾವಾಗಲು ಬಸ್ಸಿನಲ್ಲೇ ಹೋಗೋ ನಾನು ಈ ಸಲ ರೈಲಿನಲ್ಲಿ ಹೋಗೋದು ಅಂತ ಡಿಸೈಡ್ ಮಾಡ್ದೆ..ಇಂತಾ ಚಿಕ್ಕ ವಿಚಾರದಲ್ಲಿ ಡಿಸೈಡ್ ಮಾಡೋದೇನಿದೆ ಅಂತೀರಾ!! ಇದೆ ಇಲ್ದೆ ಏನು?!!ಹಾಗೆ ವಿಚಾರ ಮಾಡಿದಾಗ... ನನಗೆ ನೆನಪಿರೋವಾಗಿಂದ ಈಗಿನವರೆಗೂ ಎಷ್ಟು ಪ್ರಯಾಣ ಮಾಡಿದ್ದೇನೆ ಅಂತ ಒಂದು ಅಂದಾಜು ಲೆಕ್ಕ ಹಾಕಿದೆ. ಅದರಲ್ಲಿ ಬಸ್ಸು, ವಿಮಾನ, ರೈಲಿನ ಅಂಕಿ ಅಂಶಗಳನ್ನ ಪಟ್ಟಿ ಮಾಡಿ ನೋಡಿದಾಗ...ನನಗೇ ಅಚ್ಚರಿಯೆನಿಸ್ತು..!!!

ಬಸ್ಸು - ಸುಮಾರು 80,000 ಕಿ.ಮೀ.ಗಳು,
ವಿಮಾನ - ಸುಮಾರು ಬಸ್ಸಿನ ಅರ್ದದಷ್ಟು ಕಿ.ಮೀ.ಗಳು
ರೈಲು - ಬರೀ 5,000 ಕಿ.ಮೀ.ಗಳಷ್ಟು!!?? ಅದರಲ್ಲೂ ನಮ್ಮದೇಶದಲ್ಲಿ ಒಂದು 3,000 ಕಿ.ಮೀಗಳಿರಬಹುದೇನೊ ಅಷ್ಟೆ...
ಬರೀ 3,000 ಕಿ.ಮೀ!!! ಅದ್ಯಾಕೋ ನನಗೆ ಒಂಥರಾ ಗಿಲ್ಟಿ ಫೀಲಾಯ್ತು...:( ಜೊತೆಗೆ ನಮ್ಮಮ್ಮ.."ಬಸ್ಸಿನಲ್ಲಿ ಬಹಳ ಓಡಾಡೋದು ಒಳ್ಳೇದಲ್ಲ"..ಸ್ವಿಚ್ ಓವರ್ ಟು ರೈಲು ಅಂತ :)

ಸರಿ ಇವೆಲ್ಲಾ ವಿಚಾರಗಳನ್ನ ನೆನಪಿನಲ್ಲಿಟ್ಟುಕೊಂಡು ಬೆಳಗ್ಗೆನೆ ಮೆಜಸ್ಟಿಕ್ ರೈಲ್ವೆ ಸ್ಟೇಷನ್ ಟಿಕೆಟ್ ಕೌಂಟರ್ನಲ್ಲಿ ಟಿಕೆಟ್ ತಗೊಂಡು..8 ಗಂಟೆಯ ಹುಬ್ಬಳ್ಳಿ ಪ್ಯಾಸೆಂಜರ್ ಟ್ರೈನ್ ಎಷ್ಟನೇ ಫ್ಲಾಟ್ ಫಾರಂ? ಅಂದಾಗ
...ಬಲಗಡೆ ಕೆಳಗೆ subway ಯಿಂದ ಹೋಗಿ ಅಂತ ಕೌಂಟರಿನೊಳಗಿಂದ ಹೆಣ್ಣುಮಗಳ ಉತ್ತರ ಬಂತು.
ಅಬ್ಬ ಅದೇನು subway ಅಂತೀರಾ!! : ( ವರ್ಣಿಸೋಕಾಗೋಲ್ಲ.!!

ಆಗ್ಲೇ ಒಂದು ರೈಲು ಬಂದು ನಿಂತಿತ್ತು..ಟೀ ಅಂಗಡಿಯವಂಗೆ ಕೇಳಿ ಕನ್ಫರ್ಮ್ ಮಾಡಿಕೊಂಡೆ. ಅಲ್ಲಿದ್ದ ಪ್ರಯಾಣಿಕರೆಲ್ಲಾ ರೈಲ್ವೆ ಬೋಗಿಯ ಬಾಗಿಲ ಬಳಿ ಮುಗಿಬಿದ್ದಿದ್ದರು...ಆದ್ರೆ ಬಾಗಿಲು ಇನ್ನು ತೆಗೆದಿರಲ್ಲಿಲ್ಲ!! ಅದ್ಯಾರೋ ಆಸಾಮಿ ತುರ್ತು ನಿಗಮದ ಕಿಟಕಿ ತೆರೆದು ಒಳಗೆ ತೂರಿ ಬಾಗಿಲು ತೆಗೆದೇ ಬಿಟ್ಟ...ನಾನು ಟೈಮ್ ಮತ್ತು ಜನರ ಗುಂಪನ್ನ ಒಮ್ಮೆ ನೋಡಿದೆ...ಇನ್ನು 7.35 ಆರಾಮಾಗಿ ಕುಳಿತರೂ ಅರ್ಧ ಕಂಪಾರ್ಟ್ಮಮೆಂಟ್ ತುಂಬೊವಷ್ಟು ಜನ...ಆಗ್ಲೇ ಜನರು ಕಿಟಕಿ ಬಳಿ ಹೋಗಿ ಟವೆಲ್/ಕರ್ಚಿಪ್ ಹಾಕ್ತಿದ್ರು.. ಜನ ಮರುಳೋ ಜಾತ್ರೆ ಮರುಳೋ ಗೊತ್ತಾಗ್ಲಿಲ್ಲ :D ನಾನು ಕಿಟಕಿ ಹತ್ತಿರದ ಒಂದು ಸೀಟಲ್ಲಿ ಕುಳಿತೆ...ಮೂರ್ನೆ ಬಾರಿಯ ಪ್ಯಾಸೆಂಜರ್ ಟ್ರೈನ್ ಅನುಭವ...ಬಹಳ ಹುಮ್ಮಸ್ಸಿತ್ತು..ಜನ ಬರ್ತಾ ಇದ್ರೂ ಹೋಗ್ತಾ ಇದ್ರೂ...8 ಗಂಟೆಗೆ ರೈಲು ಹೊರಟಿತು...

ಊರು ಬಿಟ್ಟಂತೆಲ್ಲಾ...ಕಿಟಕಿ ಹೊರಗೆ ಹಸಿರು ಹೊಲ ಗದ್ದೆ ತೋಟಗಳು ಶುರುವಾಯ್ತು...ಒಳಗೆ ಜಾಹೀರಾತುಗಳು!!
ಹೌದು...ಜಾಹೀರಾತುಗಳು ಟೀವೀಲಲ್ಲ...ಕಂಪಾರ್ಟ್ಮಮೆಂಟ್ ಒಳಗೆ!! :)
ಮೊದಲು ನ್ಯೂಸ್ ಪೇಪರ್ನವ,
ನಂತರ ಮಲ್ಲಿಗೆ ಇಡ್ಲಿಯವ,
ಕಾಫಿ ಟೀಯವ,
ಬಂಗಾರದ ಬಣ್ಣದ ಸರ ಮಾರುವವ,
ಟಾರ್ಚ್ ಇರೋ ಕೀಚೈನ್ ಮಾರುವವ,
ಹತ್ತಕ್ಕೆ ಮೂರು ಪೆನ್ನು ಮಾರುವವ,
ಬಿಡಿ ಮಲ್ಲಿಗೆ, ಕನಕಾಂಬರ ಮಾರೋ ಹೂವಾಡಗಿತ್ತಿ,
ಬಾಟಲಿ ನೀರಿನವ,
ಕತ್ತರಿಸಿದ ಸೌತೆ ಕಾಯಿ ಮಾರುವವ,
ಕಂಕುಳಲ್ಲಿ ಕೂಸನ್ನಿಟ್ಟ್ಕೊಂಡು "ನಮ್ಮ ಮನೆಯಲಿ ದಿನವೂ ದಿನವೂ ಚೈತ್ರವೇ" ಹಾಡೇಳಿದ ಹೆಣ್ಮಗಳು,
ಬಾದಾಮಿ ಹಾಲಿನವ,
ದೋಸೆ ಚಿತ್ರಾನ್ನದವ,
ಬಿಸ್ಕತ್ತು,ಪೆಪ್ಸಿಯವ,
ರೈಲಿನ ನೆಲ ಒರೆಸಿ ಚಿಲ್ಲರೆ ಕೇಳೋ ಚಿಕ್ಕ ಹುಡುಗ,
ಬಿಸಿ ಬಿಸಿ ಕಡಲೆ ಪೂರಿಯವ,
ಲೇಸ್,ಕುರ್ಕುರೆಯವ,
ಹುರಿದ/ಬೇಯಿಸಿದ ಸೇಂಗಾ ಮಾರೋ ಅಜ್ಜಿ,
ಕಣ್ಣು ಕಾಣಿಸದವ..
ಟಿಕೆಟ್ ಚೆಕ್ ಮಾಡುವವ,
...........................................
ಹೀಗೆ ನೆನಪಿಡಲಾರದಷ್ಟು ಜನಗಳು...ಜಾಹೀರಾತುಗಳು,ವ್ಯಾಪಾರಗಳು,ದಾನ ಧರ್ಮಗಳು....!!!
ನನಗಂತೂ ನೋಡಿ ನೋಡಿ ಕಣ್ಣುಗಳು ಭಾರವೆನಿಸತೊಡಗಿದವು..ನಿದ್ದೆಗೆ ಜಾರೋ ಮುನ್ನ ಒಂದಷ್ಟು ಫೋಟೋ ಕ್ಲಿಕ್ಕಿಸಿದ್ದಾಯ್ತು.

ಕೊನೆಗೆ ನಮ್ಮ ಟ್ರೈನ್ ನಿಂತಾಗ ಪಕ್ಕದಲ್ಲೇ ಮತ್ತೊಂದು ಟ್ರೈನ್ ಹೋಯಿತು... ಆ ಕ್ಷಣ ಭೌತ ಶಾಸ್ತ್ರದ ಚಲನೆಯ ನಿಯಮಗಳ ನೆನಪಾಯ್ತು...!ಓಡುತ್ತಿದ್ದ ಆ ರೈಲಿನ ಕಿಟಕಿ ಬಳಿ ಕುಳಿತ ಜನರು..ಅವರ ಹಾವ ಭಾವಗಳು...ಸರ್ರನೆ ಸಿನೆಮಾ ರೀಲೊಂದನ್ನ ಓಡಿಸಿ ತೋರಿಸಿದಂತಿತ್ತು :)

ಯಾಕೋ ನನ್ನ ರೈಲು ಪ್ರಯಾಣದ ಅಂಕಿ ಅಂಶಗಳು ಹೆಚ್ಚಾಗೋದು ಕಷ್ಟವೆನಿಸುತ್ತಿದೆ...!! :(
ಅದಿರ್ಲಿ ನಿಮ್ಮ ಪ್ರಯಾಣದ ಅಂಕಿ ಅಂಶಗಳನ್ನ ಲೆಕ್ಕ ಹಾಕಿದ್ದೀರಾ?!! :)
-ಸವಿತ

ನೀರವತೆ!

2009-11-29T05:39:00.000-08:00

ಇದೇನು ಕಕ್ಕುಲತೆಯೋ ಕಾಣೆ!!
ಇರೆಂದೊಡನಿರದೆ...
ಬಿಡದೆ ತಿರು ತಿರುಗಿ ಬಂದು
ಮನಸಿನುಲ್ಲಾಸಗಳ
ಹುಚ್ಚೆದ್ದು ಕುಣಿಸಿ
ರಮಿಸಿ ವಿರಮಿಸಿ
ಶಾಂತವೆನುತಿರುವಾಗ
ಮತ್ತದೇ ನೀರವತೆ!

ಮನದ ದುಗುಡವನೆಲ್ಲ
ಕಿತ್ತೊಗೆದು
ಅಣಿಯಾದಂತೆಲ್ಲ...
ತಿರುತಿರುಗಿ ಕಾಡುವಾ...
ನೀರವತೆ!

-ಸವಿತ

ಸಿಕ್ಸ್ತ್ ಸೆನ್ಸ್ ಮಿಸ್ಟ್ರಿ ಮ್ಯಾನ್ - ಪ್ರಣವ್ ಮಿಸ್ಟ್ರಿ

2009-11-26T10:19:00.000-08:00

ನಾವು ಜೀವಿಸುತ್ತಿರೋ ನೈಜ ಜಗತ್ತು ಮತ್ತು ಕಂಪ್ಯೂಟರಿನ ಒಳ ಜಗತ್ತು ಭೌತಿಕ ನೆಲೆಯಲ್ಲಿ ಬೇರೆ ಬೇರೆಯೇ ಸರಿ.

ಏ ಬಾ.. ಇಲ್ಲಿ ಎಂದು ಕೈ ಸನ್ನೆ ಮಾಡಿ ಕೂಗಿದರೆ.. ಎದುರಿಗಿದ್ದವರು ನಮ್ಮ ಬಳಿ ಬರೋ ರೀತಿಯಲ್ಲಿ....ಕೀಲಿಮಣೆ ಬಳಸದೇ ಬರೀ ಅಂಗಸನ್ನೆಗಳ ಮೂಲಕ ಕಂಪ್ಯೂಟರ್ಗೆ ಸನ್ನೆ ಮಾಡಿ ಏನಾದ್ರು ಹೇಳಿದ್ರೆ ಊಹಿಸಿಕೊಳ್ಳಿ!! ಅದು ಅರ್ಥಮಾಡಿಕೊಳ್ಳುತ್ತಾ?? ಇಲ್ವಾ!!
ಇದೆಂತಹ ಸಿಲ್ಲಿ ಪ್ರಶ್ನೆ ಅಂತೀರಾ?!!ಮುಂದೆ ಓದಿ..

ನೀವು ಕಾಗದದ ಮೇಲೆ ಬರೆದಂತೆಲ್ಲಾ..ಆ ಸಾಲುಗಳು ನೇರವಾಗಿ ನಿಮ್ಮ ಮೊಬೈಲ್ನಲ್ಲಿ ಮೆಸೇಜಾಗಿ ಬಂದರೆ!

ಹಾಗೇ ಚಿಕ್ಕಂದಿನಲ್ಲಿ ನಮ್ಮ ಪುಟಾಣಿ ಕೈಗಳನ್ನ ಕಣ್ ಸುತ್ತ ಹಿಡಿದು ಕಂಡ ಅಚ್ಚರಿಯ ದೃಶ್ಯಗಳನ್ನ ಸೆರೆ ಹಿಡಿದು "ಕ್ಲಿಕ್" ಎಂದು ಬಾಯಲ್ಲಿ ಹೇಳಿ ಅದನ್ನ ಮನಸ್ಸಿನ ಮೂಲೆಯಲ್ಲಿ ಸೇವ್ ಮಾಡುವ ರೀತಿ, ಈಗಲೂ ಕೂಡ ಖಾಲಿ ಕೈಗಳಲ್ಲಿ ಕ್ಲಿಕ್ ಮಾಡಿದಾಗ ನಿಜವಾದ ಡಿಜಿಟಲ್ ಫೊಟೊ ಬಂದರೆ ಹೇಗಿರತ್ತೆ?!!

ಹುಡುಕು ಪದ ಟೈಪಿಸದೆ! ಗೂಗಲ್ ಮ್ಯಾಪ್ನಲ್ಲಿ ನಮಗೆ ಬೇಕಾದ ವಿಚಾರವನ್ನ ಹುಡುಕುವಂತಿದ್ದರೆ.. ಉದಾ: ಮ್ಯಾಪ್ ಮೇಲೆ ಕಾಫಿ ಕಪ್ ಇಟ್ಟರೆ ಕಾಫಿ ಶಾಪ್ ಎಲ್ಲಿವೆ, ಎಟಿಎಂ ಕಾರ್ಡ್ ಇಟ್ಟರೆ ಎಟಿಎಂ ಸೆಂಟರ್ ಎಲ್ಲಿವೆ ಎಂದು ತೋರಿಸುವಂತಿದ್ದರೆ!!

ಕಾಗದದ ನ್ಯೂಸ್ ಪೇಪರಿನಲ್ಲಿ ಲೈವ್ ನ್ಯೂಸ್ ವೀಡಿಯೋ ನೋಡುವಂತಿದ್ದರೆ!!

ಕೈಲಿ ಹಿಡಿದ ಬಿಳಿ ಕಾಗದದಲ್ಲಿ ಸಿನೆಮಾ ನೋಡುವಂತಿದ್ದರೆ,ಕಾರ್ ರೇಸಿಂಗ್ ಗೇಮ್ ಆಡುವಂತಿದ್ದರೆ!!
.
.
ಇವೆಲ್ಲಾ ಬರೀ ಸಿನೆಮಾಗಳಲ್ಲಿ ನೋಡಬಹುದು ಅಂತೀರಾ? ಇಲ್ಲ ಈಗ ಇವೆಲ್ಲ ನಿಜವಾಗುವ ದಿನಗಳು ದೂರಿಲ್ಲ...
ಹೀಗೇ ಕೀಲಿಮಣೆಯಿಲ್ಲದೆಯೆ...ಕಂಪ್ಯೂಟಿಂಗ್ ಡಿವೈಸ್ ಸಹಾಯದಿಂದ...ಬರೀ ಕೈಬೆರಳುಗಳ ಮೂಲಕ ನಾವು ಡಿಜಿಟಲ್ ಪ್ರಪಂಚದ ಒಳ ಹೋಗುವುದಕ್ಕೆ ಅವೆಷ್ಟೊಂದು ರೀತಿಯ ಸಾಧನಗಳನ್ನ... ಕಳೆದ 8 ವರ್ಷಗಳ ತಮ್ಮ ಸಂಶೋಧನೆಗಳಿಂದ ಸಾಕಾರ ಮಾಡಿ "ಸಿಕ್ಸ್ತ್ ಸೆನ್ಸ್ ಡಿವೈಸ್" ತಯ್ಯಾರು ಮಾಡಿರುವ ಮಿಸ್ಟ್ರಿ ಮ್ಯಾನ್ - ಪ್ರಣವ್ ಮಿಸ್ಟ್ರಿ.

ಈ ನವೆಂಬರ್ ಶುರುವಿನಲ್ಲಿ ಮೈಸೂರಿನಲ್ಲಿ ನಡೆದ ಇಂಡಿಯಾ TED ಸಮ್ಮೇಳನದಲ್ಲಿ ಪ್ರಣವ್ ಮಿಸ್ಟ್ರಿ ಕೊಟ್ಟ ಟಾಕಿನ ವೀಡಿಯೋ ಇಲ್ಲಿದೆ ನೋಡಿ. ಸಕತ್ ಕುತೂಹಲಕಾರಿಯಾಗಿದೆ!! :)

MIT Media Labನಲ್ಲಿ PhD ಮಾಡುತ್ತಿರುವ ಪ್ರಣವ್ ಮಿಸ್ಟ್ರಿ ಗುಜರಾತಿನ ’ಪಾಲನ್ಪುರ್’ನವರು. ಹಾಗೇ ಇಷ್ಟೊಂದು ಅಚ್ಚರಿ ಮೂಡಿಸಿರುವ ಈ "ಸಿಕ್ಸ್ತ್ ಸೆನ್ಸ್ ಡಿವೈಸ್ನ" ಹಿಂದಿರುವ ತಂತ್ರಾಂಶವನ್ನ ಓಪನ್ ಸೋರ್ಸ್ ಮಾಡುವರೆಂದು ಕೂಡ ಹೇಳಿದ್ದಾರೆ!!! :)

TED-Ideas Worth Spreading ಬಗ್ಗೆ ಹೆಚ್ಚಿನ ವಿವರಗಳಿಗೆ ಇಲ್ಲಿ ನೋಡಿ.

ಧನ್ಯವಾದಗಳು
-ಸವಿತ

ಫ್ಲೈಯಿಂಗ್ ಸಾಸರ್

2009-11-16T09:04:00.000-08:00

ಯು.ಎಫ್.ಓ ಅಂದ್ರೆ unidentified flying object, ಅಪರಿಚಿತ ಹಾರಾಡುವ ವಸ್ತುಗಳು.. ಈ ಯು.ಎಫ್.ಓಗಳು ಆಕಾಶದಲ್ಲಿ ಟೀ ಸಾಸರುಗಳನ್ನ ಒಂದರ ಮೇಲೆ ಒಂದರಂತೆ ಬೋರಲಾಗಿ ಇಟ್ಟಂತೆ ಕಂಡದ್ರಿಂದ ಇವುಗಳಿಗೆ ಫ್ಲೈಯಿಂಗ್ ಸಾಸರ್ ಅಂತ ಕರೆದರು.

ತಟ್ಟೆಯಂತಿರುವ! ಸ್ವಯಂ ಬೆಳಕಿನಿಂದ ಕೂಡಿರುವ! ಅಪರಿಮಿತ ವೇಗದಲ್ಲಿ ಫೈಟರ್ ವಿಮಾನಗಳ ಕಣ್ಣಿಗೇ ಕಾಣದಂತೆ ಮಾಯವಾಗುವ ರೆಕ್ಕೆಗಳೇ ಇಲ್ಲದ ಹಾರುವ ಯಂತ್ರಗಳು!!ಯಾವುದೇ ಯಂತ್ರದ ಶಬ್ಧವೂ ಇಲ್ದೆ ನೆಲದಿಂದ ನೇರವಾಗಿ ಮೇಲಕ್ಕೇರುವ, ಹೊಗೆಯನ್ನೂ ಉಗುಳದೆ ಯಾವುದೇ ರೆಕ್ಕೆಗಳೇ ಇಲ್ಲದೆ ನಿಶ್ಯಭ್ದವಾಗಿ ಆಕಾಶದಲ್ಲಿ ಚಲಿಸುವ, ಅಲ್ಲೇ ನಿಶ್ಚಲವಾಗಿ ನಿಲ್ಲುವ ಮತ್ತು ನಿಂತಲ್ಲೇ ಗಂಟೆಗೆ ಎಂಟರಿಂದ…ಇಪ್ಪತ್ತು ಸಾವಿರ ಮೈಲುಗಳ ವೇಗದಲ್ಲಿ ಇದ್ದಕ್ಕಿದ್ದಂತೆ ಚಲಿಸುವ ಮತ್ತು ಅದೇ ವೇಗದಲ್ಲಿ ಎಡಕ್ಕೆ ಬಲಕ್ಕೆ ಹಿಂದಕ್ಕೆ ಮುಂದಕ್ಕೆ ಹಠಾತ್ತಾಗಿ ದಿಕ್ಕು ಬದಲಿಸುವ ಈ ಯು.ಎಫ್.ಓಗಳು ನಮ್ಮ ಪುರಾಣಗಳ ಮಂತ್ರಚಾಲಿತ ವಿಮಾನಗಳ ಕಲ್ಪನೆಗಳನ್ನೂ ಮೀರಿಸುವಂತಿವೆ!!

ಈ ಊಹಾತೀತ & ನಮ್ಮ ಭೌತ ನಿಯಮಗಳನ್ನೆಲ್ಲಾ ಮೀರಿದ ಈ ಫ್ಲೈಯಿಂಗ್ ಸಾಸರ್ಗಳು ನಿಜವಾದವೆ? ಅಥವಾ ಬರೀ ನಮ್ಮ ಕಲ್ಪನೆಯೇ?!

ತೇಜಸ್ವಿಯವರೇ ಹೇಳಿರೋ ಹಾಗೆ...ಯು.ಎಫ್.ಓಗಳ ಬಗ್ಗೆ ಓದುವಾಗ ಯು.ಎಫ್.ಓ ಇರುವಿಕೆಯನ್ನ ನಂಬಬೇಕೆ ಬೇಡವೇ ಎನ್ನುವ ಗೋಜಿಗೆ ಹೋಗದೆ ಸುಮ್ಮನೆ ಓದುತ್ತಾ ಹೋಗೋದು ಅವಶ್ಯಕ ಯಾಕಂದ್ರೆ ಯು.ಎಫ್.ಓ ಇರುವಿಕೆಯನ್ನ ನಂಬುವ ಇಲ್ಲ ನಂಬದಿರುವ ಕ್ರಿಯೆಯಲ್ಲಿಯೇ ನಮ್ಮ ಬುಧ್ಧಿಶಕ್ತಿಗೆ ಹೊಸ ಪ್ರಶ್ನೆಗಳು ಆಯಾಮಗಳು ಸಿಗುತ್ತವೆ. ನಂಬಿದ್ರೆ ಸಕತ್ ವಿಚಿತ್ರ ಸಂಗತಿಗಳು!! ನಂಬದಿದ್ದರೆ ನೂರೊಂದು ಪ್ರಶ್ನೆಗಳು!! :)

ಈ ಸಾಸರುಗಳೆಲ್ಲ ಒಂದು ದೊಡ್ಡ ಮಾತೃ ವಿಮಾನದಿಂದ ಬಂದು ಭೂಮಿಯ ವೀಕ್ಷಣೆ ನಡೆಸಿ ಪುನಃ ಹೋಗಿ ಮಾತೃ ವಿಮಾನವನ್ನ ಸೇರಿಕೊಳ್ಳುತ್ತವೆ. ಸಾಸರುಗಳ ಪ್ರಚಂಡ ವೇಗವನ್ನ ಗಮನಿಸಿದರೆ(ಗಂಟೆಗೆ ಎಂಟರಿಂದ ಇಪ್ಪತ್ತು ಸಾವಿರ ಮೈಲುಗಳ ವೇಗ!!!) ಅವು ಭೂಮಿಯ ಯಾವ ಭಾಗಕ್ಕೆ ಬೇಕಾದರೂ ಕ್ಷಣಾರ್ಧದಲ್ಲಿ ಹೋಗಿ ವೀಕ್ಷಣೆ ನಡೆಸಿ ಬರಬಹುದು.ಅವು ಒಮ್ಮೊಮ್ಮೆ ಏಕಾಂಗಿಯಾಗಿ, ಒಮ್ಮೊಮ್ಮೆ ಹಲವಾರು ಆಕಾಶದಲ್ಲಿ ಹಾರಾಡುತ್ತಾ ವೀಕ್ಷಣೆ ನಡೆಸಿವೆ. ಕೆಲವು ವೇಳೆ ಯುದ್ಧ ವಿಮಾನಗಳಂತೆ ವ್ಯೂಹ ರಚಿಸಿಕೊಂಡು ಅಪರಿಮಿತ ವೇಗದಲ್ಲಿ ಹೋಗೊದನ್ನ ಹಲವಾರು ಜನ ನೋಡಿದ್ದಾರಂತೆ.೧೯೫೦ರ ಆಸುಪಾಸಿನನಲ್ಲಿ ಸಾಸರ್ಗಳ ಹಾರಾಟ ಏಕೆ ಜಾಸ್ತಿಯಾಗ್ತಿದೆ ಅಂತ ಯಾರಿಗೂ ಗೊತ್ತಿಲ್ಲದಿದ್ದರೂ..ಅವು ಭೂಮಿಯ ಮೇಲೆ ಧಾಳಿ ಮಾಡಲು ಅಂತಿಮ ವೀಕ್ಷಣೆ ನಡೆಸುತ್ತಿದ್ದಂತೆ ತೋರುತ್ತಿದ್ವಂತೆ!!

ಹಲವಾರು ಸಲ ಈ ಹಾರುವ ಸಾಸರುಗಳನ್ನ ಜೆಟ್ ವಿಮಾನಗಳು ಬೆನ್ನತ್ತಿದಾಗ ಅವು ಮಿಂಚಿ ಮಾಯವಾಗಿವೆಯೇ ಹೊರತು ವಿಮಾನಗಳ ಮೇಲೆ ಎರಗುವುದಾಗಲಿ ದಾಳಿ ಮಾಡುವುದಾಗಲಿ ಮಾಡಿ ಆಕ್ರಮಣಶೀಲ ಪ್ರವೃತ್ತಿಯನ್ನ ತೋರಿಸಿಲ್ಲ....ಬ್ಲೂ ಬುಕ್ನ "ಮೆಂಟಲ್ ದುರಂತ”ದ ಹೊರತಾಗಿ. ಈ ದುರಂತಕ್ಕೆ ನಿಜವಾಗ್ಲೂ ಸಾಸರುಗಳೇ ಕಾರಣವೇ?!
ಈ ಆಕಾಶಯಂತ್ರಗಳ ಮೂಲ ಎಲ್ಲಿಯದು? ಇವುಗಳ ಚಲನವಲನಗಳು ಬುದ್ಧಿ ಅಥವಾ ಪ್ರಜ್ಞೆಯಿಂದ ನಿಯಂತ್ರಿತವಾದವೆ? ಅದನ್ನು ಯಾವ ಪ್ರಜ್ಞೆ ಹೇಗೆ ನಿಯಂತ್ರಿಸುತ್ತಿದೆ. ಅದು ಸಾಸರಿನೊಳಗೆ ಇದೆಯೋ ಅಥವಾ ಅವುಗಳನ್ನ ಇಲ್ಲಿಗೆ ತಂದು ಬಿಡುವ ಮಾತೃ ನೌಕೆಯೊಂದರಲ್ಲಿದೆಯೋ ಅಥವಾ ಲಕ್ಷಾಂತರ ಮೈಲುಗಳಾಚೆಯ ನಕ್ಷತ್ರ ಮಂಡಲದಲ್ಲಿದೆಯೋ?! ಇನ್ನೂ ಗೊತ್ತಾಗಿಲ್ಲ...

ಇಲ್ಲಿಯವರೆಗೂ ಫ್ಲೈಯಿಂಗ್ ಸಾಸರ್ಗಳೊಡನಾದ ಅನುಭವಗಳನ್ನ ಈ ಮೂರು ರೀತಿ ವಿಭಾಗಿಸಿದ್ದಾರೆ.
ಹಾರುವ ಸಾಸರುಗಳನ್ನ ಮನುಷರು ಹತ್ತಿರದಿಂದ ನೋಡಿದ್ದು ,ಅದರ ವಿವರಗಳು, ಅದಕ್ಕೆ ಮುಖಾಮುಖಿಯಾದಾಗ ಅದರ ವೇಗದ ಪರಿಣಾಮಗಳು, ಹೊಮ್ಮಿದ ಬೆಳಕಿನ ಸ್ವರೂಪ ಇತ್ಯಾದಿಗಳನ್ನ ಗಮನಿಸಿ ಹೇಳಿದ ಘಟನೆಗಳಿಗೆ "ಮೊದಲ ವರ್ಗದ ಮುಖಾಮುಖಿ" (Close encounter of the first kind) ಅಂತಾರೆ.

ಹಾರುವ ತಟ್ಟೆಗಳು ಭೂಮಿಗಿಳಿದ ಸಂಗತಿಗಳು, ಅವು ಭೂಮಿಯ ಮೇಲೆ ನಿಂತಾಗ ಮತ್ತು ಅಲ್ಲಿಂದ ಹಾರಿದಾಗ ಭೂಮಿಯ ಮೇಲೆ ಉಳಿದುಕೊಂಡ ಗುರುತುಗಳು ಅಥವಾ ಪರಿಣಾಮಗಳು ಇವು ಇರುವ ಘಟನೆಗಳನ್ನ ಎರಡನೇ ವರ್ಗದ ಹತ್ತಿರದ ಮುಖಾಮುಖಿ" (Close encounter of the second kind) ಅಂತಾರೆ.

ಭೂಮಿಗಿಳಿದ ಸಾಸರುಗಳಿಂದ ಮಾನವರನ್ನು ಹೋಲುವ ಜೀವಿಗಳು, ಯಂತ್ರ ಮಾನವರು ಅಥವಾ ಮನುಷ್ಯರೇ ಬಂದಿದ್ದು ಭೂಮಿಯ ಮನುಷ್ಯರೊಡನೆ ಮುಖಾಮುಖಿಯಾದುದು ಸಂವಾದಿಸಲು ಯತ್ನಿಸಿದ್ದು ಮುಂತಾದವುಗಳಿಗೆ ಮೂರನೇ ರೀತಿಯ ಮುಖಾಮುಖಿ(Close encounter of the third kind) ಅಂತಾರೆ.

ಎರಡನೇ ರೀತಿಯ ಮುಖಾಮುಖಿಗಿಂತಲೂ ಭಯ ಕಾತರ ಕುತೂಹಲ ಸಂದೇಹಗಳನ್ನ ಹುಟ್ಟಿಸುವುದು ಮೂರನೇ ರೀತಿಯ ಮುಖಾಮುಖಿ. ಅಲ್ಲಗಳೆಯಲಸಾದ್ಯವಾದಂತ ಸಾಕ್ಷಾಧಾರಗಳೊಂದಿಗೆ ನಿರೂಪಿತವಾಗಿರುವ ಈ ಕೆಲವು ಘಟನೆಗಳು ನಮ್ಮ ವಿಚಾರಶೀಲತೆಗೂ ವಿವೇಕಕ್ಕೂ ಸವಾಲುಗಳಾಗಿವೆ....
- ಇಟಲಿಯ ರಾವಿಯೋ ಹಳ್ಳಿಗೆ ಹೋದ ಸಂಶೋಧಕನಿಗೆ ಹಠಾತ್ತಾಗಿ ಇದಿರಾದ ಆಕಾಶಲೋಕದ ಕುಬ್ಜದಿಂದ ಆದ ಆಘಾತ!
- ದನ ಕಾಯುವ ಹುಡುಗ ಮೂಕನಂತಿದ್ದ ಮ್ಯಾಕ್ಸಿಮೊವನ್ನ ನೋಡಿ ತಾತ್ಸಾರದಿಂದ ಲೋಚಗುಟ್ಟಿದ ಆಕಾಶಕುಳ್ಳರು!
- ಅಮೆರಿಕಾದ ಹಾಪ್ಕಿನ್ಸ್ ವಿಲ್ಲಾದ ಎಂಟು ಜನರಿಗೆ ಸಾಸರಿನಿಂದ ಇಳಿದ ವಿಚಿತ್ರ ಜೀವಿಗಳು ಕಾಟ ಕೊಟ್ಟಿದ್ದು..
- ಬ್ರೆಜಿಲ್ನ ಹಳ್ಳಿರೈತ ಆಂಟೋನಿಯೋ ವಿಲ್ಲಾಸ್ ಬೋಸ್ ಆಕಾಶಲೋಕದ ಪ್ರೇಯಸಿಯೊಂದಿಗಿನ ಪ್ರಣಯ
- ಕೆನಡಾದ ಬೆಟ್ಟಿ ಮತ್ತು ಬೇರ್ನೆ ದಂಪತಿಗಳ ಜೀವನದಲ್ಲಿ ವಸ್ತುಗಳು ಕಳೆದು ಹೋದ ಹಾಗೆ... ಕೆಲವು ಘಂಟೆಗಳು ಕಳೆದು ಹೋಗಿದ್ದು ಹೇಗೆ? ಆ ಕಳೆದು ಹೋದ ಕಾಲದಲ್ಲಿ ಏನೇನು ರಹಸ್ಯಗಳಿದ್ದವು? ಅದನ್ನ ಪತ್ತೆ ಹಚ್ಚಿದ್ದು ಹೇಗೆ?
- ಇದಲ್ಲದೆ ಆಡಂ ಸ್ಕೀ ಆಕಾಶ ಯಾತ್ರಿಕರನ್ನು ಸಂಧಿಸಿ ಮಾತಾಡಲು ಯತ್ನಿಸಿದ ವೃತ್ತಾಂತ!
----------------------

ಪೂರ್ಣ ಚಂದ್ರ ತೇಜಸ್ವಿಯವರ ಫ್ಲೈಯಿಂಗ್ ಸಾಸರ್ಗಳ ಬಗೆಗಿನ ಎರಡು ಪುಸ್ತಕಗಳನ್ನ ಓದಿದ ಮೇಲೆ ಕತ್ತೆತ್ತಿ ಆಕಾಶ ವೀಕ್ಷಿಸಲು, ಸೂರ್ಯ, ಚಂದ್ರ, ನಕ್ಷತ್ರ, ಗ್ರಹಗಳ ಬಗ್ಗೆ ತಿಳಿಯಲು ಕುತೂಹಲವಾಗಿದೆ...ದೂರ ಗ್ರಹಗಳ ಜೀವಿಗಳು ಭೂಮಿಗೆ ಬಂದಿಳಿಯಬಹುದೆಂಬ ಕಲ್ಪನೆಯೇ ವಿಸ್ಮಯ!!ಫ್ಲೈಯಿಂಗ್ ಸಾಸರ್ಗಳ ವಿಷಯವಾಗಿ ಎಷ್ಟೋ ಜನರ ಅನುಭವಗಳಿವೆ, ಪುಸ್ತಕಗಳಿವೆ, ಎಪ್ಪತ್ತಕ್ಕೂ ಹೆಚ್ಚಿನ ಸಿನೆಮಾಗಳಿವೆ!!

ತೇಜಸ್ವಿಯವರ "ಫ್ಲೈಯಿಂಗ್ ಸಾಸರ್" ಪುಸ್ತಕ ಮರೆಯಲಾರದಂತಹ ಒಂದು ಅನುಭವ.
ಅದು ನನಗೂ ದಕ್ಕಿದೆ. ನಿಮಗೂ ದಕ್ಕಲಿ ಎಂದು ಹಾರೈಸುವೆ. :)
ಆಕಾಶದಾಚೆಗಿನ ಅತಿಥಿಗಳ ಬರುವಿಕೆಯ ನಿರೀಕ್ಷೆ ನಿಮಗೂ ಇದೆಯೇ?!! :)
-ಸವಿತ

ದ್ಯುತಿ ಸಂಶ್ಲೇಷಣೆ ಕ್ರಿಯೆ...ನನ್ನ ಕಲ್ಪನೆಯ...ನೀರ್ಬಣ್ಣ ಚಿತ್ರ!

2009-11-11T07:48:00.000-08:00

ದ್ಯುತಿ ಸಂಶ್ಲೇಷಣೆ ಕ್ರಿಯೆ ಎಂದರೇನು?
"ಸಸ್ಯಗಳು ಮಣ್ಣಿನಿಂದ ಖನಿಜಾಂಶವನ್ನು ಮತ್ತು ನೀರನ್ನು ಹೀರಿಕೊಂಡು...ಸೂರ್ಯನ ಬೆಳಕನ್ನು ಉಪಯೋಗಿಸಿಕೊಂಡು, ಪತ್ರಹರಿತ್ತಿನ ಸಹಾಯದಿಂದ ತಮ್ಮ ಆಹಾರವನ್ನು ತಯಾರಿಸಿಕೊಳ್ಳುವ ಕ್ರಿಯೆಯನ್ನ ದ್ಯುತಿ ಸಂಶ್ಲೇಷಣೆ ಕ್ರಿಯೆಯೆನ್ನುವರು."
ಇದು ಆರೇಳನೇ ತರಗತಿಯಲ್ಲಿ ಕಲಿತ ಉತ್ತರ . :)

'ದ್ಯುತಿ ಸಂಶ್ಲೇಷಣೆ' ಪದ ಕನ್ನಡದ್ದಲ್ವಂತೆ, ಸಂಸ್ಕೃತದಿಂದ ಎರವಲಾಗಿ ಪಡೆದ ಪದ!
ಈ ನೀರ್ಬಣ್ಣ ಚಿತ್ರವನ್ನ ಡಾ.ಬಿ.ಜಿ.ಎಲ್.ಸ್ವಾಮಿಯವರ 'ಹಸುರು ಹೊನ್ನು' ಪುಸ್ತಕ ಓದಲಿಕ್ಕೆ ಶುರು ಮಾಡೋಕೆ ಮುಂಚೆ ಚಿತ್ರಿಸಿದ್ದು. "ಬೆಳಕಿನ ವಕ್ರೀಭವನ ಕ್ರಿಯೆ" ಅರ್ದಂಬರ್ದ ಇದೆ :)
-ಸವಿತ

ನನ್ನ Some ಶೋಧನೆ!!

2009-11-09T07:37:00.000-08:00

ಆಗಷ್ಟೇ ಕನ್ನಡ ಮಾಧ್ಯಮದಲ್ಲಿ 10ನೇ ತರಗತಿ ಮುಗಿಸಿ, ಪ್ರಥಮ ಪಿ.ಯು.ಸಿ ಕಾಲೇಜಿಗೆ ಸೇರಿದ ದಿನಗಳು. ಹೊಸ ಕಾಲೇಜು, ಹೊಸ ಗೆಳತಿಯರು, ವಿಜ್ಞಾನದ ವಿಷಯಗಳು, ಭೌತ,ಸಸ್ಯ,ಜೀವ,ರಾಸಾಯನಿಕ ಶಾಸ್ತ್ರದ ಪ್ರಯೋಗಗಳು, ಗಣಿತ ಸಮೀಕರಣಗಳು....ಅದೂ ಎಲ್ಲಾ ಇಂಗ್ಲೀಷ್ ಮಾಧ್ಯಮದಲ್ಲಿ.....ಎಲ್ಲವೂ ಒಂಥರಾ ಹೊಸತೇ :)

ಒಂದಿನ ಮಧ್ಯಾಹ್ನ ನಾನು ಕಾಲೇಜಿನಿಂದ ಮನೆಗೆ ವಾಪಾಸ್ಸಾಗಿ…ಊಟ ಮಾಡಿ ಟಿ.ವಿ. ಮುಂದೆ ಹಾಜರ್ರು. ನನ್ನ ತಮ್ಮ ಕೂಡ ಆವಾಗಲೇ ಬಂದ. ಅದ್ಯಾರೋ ಸ್ನೇಹಿತರು ಕೊಟ್ರು ಅಂತ ಒಂದು ಚಿಕ್ಕ ಸೀಸೆಯಲ್ಲಿ ಪಾದರಸವನ್ನ ತಂದಿದ್ದ. ಅಮ್ಮನಿಗೆ ಕಾಣದ ಹಾಗೆ ನನ್ನ ಬಳಿ ತಂದು ಒಮ್ಮೆ ಆ ಸೀಸೆಯನ್ನ ಜೋರಾಗಿ ಅಲುಗಾಡಿಸಿ ತೋರಿಸಿದ. ಒಂದು ದೊಡ್ಡ ಹನಿಯಂತಿದ್ದ ಪಾದರಸ ಒಡೆದು ಅನೇಕ ಚಿಕ್ಕ ಚಿಕ್ಕ ಹನಿಗಳಾದವು. ಮತ್ತೊಮ್ಮೆ ನಿಧಾನವಾಗಿ ಸೀಸೆಯನ್ನ ತಿರುಗಿಸಿದರೆ ಮತ್ತೆ ಮೊದಲಿನ ದೊಡ್ಡ ಹನಿಯಾಯ್ತು. ಇಷ್ಟಕ್ಕೆ ನಿಲ್ಲದ ಅವನು ಪೇಪರಿನ ಮೇಲೆ ನಿಧಾನವಾಗಿ ಸುರುವಿ…ಈಗ ಅದು ಹೇಗೆ ಹರಿದಾಡತ್ತೆ ಅಂತ ತೋರಿಸಿದ್ದು ನನ್ನ ಕುತೂಹಲ ಕೆರಳಿಸಿತು. ಮತ್ತೆ ಪೇಪರಿನ ಮೂಲೆಯಲ್ಲೊಂದು ಚಿಕ್ಕ ಮಡಿಕೆ ಮಾಡಿ ಅದರಿಂದ ಪುನಃ ಪಾದರಸವನ್ನ ಸೀಸೆಯೊಳಗೆ ಹಾಕಿ....ಇದು ನನ್ನದು....ತೆಗೆದರೆ ನೋಡು ಅಂತ ಕಟ್ಟಾಜ್ಞೆಯೊಂದಿಗೆ ಟೇಬಲ್ ಮೇಲೆ ಸೀಸೆಯನ್ನಿಟ್ಟ. ನಾನು ಟೀವಿ ನೋಡುತ್ತಲೇ ಇದ್ದೆ.

ಊಟ ಮುಗಿಸಿ ತಮ್ಮ ಸ್ಕೂಲಿಗೆ ಹೊರಟುಹೋದ. ಅಲ್ಲಿಯವರೆಗೂ ಕುತೂಹಲ ತಡೆದಿಟ್ಟುಕೊಂಡಿದ್ದ ನನಗೊಂದು ಛಾನ್ಸ್....!! :) ನಿಧಾನವಾಗಿ ಸೀಸೆಯ ಮುಚ್ಚಳ ತೆಗೆದೆ (ರಾಸಾಯನಿಕ ವಸ್ತುವನ್ನ ಬರಿಗೈಯಲ್ಲಿ ಮುಟ್ಟಬಾರದು ಅಂತ ತಿಳಿದಿದ್ರೂ, ಏನೂ ಆಗೋಲ್ಲ ಅನ್ನೋ ಧೈರ್ಯದ ಮೇಲೆ) ಪಾದರಸವನ್ನ ಬರಿಗೈಯಲ್ಲಿ ಸ್ವಲ್ಪ ಒತ್ತಡದಲ್ಲಿ ಮುಟ್ಟಿದೆ. ಅದು ಚಿಕ್ಕ ಚಿಕ್ಕ ತುಣುಕುಗಳಾದವು..ಮತ್ತೆ ಬೆರಳಿಗೇನಾದ್ರು ಆಯ್ತಾ ಅಂತ ಒಮ್ಮೆ ನೋಡಿದೆ ಏನೂ ಆಗಿರಲಿಲ್ಲ. ಅದೇ ಧೈರ್ಯದ ಮೇಲೆ ಪಾದರಸವನ್ನ ಬಲಗೈ ಅಂಗಳದಲ್ಲಿ ಸುರುವಿಕೊಂಡು..ಬಲಗೈಯಿಂದ ಎಡಗೈಗೆ…ಮತ್ತೆ ಎಡಗೈಯಿಂದ ಬಲಗೈಗೆ ಸುರಿದಾಡೋದು ಮಜಾ ಅನ್ನಿಸ್ತು.. :)

ಬೆಳ್ಳಿ ಬಣ್ಣದ ಭಾರದ ದ್ರವ ರೂಪದ ಮೂಲವಸ್ತು.... ಪಾದರಸ...!! ಕೈಲಿದ್ದ ಪಾದರಸವನ್ನ ಹಾಗೆ ಹಿಡಿದಿಟ್ಟು ಟಿ.ವಿ.ಯಲ್ಲಿ ಪ್ರಸಾರವಾಗುತ್ತಿದ್ದ ಹಾಡನ್ನ ನೋಡತೊಡಗಿದೆ. ಅಡುಗೆ ಮನೆಯಿಂದ ಅಮ್ಮ ಕರೆದಾಗ, ಬಂದೆಮ್ಮಾ....ಅಂತ ಹೇಳಿ.... ನನ್ನ ಕೈ ನೋಡಿಕೊಂಡಾಗ.....ನನಗೆ ಒಂದು ಕ್ಷಣ ಸಕತ್ ಭಯ ಆಗೋಯ್ತು.....ಈಗ ಅಮ್ಮ ಕೇಳಿದ್ರೆ ಏನು ಹೇಳೋದು??? ಅಪ್ಪಂಗೆ ಏನು ಹೇಳಲಿ??ತಗೋಬೇಡಾ ಅಂತೇಳಿದ್ರೂ ಯಾಕೆ ತೆಗೆದೆ? ಅಂತ ತಮ್ಮ ದಬಾಯಿಸಿದರೆ ಏನು ಮಾಡೋದು?? ಅಂತ ಒಂಥರಾ ಭಯವಾಗೊಯ್ತು.!!!!

ನಾನು ಈ ಪಾದರಸವನ್ನ ಮುಟ್ಟಿದ್ದು, ನನ್ನ ತಮ್ಮ ಅದನ್ನ ಮನೆಗೆ ತಂದದ್ದು, ಅದ್ಯಾರೋ ಇವನಿಗೆ ಕೊಟ್ಟದ್ದು...ಅಯ್ಯೋ…..ಇವಿಷ್ಟೂ ನಡೀದೆ ಇದ್ದಿದ್ರೆ….ಈವತ್ತು ಎಷ್ಟು ಒಳ್ಳೆಯ ದಿನವಾಗಿರ್ತಿತ್ತು...ನನಗೆ ಗ್ರಹಚಾರ ತಪ್ಪಿದ್ದಲ್ಲ...ಅಂತ ಮನಸ್ಸಿನಲ್ಲಿ ಗೊಣಗಿಕೊಳ್ತಾ...ಪಾದರಸವನ್ನ ಸೀಸೆಯಲ್ಲಿ ಹಾಕಿಟ್ಟು..ಅದನ್ನ, ತಮ್ಮನನ್ನ, ನನ್ನನ್ನೂ ಶಪಿಸಿಕೊಳ್ತಾ ಕೈತೊಳೆಯಲು ಓಡಿದೆ..

ನೀರು ಹಾಕಿದರೂ ಊಹು...ಬಿಸಿನೀರು…ಊಹು...ಸೋಪು ಹಾಕಿ ಉಜ್ಜಿದರೂ ಊಹು..ಏನೂ ಆಗಲೇ ಇಲ್ಲ...... :(

ನನ್ನ ಎಡಗೈ ಬೆರಳಲ್ಲಿದ್ದ ಚಿನ್ನದ ಉಂಗುರ.....ಪಾದರಸದ ಬೆಳ್ಳಿ ಬಣ್ಣಕ್ಕೆ ತಿರುಗಿತ್ತು...!!!

ಆಗಲೇ ಕಣ್ಣಂಚಿನಲ್ಲಿ ಹನಿಗೂಡಿತ್ತು... ಮನಸ್ಸಿನಲ್ಲಿ ಒಂದೊಂದಾಗೆ ಉಂಗುರದ ಹಿನ್ನೆಲೆಯ ಚಿತ್ರಣಗಳು ಮೂಡುತ್ತಿದ್ದವು….. ಚಿನ್ನದುಂಗುರದ ಬೆಲೆ ಬಹಳ..ಅದಲ್ದೇ ಅಪ್ಪ ನನ್ನ ಹುಟ್ಟಿದ ಹಬ್ಬಕ್ಕೆ ಅಂತ ಪ್ರೀತಿಯಿಂದ ತೆಗೆದು ಕೊಟ್ಟದ್ದು....ಅದರ ಡಿಸೈನ್ ಕೂಡ ನನ್ನ ಸ್ವಂತದ್ದು...ಆ ದಿನ ಬಿಳಿ ಹಾಳೆಯ ಮೇಲೆ ಚಿತ್ರ ಬಿಡಿಸಿಕೊಂಡು ಅಪ್ಪನ ಜೊತೆ ಬಂಗಾರದಂಗಡಿಗೆ ನಾನೂ ಹೋಗಿದ್ದೆ. ಅಂಗಡಿಯವ ಅವನ ಬಳಿಯಿರೋ ಎಲ್ಲಾ ಡಿಸೈನಿನ ಉಂಗುರಗಳನ್ನ ನಮಗೆ ತೋರಿಸುವ ಮೊದಲೇ ನಾನು ಬರೆದ ಚಿತ್ರವನ್ನ ಅವನ ಮುಂದಿಟ್ಟಿದ್ದೆ....ಆ ಡಿಸೈನ್ ನೋಡಿ ಅಂಗಡಿಯವ ದಂಗಾಗಿದ್ದ..ಹೌದು ನನಗೆ ಇದೇ ಡಿಸೈನ್ ಬೇಕು ಅಂತ ಪಟ್ಟು ಹಿಡಿದಾಗ ಅವ ಪ್ರಯತ್ನಿಸುತ್ತೇನೆ ಅಂತ ಹೇಳಿದ.

ಷಡ್ಭುಜ ನಕ್ಷತ್ರದ ನಡುವೆ ಪ್ರಶ್ನಾರ್ಥಕ ಚಿನ್ಹೆ...!!!! ಹೌದ್ರೀ ಈಗ ನೀವು ದಂಗಾಗಬೇಡಿ.. :)

ಹುಟ್ಟು ಹಬ್ಬದ ದಿನ ಅಪ್ಪ ನನಗೆ ಆ ಉಂಗುರದ ಡಬ್ಬಿಯನ್ನ ಕೊಟ್ಟಾಗ ನಾನು ಸಕತ್ ಆತುರದಲ್ಲಿದ್ದೆ...ಕಡು ಗುಲಾಬಿ ಬಣ್ಣದ ಕಾಗದದ ಒಳಗೆ ಮಿಣ್ಣನೆ ಮಿರುಗುತ್ತಿತ್ತು ಚಿನ್ನದುಂಗುರ.. :) ತೆಗೆದು ನೋಡಿದಾಗ ಷಡ್ಭುಜವೋಗಿ....ರಾಂಬಸ್ ಆಕೃತಿಯ ರೀತಿಯಾಕಾಯ್ತು??? ಅನ್ನೋ ಪ್ರಶ್ನಾರ್ಥಕ ಚಿನ್ಹೆ ನನ್ನ ನೋಟದಲ್ಲಿತ್ತು!!!!

ಬಂಗಾರದಂಗಡಿಯವನಿಗೆ ಷಡ್ಭುಜ ನಕ್ಷತ್ರ ಮಾಡ್ಲಿಕ್ಕೆ ಆಗಲಿಲ್ವಂತೆ…ಅದಕ್ಕೇ ಈ ರೀತಿ ಮಾಡಿದಾನೆ ಅಂತ ಅಪ್ಪ ಸಮಾಧಾನ ಮಾಡಿದ ಮೇಲೆ…ಹೋಗಲಿ ಬಿಡು ಚೆನ್ನಾಗಿದೆಯಲ್ಲ ಸಾಕು ಅಂದ್ಕೊಂಡೆ.

ಇಷ್ಟೆಲ್ಲಾ ಹಿನ್ನೆಲೆಯುಳ್ಳ ಚಿನ್ನದುಂಗುರದ ಗತಿ ಹೀಗಾಗಿತ್ತು!! ಏನು ಮಾಡಲೂ ತೋಚದೆ ಕೊನೆಗೆ...ಇದೂ ಒಂದು ಹೊಸ ಸಂಶೋಧನೆಯಾಗಿದ್ದರೆ ???!!! ಅನ್ನೋದು ಹೊಳೆದಾಗ ಸ್ವಲ್ಪ ನಿರಾಳವೆನಿಸಿ ಒಂದೆರಡು ಬಾರಿ ದೀರ್ಘ ಉಸಿರನ್ನೆಳೆದುಕೊಂಡು ರಾಸಾಯನಿಕ ಶಾಸ್ತ್ರ ಪುಸ್ತಕದಲ್ಲಿದ್ದ ಎಲ್ಲಾ ಪಾಠಗಳನ್ನ ತಡಕಾಡಿದೆ…ಸಿಕ್ತು….ಬಂಗಾರದ ಬಗ್ಗೆ ಇದೆ...ಆದರೆ ಪಾದರಸದೊಡನೆ ಪ್ರತಿಕ್ರಿಯೆಯ ಬಗ್ಗೆ ಇಲ್ಲ..ಸರಿ ಆದದ್ದಾಗಲಿ ಅಂತ ನೋಟ್ಸ್ ಹಿಡಿದು ಸೈಕಲ್ ಜೊತೆಗೆ ನಮ್ಮ ಕೆಮಿಸ್ಟ್ರಿ ಲೆಕ್ಚರ್ ಮನೆ ಕಡೆ ಹೊರಟೆ.

ಅವರಿಗೆ ನಡೆದದ್ದನ್ನೆಲ್ಲಾ ವಿವರಿಸಿದ ಮೇಲೆ....ಅವರು ಅವರ ಎಮ್ಮೆಸ್ಸಿ ಗ್ರಂಥಗಳನ್ನ ಹುಡುಕಾಡಿ ವಿಚಾರವನ್ನ ಹೇಳಿದರು...

ಪಾದರಸ ಬಂಗಾರದೊಡನೆ ಸೇರಿ (ಒಂದು ದ್ರವ ಮತ್ತು ಒಂದು ಘನ ಲೋಹ ಸೇರಿದರೆ) ಅಮಾಲ್ಗಂ ಆಗತ್ತೆ. ಈ ಉಂಗುರವನ್ನ ಹೆಚ್ಚಿನ ಉಷ್ಣತೆಯಲ್ಲಿ (ಬೆಂಕಿಯಲ್ಲಿ) ಕಾಯಿಸಿದರೆ ಪಾದರಸವನ್ನ ಬಂಗಾರದಿಂದ ಬೇರ್ಪಡಿಸಬಹುದು. ನಾಳೆ ಕೆಮಿಸ್ಟ್ರಿ ಲ್ಯಾಬ್ಗೆ ಉಂಗುರ ತಗೊಂಡು ಬನ್ನಿ ವಿಚಾರ ಮಾಡೋಣ ಅಂದರು….ಇದು ಇನ್ನೂ ಪೇಚಾಟಕ್ಕೆ ತಂದಿಟ್ಟಿತು. ಇದು ಹೊಸ ಸಂಶೋಧನೆಯೇನಲ್ಲ ಅಂತ ಅರಿವಾದೊಡನೆ ಅಲ್ಲಿಂದ ಜಾಗ ಖಾಲಿ ಮಾಡೋದು ಬಹಳ ಸೂಕ್ತ ಅನ್ನಿಸಿತು.

ಲ್ಯಾಬಿಗೆ ತಗೊಂಡೋಗಿ ಕಾಯಿಸಿ…ಇನ್ನೇನೋ ಮಾಡಿ...ಉಂಗುರ ಮೊದಲಿನಂತಾದರೆ ಸರಿ…..ಗ್ರಹಚಾರವಶಾತ್ ಕರಗಿ...ಆವಿಯಾಗಿ…ಇನ್ನೋನೋ ಆದರೆ ಅಮ್ಮ ಅಪ್ಪನಿಗೆ ಹೇಳಲು ಏನೂ ಇರದೇ…ನನ್ನ ಬಳಿ ಉಳಿಯೋದು...ಬರೀ ಪ್ರಶ್ನಾರ್ಥಕ ಚಿನ್ಹೆಯೊಂದೇ....???

ಮನೆಗೆ ಬಂದು ಸಂಜೆ ಅಪ್ಪ ಬರುವುದನ್ನೇ ಕಾದೆ.. ಅಪ್ಪನ ಹಾಜರಿಯಲ್ಲಿ ಅಮ್ಮನ ಬಳಿ ಮಾತಾಡಲು ಒಂಥರಾ ಧೈರ್ಯ :) ಉಂಗುರವನ್ನ ಪೇಪರಿನೊಳಗಿಟ್ಟು ಓದಲು ಪ್ರಯತ್ನಿಸಿದೆ..ಆಗಲೇ ಇಲ್ಲ ಮನಸ್ಸು ಪದೇ ಪದೇ ಉಂಗುರದ ಕಡೆಗೆ ಹೊರಳುತ್ತಿತ್ತು. ಅಪ್ಪ ಮನೆಗೆ ಬಂದ ಕೂಡಲೇ ಪಟಪಟನೆ ನಡೆದದ್ದನ್ನೆಲ್ಲಾ ಹೇಳಿ ಉಂಗುರವಿದ್ದ ಕಾಗದದ ಪೋಟ್ಟಣವನ್ನ ಅವರ ಕೈಗಿಟ್ಟೆ. ಅಪ್ಪ ಬೈಯಲ್ಲ ಅಂತ ಗೊತ್ತಿದ್ರೂ...ಅವರ ಪ್ರತಿಕ್ರಿಯೆಗೆ ಕಾದೆ. ಎಂಥಾ ಬೇಜವಭ್ದಾರಿತನ..ಪಿಯುಸಿಗೆ ಬಂದರೂ ಕೂಡ ಹುಡುಗಾಟಿಕೆ ಹೋಗಿಲ್ಲ....ಅದೂ ಇದೂ ಬೈತಾರೆ ಅಂತ ಕಾದೆ. ಆದರೆ ಬೈಯಲಿಲ್ಲ. ಈ ವಿಷಯವನ್ನ ಜಾಸ್ತಿ ತಲೆಗೆ ಹಚ್ಚಿಕೊಳ್ಳದೆ ಓದ್ಕೋ, ನಾಳೆ ಬಂಗಾರದನ್ಗಡಿಗೆ ಹೋಗಿ ಸರಿ ಮಾಡಿಸಿಕೊಂಡು ಬರ್ತೀನಿ ಅಂದ್ರು. ಅಮ್ಮಂಗೆ ಹೇಳಲಾ? ಅಂದದ್ದಕ್ಕೆ ನೀನು ಬೇಡ ನಾನು ಹೇಳ್ತೀನಿ ಅಂದದ್ದು ಕೇಳಿ...ಸದ್ಯ…ಬದುಕುಳಿದೆ ಬಡಜೀವ ಅಂತ ನನ್ನನ್ನ ನಾನೇ ಸಂತೈಸಿಕೊಂಡು ಓದಲು ಕುಳಿತೆ. ಸ್ಕೂಲಿನಿಂದ ಬಂದ ತಮ್ಮ ಮತ್ತೆ ಪಾದರಸದ ಸೀಸೆಯೊಡನೆ ಆಡತೊಡಗಿದ...ನನಗಾಗಲೇ ಪಾದರಸದ ಬಗ್ಗೆ ಸಿಟ್ಟು ನೆತ್ತಿಗೇರಿತ್ತು.

ಮರುದಿನ ಸಂಜೆ ಮತ್ತೆ ಕಡು ಗುಲಾಬಿ ಕಾದಗದಲ್ಲಿ ಉಂಗುರ ತನ್ನ ಮೊದಲ ಬಣ್ಣದಲ್ಲಿ ಮಿಂಚುತ್ತಿತ್ತು :) ಅರೆ ಏನಾಗಿತ್ತಂತೆ? ಅದು ಹೇಗೆ ಸರಿಹೋಯ್ತು? ಬಂಗಾರದಂಗಡಿಯವ ಏನು ಮಾಡಿದ? ಅಂತ ನನ್ನ ಪ್ರಶ್ನೆಗಳನ್ನ ಕೇಳಿ...
ಪಾದರಸ ಬಂಗಾರವನ್ನ ತಿಂದಿತ್ತಂತೆ..ಇನ್ನೂ ಜಾಸ್ತಿ ಸಮಯ ಬಿಟ್ಟಿದ್ರೆ ಪೂರ್ತಿ ತಿಂದು ಹಾಕ್ತಿತ್ತಂತೆ....:) ಬೆಂಕಿಯಲ್ಲಿ ಕಾಯಿಸಿ ಪಾದರಸ ಬೇರ್ಪಡಿಸಿ ಕೊಟ್ಟ, ಬಂಗಾರದ ಗಣಿಗಳಲ್ಲಿ ಪಾದರಸವನ್ನ ಬಹಳವಾಗಿ ಉಪಯೋಗಿಸ್ತಾರಂತೆ ಅಂತ ಅಪ್ಪ ಹೇಳಿದಾಗ ನನಗೆ ನಿಜವಾಗಿ ಅಚ್ಚರಿಯಾಯ್ತು. ಪಾದರಸದ ಬಗ್ಗೆ ಇದ್ದ ಸಿಟ್ಟು ಸ್ವಲ್ಪ ಕಡಿಮೆಯಾಯ್ತು... :)
ಒಂದೆರಡು ಸಾಲು ಆ ಎರಡೂ ಲೋಹಗಳ ಬಗ್ಗೆ:
ಬಂಗಾರ (Au): ಲ್ಯಾಟಿನ್ನಲ್ಲಿ Aurum ಅಂತ ಕರೆಯಲ್ಪಡುವ ಬಂಗಾರದ ಬಗ್ಗೆ ಎಲ್ಲರಿಗೂ ಗೊತ್ತಿದೆ :D
ಪಾದರಸ (Hg): ಮೂಲವಸ್ತುಗಳ ಕೋಷ್ಟಕದಲ್ಲಿ ಬಂಗಾರದ ಪಕ್ಕವೇ ಪಾದರಸ ಇರೋದು. ಲ್ಯಾಟಿನಲ್ಲಿ-hydrargyrum ಮತ್ತು ಗ್ರೀಕ್ನಲ್ಲಿ- hydrargyros ಅಂತ ಕರೀತಾರೆ. ರೋಮನ್ ದೇವತೆ ಮೆರ್ಕ್ಯುರಿಯ ನೆನಪಾಗಿ ಈ ದ್ರವ ರೂಪದ ಮೂಲವಸ್ತುವಿಗೆ ಮೆರ್ಕ್ಯುರಿ ಅಂತ ನಾಮಕರಣ ಮಾಡಿದರೂ ಚಿಹ್ನೆ ಮಾತ್ರ Hg ಅಂತಾನೆ ಉಪಯೋಗಿಸೋದು. ಪರಿಸರ ಮಾರಕವಾದ ಪಾದರಸದ ಬಳಕೆಯನ್ನ ಬಹು ದೇಶಗಳಲ್ಲಿ ನಿಷೇಧಿಸಲಾಗಿದೆ. ಆದರೂ ನಿಖರ ಕಾರ್ಯ ವೈಖರಿಯ ಪ್ರಭಾವದಿಂದ ಈಗಲೂ ಕೂಡ ಉಷ್ಣಮಾಪಕಗಳಲ್ಲಿ ಪಾದರಸದ ಬಳಕೆಯನ್ನ ಮಾತ್ರ ನಿಲ್ಲಿಸಿಲ್ಲ.
ಹೆಚ್ಚಿನ ವಿಚಾರ:

http://en.wikipedia.org/wiki/Mercury_(element

http://en.wikipedia.org/wiki/Gold

ವಿ.ಸೂ:

1. ಪಾದರಸ ಎಷ್ಟು ಉಪಯುಕ್ತವೋ ಅಷ್ಟೇ ಅಪಾಯಕಾರಿ ಕೂಡ, ಬರಿ ಕೈಯಲ್ಲಿ ಮುಟ್ಟೋದು ಇನ್ನೂ ಡೇಂಜರ್!!!

2. ಲೇಖನ ಓದಿ ನೀವು ಪ್ರಯೋಗ ಮಾಡಬೇಡಿ. ಹಾಗೇನಾದರೂ ಮಾಡಿ ನಿಮ್ಮ ಉಂಗುರ ಹಾಳು ಮಾಡಿಕೊಂಡರೆ ಮಾತ್ರ ನಾನು ಜವಾಬ್ದಾರಳಲ್ಲ.

ಧನ್ಯವಾದಗಳು
-ಸವಿತ

ಸಾತ್ವಿಕ್ ಅವರ ನಿಮ್ಮಲ್ಲಿ ಒಬ್ಬ ಸಂಶೋಧಕನಿದ್ದಾನೆಯೇ? ಪ್ರಶ್ನೆ ನನಗೆ ಈ ಲೇಖನವನ್ನ ಬರೆಯಲು ಪ್ರೇರೇಪಿಸಿತು :)
(ಚಿತ್ರ ಕೃಪೆ: ನನ್ನ ಸ್ವಂತದ್ದು)

ಹೈದರಾಬಾದ್ ಗೆ ಹೋದ್ರೆ..!!

2009-11-05T10:08:00.000-08:00

ನೀವೇನಾದ್ರೂ ಹೈದರಾಬಾದ್ ಗೆ ಹೋಗೋವ್ರಿದ್ರೆ ಈ ಲೇಖನ ಉಪಯೋಗವಾಗಬಹುದು. ಅಲ್ಲಿ ಏನೇನು ನೊಡಬಹುದು ಅಂತ ಒಂದಷ್ಟು ವಿಚಾರಗಳು.

ಸುಮ್ನೆ ನೋಡ್ಕೊಂಡು ಬರ್ತೀನಂದ್ರೂ ಒಂದು ವಾರ ಮಿನಿಮಮ್ ಬೇಕು. ಬೇಸಿಗೆ ರಜೆಯಲ್ಲಿ ಮಾತ್ರ ಹೋಗ್ಬೇಡಿ....ರೋಸ್ಟ್ ಆಗ್ಬಿಡ್ತೀರ!!!
ಅಲ್ಲಿನ ಉರ್ದು ಮಿಶ್ರಿತ ಹಿಂದಿ ಮಾತಾಡೋ ಶೈಲಿ ಮಾತ್ರ ಸಕತ್!! ಕೇಳೋದಕ್ಕೆ ಮಜಾ!

ನಾನು ಮಾದಾಪುರ(ಹೈಟೆಕ್ ಸಿಟಿ) ರೆಫ಼ೆರೆನ್ಸಿಂದ ಶುರು ಮಾಡ್ತಿದ್ದೀನಿ. ಹೈಟೆಕ್ ಸಿಟಿ ಒಂತರಾ ನಮ್ಮ ಎಲೆಕ್ರ್ಟಾನಿಕ್ ಸಿಟಿ ತರ. ದ್ವಾರದಲ್ಲೇ "ಶಿಲ್ಪಾರಾಮಂ" ಪಾರ್ಕ್ ಇದೆ.
"ದುರ್ಗಂ ಚೆರುವು"ಗೆ (Secret Lake) ಹೈಟೆಕ್ ಸಿಟಿ ಒಳಗಿಂದ ಹೋಗಿ ಆಚೆ ದಡದಲ್ಲಿರೋ ಉದ್ಯಾನವನಕ್ಕೆ ತೆಪ್ಪದಲ್ಲಿ ಹೋಗೋದು ಚೆನ್ನಾಗಿರತ್ತೆ...ಉದ್ಯಾನವನದೊಳಗಿಂದ ಮೆಟ್ಟಿಲು ಹತ್ತಿ ಗುಡ್ಡದ ತುದಿಯಲ್ಲಿ ನಿಂತು ಸುತ್ತಲಿನ ವಿಶಾಲತೆಯನ್ನ ಅನುಭವಿಸೊದು..ವಾವ್!! ಶುಕ್ರವಾರವೋ ಭಾನುವಾರವೊ ನೆನಪಿಲ್ಲ ಸೌಂಡ್ & ಲೈಟ್ ಪ್ರೊಗ್ರಾಮ್ ಇರತ್ತೆ!!

"ಚಾರ್ಮಿನಾರ್"ನಲ್ಲಿ ನಿಮ್ಮನೆ ಮತ್ತು ಅಕ್ಕ ಪಕ್ಕದ್ಮನೆಯ ಹೆಣ್ಮಕ್ಕಳಿಗೆಲ್ಲಾ ಮುತ್ತು ಪೋಣಿಸಿದ ಬಳೆಗಳನ್ನ ತಗೊಳ್ಳಿ..ಹಾಗೆ ರೋಡ್ ಸೈಡ್ನಲ್ಲಿ ಫ಼ಸ್ಟ್ ಕ್ಲಾಸ್ ಇರಾನಿ ಟೀ ಟೇಸ್ಟ್ ಮಾಡಬಹುದು :) ಮಸೀದಿ ಕಾಂಪೌಂಡಿನಲ್ಲಿ ಹಾರಾಡೋ ಗುಂಪು ಗುಂಪು ಪಾರಿವಾಳಗಳಿಗೆ ಒಂದಷ್ಟು ಕಾಳು ಹಾಕಿ..

IMAX ನಮ್ಮ ಫೋರಂ ತರಾನೆ, PVR ನಲ್ಲಿ ಒಂದಷ್ಟು ತೆಲುಗು ಸಿನೆಮಾ ನೋಡಿ.. ಸಂಜೆ ಹೊತ್ತು ಟ್ಯಾಂಕ್ ಬಂಡ್ ರೋಡ್ನಲ್ಲಿ Walking ಮಾಡ್ತಾ Ice Cream ತಿನ್ನೋದು ಸಕತ್ತಾಗಿರತ್ತೆ!

ಅಲ್ಲೇ ಹತ್ತಿರದಲ್ಲಿರೋ ಸ್ನೋ ವರ್ಲ್ಡ್ಗೆ ಹೋಗಿ, ಇನ್ನೂರು ರೂಪಾಯಿಗೆ ಒಂದು ಗಂಟೆ ಹಿಮಾಲಯದ ಅನುಭವ ಸಿಗತ್ತೆ! ನಿಜವಾಗ್ಲೂ..

ಮತ್ತೆ ಬಿರ್ಲಾ ಮಂದಿರ್ಗೆ ಹೋಗಿ, ಹುಸೇನ್ ಸಾಗರ್, NTR ಪಾರ್ಕು ಹತ್ತಿರದಲ್ಲೆ ಇವೆ..ಹುಸೇನ್ ಸಾಗರ್ ನೀರು ಬಹಳ ಗಲೀಜು..:( ಬೋಟ್ನಲ್ಲಿ ಹೋಗೋದು ನಿಮಗೆ ಬಿಟ್ಟಿದ್ದು.. ಹೋದ್ರೆ ಮದ್ಯದಲ್ಲಿರೋ ಬುದ್ದನ ವಿಗ್ರಹವನ್ನ ನೋಡಬಹುದು.

ಹೈದರಾಬಾದ್ಗೆ ಹೋಗಿ ಹೈದರಾಬಾದ್ ಬಿರಿಯಾನಿ ತಿನ್ನಲಿಲ್ಲಾ ಅಂದ್ರೆ ಲೈಫ಼ೇ ವೇಷ್ಟು ಅಂತ ನನ್ನ ಸ್ಟ್ರಾಂಗ್ ಫೀಲಿಂಗು. ಹೈದರಾಬಾದ್ ಬಿರಿಯಾನಿಗೆ ಸಿಕಂದರ್ರಬಾದ್ನಲ್ಲಿರೋ ಪ್ಯಾರಡೈಸ್ಗೇ ಹೋಗಿ, ಆಮೇಲೆ ಅಲ್ಲೇ ಪಕ್ಕದ ರೋಡಲ್ಲಿ ಸಿಗೋ ಸ್ವೀಟ್ ಪಾನ್ ಸವಿಯೋದನ್ನ ಮಾತ್ರ ಮರೀಬೇಡಿ :)

ಗೋಲ್ಕೊಂಡ ಕೋಟೆಗೆ ಹೋಗಿ, ಸಂಜೆ ಸೌಂಡ್ & ಲೈಟ್ ಪ್ರೋಗ್ರಾಮ್ ಮುಗಿಯೋವರೆಗೂ ಇರಿ.. ಅಮಿತಾಬ್ ಬಚ್ಚನ್ ಗೋಲ್ಕೊಂಡ ಕೋಟೆಯ ಕತೆ ಹೇಳ್ತಾರೆ! ಆದ್ರೂ ನಮ್ಮ ಚಿತ್ರದುರ್ಗದ ಕೋಟೆಯಷ್ಟು ಭದ್ರವಿಲ್ಲ ಬಿಡಿ :)

ಆರ್ಚಿಯೋಲಾಜಿಕಲ್ ಮ್ಯೂಸಿಯಂನಲ್ಲಿರೋ ಬುದ್ದನ ಕಲ್ಲಿನ ವಿಗ್ರಹಗಳು ನನಗಂತೂ ಅಚ್ಚರಿ ಮೂಡಿಸಿದ್ವು..ಆಗಿನ ನವಾಬ ಕೊಂಡು ತಂದಿರೋ "ಮಮ್ಮಿ" ನೋಡೋದನ್ನ ಮರೀಬೇಡಿ!! (ಈಜಿಪ್ಟಿಗೆ ಹೋಗ್ತೀವೊ ಇಲ್ವೋ ಗೊತ್ತಿಲ್ಲ!!) ಸಾಲಾರ್ಜಂಗ್ ಮ್ಯೂಸಿಯಂನಲ್ಲಿ ನಿಜಾಮರ ಕಾಲದ ಅತ್ಯಮೂಲ್ಯ ದಿರಿಸುಗಳು,ಆಭರಣ,ಕತ್ತಿ,ಗುರಾಣಿ,ಚಿತ್ರಕಲೆ...ಅಳಿದುಳಿದ ಇತಿಹಾಸದ ವಸ್ತುಗಳಿವೆ.

ಸಿಕಂದರಾಬಾದ್ನಲ್ಲಿ ಒಳ್ಳೆಯ ಮುತ್ತು,ಹವಳಗಳು ಸಿಗುತ್ತವೆ...ನಿಮ್ಮ ಆಫೀಸ್ id card ತಗೊಂಡು ಹೋಗಿ, ಯಾಕಂದ್ರೆ ಕಾರ್ಪೊರೇಟ್ ಡಿಸ್ಕೌಂಟ್ ಅಂತ ೧೫-೨೦% ಕೊಡ್ತಾರೆ :) ಹಾಗೇ ಗೊತ್ತಿರೋರನ್ನ ಕರೆದುಕೊಂಡು ಹೋದ್ರೆ ಒರಿಜಿನಲ್ ಮುತ್ತು,ಹವಳಗಳು ಸಿಗುತ್ತವೆ...ಇಲ್ಲಾಂದ್ರೆ ನಿಮಗೊಂದು ಟೋಪಿ ಗ್ಯಾರಂಟಿ! :)

ಅಮೀರಪೆಟ್ನಿಂದ ಹೈಟೆಕ್ ಸಿಟಿಗೆ ಶೇರಿಂಗ್ ಆಟೋದಲ್ಲಿ ಹೋಗಿ..!!

ಕಾಚಿಗುಡದಲ್ಲಿ ಕನ್ನಡಿಗರು ತುಂಬಾ ಜನರಿದ್ದಾರೆ ಮತ್ತಲ್ಲಿ ರಾಯರ ಮಠ ಕೂಡ ಇದೆ.ಅಲ್ಲೇ ಒಂದು ಅಂಗಡಿಯಲ್ಲಿ ಚಾಕೋಲೇಟ್ ಫ್ಲೇವರ್ ಟೀ ಪುಡಿ ಸಿಗತ್ತೆ.ಬಹಳ ರೇರ್..ರುಚಿ ಮಾತ್ರ ಸೂಪರ್!

ಊರ ಹೊರಗೆ "ಚಿಲ್ಕೂರು ಬಾಲಾಜಿ" ದೇವಸ್ಥಾನವಿದೆ..ಇದನ್ನ VISA Temple ಅಂತಾನು ಕರೀತಾರೆ ಯಾಕಂದ್ರೆ ಅಲ್ಲಿ ಹೋಗಿ ೧೦೧ (೧೦೮ ಅನ್ನಿಸುತ್ತೆ!!) ಪ್ರದಷ್ಕಿಣೆ ಹಾಕಿದ್ರೆ ನಿಮ್ಗ್ಂತೂ VISA ಸಿಗೋದು ಗ್ಯಾರಂಟಿ !! :)

ರಾಮೋಜಿ ಫಿಲ್ಮ್ ಸಿಟಿಗೆ ವಿಕೆಂಡ್ನಲ್ಲೇ ಹೋಗಿ..ಪೂರ್ತಿ ನೋಡ್ಲಿಕ್ಕೆ ಒಂದು ದಿನವಂತು ಬೇಕೇ ಬೇಕು.

ಎಲ್ಲಿಗೆ ಹೋದ್ರೂ ಕ್ಯಾಮೆರಾ ತಗೊಂಡು ಹೋಗೋದನ್ನ ಮರೀಬೇಡಿ..

ಬರೋವಾಗ ಪುಲ್ಲಾ ರೆಡ್ಡಿ ಸ್ವೀಟ್ಸ್ಗೆ ಹೋಗಿ ಸಕ್ಕತ್ ಸ್ವೀಟ್ಸ್! ಬರೀ ತುಪ್ಪದಲ್ಲೇ ಮಾಡಿರೋದು!! ಒಮ್ಮೆ ತಿಂದು ನೋಡಿ... ಕೆಜಿಗಟ್ಟಲೆ ತಗೊಂಡು ಬರ್ತೀರಾ!!!

ಬೆಂಗಳೂರಿಗೆ/ನಿಮ್ಮ ಊರಿಗೆ ಬಂದ ಮೇಲೆ ನಿಮ್ಮ ಹೈದರಾಬಾದ್ ಅನುಭವ ಹೇಗಿತ್ತು ತಿಳಿಸಿ.

ಹೈದರಾಬಾದ್ನಲ್ಲಿ ಎರಡು ಬೇಸಿಗೆ,ಮಳೆ ಮತ್ತೊಂದೂವರೆ ಛಳಿಗಾಲ ನೋಡಿದ್ದೆ. ಅಲ್ಲಿಂದ ಟ್ರಾನ್ಸ್ಫರ್ ಮಾಡಿ ಅಂತ ಒಂದೇ ಸಮನೆ ಗೋಳೊಯ್ಕೊಂಡು ಬೆಂಗಳೂರಿಗೆ ಬಂದ ಮೇಲೆ ಹೈದರಾಬಾದ್ನ ತುಂಬಾ ಮಿಸ್ ಮಾಡ್ಕೊಂಡೆ! ಅದ್ಯಾಕೋ ಗೊತ್ತಿಲ್ಲ ಹೈದರಾಬಾದ್ ಮಾತ್ರ ಸಿಕ್ಕಾಪಟ್ಟೆ ಇಷ್ಟವಾಯ್ತು..ಇದೆಲ್ಲ ಬರೀವಾಗ ನಾನೇ ಹೈದರಾಬಾದ್ಗೆ ಹೋಗಿ ಬಂದಂತಾಯ್ತು.

-ಸವಿತ
(ಚಿತ್ರ ಕೃಪೆ : ವಿಕಿಪೀಡಿಯಾ)

ಏನು ಮಾಡಲಿ ನಾನು..?

2009-11-04T21:09:00.000-08:00

ಮೊಗ್ಗರಳಿ ಹೂವಾಗಿ,
ಮರಿದುಂಬಿ ಹಾರಾಡಿ,
ಹಸಿರಾದ ಕಾಯಾಗಿ,
ರಸ ತುಂಬಿ ಹಣ್ಣಾಗಿ,
ಕೈ ಬೀಸಿ ಕರೆಯುತಿರೆ...
ಎನ್ನ ಮನೆಯಂಗಳದ ಮಾವು..
ಏನು ಮಾಡಲಿ ನಾನು..?

ಕವನ ಬರೆಯಲೇ...
ಇಲ್ಲ ಕತೆಯ ಕಟ್ಟಲೆ...
ಪದ ಪದಗಳ ಜೋಡಿಸಿ
ಪದ್ಯ ಬರೆಯಲೇ...
ಏನು ಬೇಡವೆನಿಸಿದಾಗ,
ಋತು ಋತುವಿಗೂ
ನಿಸರ್ಗ ಸೃಷ್ಟಿಸುವ ಪ್ರಕೃತಿಯ

ಕೊಂಡಾಡುತ ಸುಮ್ಮನಿರಲೇ..!?! :)

-ಸವಿತ

ಬಣ್ಣದ ತಗಡಿನ ತುತ್ತೂರಿ...

2009-10-17T20:00:00.000-07:00

ಜಿ.ಪಿ.ರಾಜರತ್ನಂ - ಶತಮಾನದ ಕವಿಯ ಪರಿಚಯ ಶಿಶು ಗೀತೆಗಳ ಮೂಲಕ...

ಪದ್ಯ ಶುರುವಾದ ಸಮಯ:
೧೯೩೨ರಲ್ಲಿ ರತ್ನ ಎಂ.ಎ ಪಧವೀಧರರಾಗಿದ್ದರು.ಆ ಕಾಲದಲ್ಲಿ ಕನ್ನಡ ಎಂ.ಎ ಮಾಡಿದವರ ಸಂಖ್ಯೆ ತೀರಾ ಕಡಿಮೆ...ಆದರೂ ಅವರು ಕಲಿತಿದ್ದ ವಿದ್ಯೆಯನ್ನು ಉಪಯೋಗಿಸುವ ಯಾವ ಉದ್ಯೋಗ ಸಿಕ್ಕಿರಲಿಲ್ಲ. ಮುಂದೆ ಏನು ಮಾಡಬೇಕೆನ್ನೋದು ತೊಚದೇ ಇದ್ದ ಸಮಯ. ಆರೋಗ್ಯ ಕೆಟ್ಟಿದ್ದರಿಂದ ಅವರ ತಂದೆ ರಜ ತೆಗೆದುಕೊಳ್ಳಬೇಕಾಗಿ ಬಂದಾಗ, ತಂದೆಯ ಜಾಗಕ್ಕೆ ಬದಲಿಯಾಗಿ ರತ್ನ ಹೋದರು. ಅವರ ತಂದೆ ಮಿಡ್ಲಿಸ್ಕೂಲಿನ ಎರಡು ಮೂರನೇ ತರಗತಿಗಳಿಗೆ ಪಾಠ ಹೇಳುತ್ತಿದ್ದರು. ಅವರ ಬದಲಿಗೆ ಹೋದ ರತ್ನರಿಗೂ ಅದೇ ಪಾಠ ಬಿತ್ತು...!!

ಎಂ.ಎ ಪರೀಕ್ಷೆ ಪಾಸುಮಾಡಿದವರಿಗೆ ಮಿಡ್ಲಿಸ್ಕೂಲ್ ಪಾಠ ಮಾಡುವುದು ಏನು ಕಷ್ಟವೇ....?! ಎಂದುಕೊಂಡು ಯಾವ ಪೂರ್ವ ಸಿದ್ಧತೆಗಳಿಲ್ಲದೆ ತರಗತಿಗೆ ಹೋದರು. ಆವತ್ತು ಮಾಡಬೇಕಾದ ಪಠ್ಯ ಭಾಗವನ್ನ ಓದಿಕೊಂಡರು.

"ಎಂಟು ಗೇಣಿನ ದೇಹ...ರೋಮಗಳೆಂಟು ಕೋಟಿಯು...ಮೂಳೆಯರವತ್ತೆಂಟು...ಇತ್ಯಾದಿ....ಈ ದೇಹ ಕಟ್ಟಿಕೊಂಡು ಏಕೆ ಗೊಳಾಡುತ್ತೀ...ಪರಮಾತ್ಮನನ್ನ ಧ್ಯಾನಿಸಿ ಪರಲೋಕಕ್ಕೆ ಹೋಗು ಮಗು" ಎಂದು ಮೊದಲಾಗುವ ಹರಿಭಕ್ತಿ ಸಾರದ ಪದ್ಯ ಪಾಠವನ್ನು ಎರಡನೇ ತರಗತಿಯ ಮಕ್ಕಳಿಗೆ ಭೊದಿಸಬೇಕಾಗಿತ್ತು!!!ಅದನ್ನ ಹೇಗೆ ಮಾಡುವುದೆಂದು ದಿಕ್ಕು ಕಾಣದೆ, ಮುಂದಿನ ಗದ್ಯ ಪಾಠವನ್ನ ಓದಿದರು..
"ದೇವರು ಎಂಬ ವ್ಯಕ್ತಿಯು ಇರುವುದೇ? ಎಂಬುದರ ಕುರಿತಾಗಿ ವಿಚಾರಪರ ರಾಯರಿಗೂ ಭಕ್ತಾಗ್ರೇಸರ ಶಾಸ್ತ್ರಿಗಳಿಗೂ ನಡೆದ ಒಂದು ಸಂವಾದ." ಬರೆದವರಿದೆ ಅದು ಇಷ್ಟವಾಗಿರಬಹುದು ಆದರೆ ಎರಡನೇ ತರಗತಿಯ ಮಕ್ಕಳಿಗೆ ಅಲ್ಲ..
ಎರಡನೆಯ ತರಗತಿಗೆ ಹೋದರು ಅಲ್ಲಿ ಮೊದಲನೆ ಪಾಠ: 'ಸೌವರ್ಣಮಧ್ಯ ಸ್ಥಿತಿ' ಹಾಗೆಂದರೆ? ಅರ್ಥವಾಗಲಿಲ್ಲ....ಅಲ್ಲೇ ಪಕ್ಕದಲ್ಲಿ ಇಂಗ್ಲೀಷಿನಲ್ಲಿ "The Golden Mean" ಎಂದು ಬರೆದಿದ್ದರು...!!!ಅವರ ಮೇಷ್ಟ್ರುತನದ ಮೊದಲನೆ ದಿನ ಹೀಗೆ ಆರಂಭವಾಯಿತು... :)

"ಪರಮಾತ್ಮಾ! ಮಕ್ಕಳಿಗೆ ಹೇಳಬೇಕಾದುದನ್ನ ಸುಲಭವಾಗಿ ಸರಳವಾಗಿ ತಿಳಿಸಲು ಸಾಧ್ಯವಿಲ್ಲವೇ? ಪಠ್ಯ ಪುಸ್ತಕದ ಪಾಠಗಳು ಅರ್ಥವಾಗಲಿ ಬಿಡಲಿ ಮಾಡಿಯೇ ತೀರಬೇಕು. ಇದರ ಜೊತೆಗೆ ಮಕ್ಕಳಿಗೆ ಉಲ್ಲಾಸ ಕೊಡುವ ಉತ್ಸಾಹಗೊಳಿಸುವ ಕತೆ ಕವನಗಳನ್ನ ಕೂಡಿಸಬಾರದೇಕೆ??" ಅನ್ನೋ ಮನಸಾಯಿತು ಹಾಗೆ ಕಟ್ಟಿ ಹೇಳಿ ಕೊಟ್ಟ ಮೊದಲ ಕವನವೇ 'ತುತ್ತೂರಿ'... :)

"ಬಣ್ಣದ ತಗಡಿನ ತುತ್ತೂರಿ...
ಕಾಸಿಗೆ ಕೊಂಡನು ಕಸ್ತೂರಿ..."

ಎಂದು ಹೇಳಿಕೊಂಡು ಮಕ್ಕಳು ಶಾಲೆಯಲ್ಲಿ, ಮನೆಯ ಬಳಿ ಕುಣಿದಾಡುವ ಗದ್ದಲ ಕಿವಿಗೆ ಬೀಳದಿದ್ದುದು ಅಪೂರ್ವ. ಅವರ ಉಲ್ಲಾಸಕ್ಕೆ ತುತ್ತೂರಿಯೊಂದೇ ಸಾಕಾಗಿತ್ತು....ಅದೆಷ್ಟು ಸಲ ಓದಿದರೂ... ಊದಿದರೂ...ಅವರು ದಣಿದದ್ದು ಕಾಣಿಸಲಿಲ್ಲ. ಅದೇ ಪಟ್ಟಿನಲ್ಲಿ ದಿನಕ್ಕೆ ಮೂರು ನಾಲ್ಕು ಕವನಗಳಂತೆ ಬಾಲಕರೊಡನೆ ಬಾಲಕರಾಗಿ ಹೇಳಿಕೊಟ್ಟರು.
ಹಾಗೆ ರತ್ನರು ಶಿವರಾಮ ಕಾರಂತರ ಮಕ್ಕಳ ಕೂಟದಲ್ಲಿ ಹೇಳಿಕೊಟ್ಟ ಮತ್ತೊಂದು ಪದ್ಯ:

ದೊಡ್ಡ ಪಟ್ಟೆ ಹುಲಿ
ಕಾಡುದಾರಿಯಲಿ
ನಡುಗಿ ನಿಂತು ಹೇಳಿತಿಂತು
ಅಯ್ಯೋ ಅಪ್ಪ ಚಳಿ ||

ಮುಂದಿನ ವರ್ಷದ ಮಕ್ಕಳ ಕೂಟಕ್ಕೆ ಹೋದಾಗ ಅಲ್ಲಿಗೆ ಬಂದಿದ್ದ ಮಕ್ಕಳಿಂದ ಚುಟುಕುಗಳ ಸುರಿಮಳೆ. ಬಂದವರಲ್ಲಿ ಒಬ್ಬೊಬ್ಬನೂ ಐವತ್ತು ನೂರು ಚುಟುಕ ಹೊಸೆದು ತಂದಿದ್ದರಂತೆ..ಚಿಕ್ಕ ಹುಡುಗ ಬರೆದ ಒಂದು ಚುಟುಕ,

ಸರಕು ಇರುವ ಗಾಡಿ
ಹೋಗುತಿತ್ತು ಓಡಿ
ಕದಿಯಲೆಂದು
ಗಾಡಿ ಹಿಂದೆ
ಓಡುತಿದ್ದ ಕೇಡಿ ||

ಅವರ ತುತ್ತೂರಿ, ಕಡಲೆ ಪುರಿ, ಚುಟುಕ, ಕಲ್ಲುಸಕ್ಕರೆ, ರಸಕವಳ ಮತ್ತು ತಾರೆ ಎಲ್ಲಾ ಪದ್ಯ ಸಂಕಲನಗಳಲ್ಲಿರುವ ಪದ್ಯಗಳು "ಕಂದನ ಕಾವ್ಯ ಮಾಲೆ" ಪುಸ್ತಕದಲ್ಲಿವೆ. ಅದರಲ್ಲಿ ಒಟ್ಟು ನೂರು ಪದ್ಯಗಳಿವೆ...!!
ಚಿಕ್ಕಂದಿನಲ್ಲಿ ಅವರ ತಾಯಿ ಇಟ್ಟ ಹೆಸರು ರಾಜ ಅಂತ. ಜಿ.ಪಿ.ರಾಜಯ್ಯಂಗಾರ್...ಹೇಗೆ ಜಿ.ಪಿ.ರಾಜರತ್ನಂ ಆದರು?? ಅನ್ನೋದು ಮಾತ್ರ ಬಹಳ ಸ್ವಾರಸ್ಯಮಯವಾದದ್ದು. ನೀವು ಅದನ್ನ ಓದಿಯೇ ಅನುಭವಿಸಬೇಕು :) ಅವರ ಹೆಸರನ್ನ ಅವರೇ ಇಟ್ಟುಕೊಳ್ಳುವ ಛಾನ್ಸು ಅದೆಷ್ಟು ಜನಕ್ಕೆ ದೊರೆತೀತು....!!! :)

---------
ಮೊನ್ನೆ "ಕಂದನ ಕಾವ್ಯ ಮಾಲೆ" ಪುಸ್ತಕದ ಪದ್ಯಗಳನ್ನ ಓದುವಾಗ....ಚಿಕ್ಕಂದಿನಲ್ಲಿ ಕಲಿತ ಪದ್ಯ...ಮತ್ತದರ ರಾಗ ಇನ್ನೂ ಮರೆತು ಹೋಗಿಲ್ಲದ್ದು ಕಂಡು ನನ್ನ ಹುಮ್ಮಸ್ಸು ಹಿಮ್ಮಡಿಯಾಗಿ....ಇನ್ನೂ ಜೋರಾಗಿ ಹಾಡಿಕೊಂಡದ್ದು ಬಹಳ ಖುಷಿ ಆಯ್ತು...!! :)
ನಾನು ಪದ್ಯದ ಒಂದೆರಡು ಸಾಲುಗಳನ್ನ ಬರೀತೇನೆ...ನೀವು ನಿಮ್ಮ ನೆನಪಿನಂಗಳದಿಂದ ನೆನಪಿಸಿಕೊಂಡು ಪದ್ಯಗಳನ್ನ ಪೂರ್ತಿಮಾಡಿ :) ನೋಡೋಣ ಯಾರಿಗೆ ಎಷ್ಟು ಪದ್ಯಗಳು ನೆನಪಿವೆ ಅಂತ..ಶುರು ಮಾಡೋಣಾ..

1. ತುತ್ತೂರಿ
ಬಣ್ಣದ ತಗಡಿನ ತುತ್ತೂರಿ ಕಾಸಿಗೆ ಕೊಂಡನು ಕಸ್ತೂರಿ
ಸರಿಗಮ ಪದನಿಸ ಊದಿದನು ಸನಿಧಪ ಮಗರಿಸ ಊದಿದನು
2. ಊಟದ ಆಟ
ಒಂದು ಎರಡು ಬಾಳೆಲೆ ಹರಡು । ಮೂರು ನಾಕು ಅನ್ನ ಹಾಕು ।
ಐದು ಆರು ಬೇಳೆ ಸಾರು । ಏಳು ಎಂಟು ಪಲ್ಯಕೆ ದಂಟು ।
ಒಂಬತ್ತು ಹತ್ತು ಎಲೆ ಮುದುರೆತ್ತು । ಒಂದರಿಂದ ಹತ್ತು ಹೀಗಿತ್ತು ಊಟದ ಆಟವು ಮುಗಿದಿತ್ತು ।।
3. ಹತ್ತು ಹತ್ತು ಇಪ್ಪತ್ತು
ಹತ್ತು ಹತ್ತು ಇಪ್ಪತ್ತು, ತೋಟಕೆ ಹೋದನು ಸಂಪತ್ತು
ಇಪ್ಪತ್ತು ಹತ್ತು ಮೂವತ್ತು, ಕೈಯಲಿ ಒಂದು ಕಲ್ಲಿತ್ತು ।।
ಮೂವತ್ತು ಹತ್ತು ನಲವತ್ತು, ಎದುರಲಿ ಮಾವಿನ ಮರವಿತ್ತು
ನಲವತ್ತು ಹತ್ತು ಐವತ್ತು, ಮರದಲಿ ಕಾಯಿ ತುಂಬಿತ್ತು ।।
ಐವತ್ತು ಹತ್ತು ಅರವತ್ತು, ಕಲ್ಲನು ಬೀರಿದ ಸಂಪತ್ತು|
ಅರವತ್ತು ಹತ್ತು ಎಪ್ಪತ್ತು, ಕಾಯಿಗಳೆಲ್ಲ ಉದುರಿತ್ತು ।।
ಎಪ್ಪತ್ತು ಹತ್ತು ಎಂಬತ್ತು, ಮಾಲಿಯ ಕಂಡನು ಸಂಪತ್ತು|
ಎಂಬತ್ತು ಹತ್ತು ತೊಂಬತ್ತು, ಕಾಲುಗಳೆರಡು ಓಡಿತ್ತು ।।
ತೊಂಬತ್ತು ಹತ್ತು ನೂರಾಯ್ತು, ತಲುಪಿದ ಮನೆಗೆ ಸಂಪತ್ತು ।।
4. ಗಡಿಯಾರದ ಸಡಗರ
ಕೋಳಿ ಕೂಗಿತೇಳು ಕಂದ....ಸೂರ್ಯ ಪೂರ್ವದಲ್ಲಿ ಬಂದ
ಹೆಚ್ಚು ಮಲಗಲೇನು ಚೆಂದ....ಬಾ ಕಂದ ಬಾ....
ಟಿಕ್ ಟಾಕ್ ಟಿಕ್ ಟಾಕ್...ಟಿಕ್ ಟಿಕ್ ಟಿಕ್
5. ವರ್ಷಕೆ ಆರೇ ಆರು ಋತು
ಚೈತ್ರ ವೈಶಾಖ ವಸಂತ ಋತು
6. ಕಡಲೆ ಪುರಿ
ಪುರಿ ಪುರಿ ಕಡಲೆ ಪುರಿ ಗರಂ ಗರಂ ಕಡಲೆ ಪುರಿ
ಎಲ್ಲ ಬನ್ನಿ ತೆಗೆದು ತಿನ್ನಿ ಗರಂ ಗರಂ ಕಡಲೆ ಪುರಿ
ಕಾಸಿಗೊಂದು ಸೇರು ಪುರಿ...
7. ನಮ್ಮ ಮನೆಯ ಸಣ್ಣ ಪಾಪ
ನಮ್ಮ ಮನೆಯಲೊಂದು ಸಣ್ಣ ಪಾಪನಿರುವುದು
ಎತ್ತಿಕೊಳಲು ಹೋದರದಕೆ ಕೋಪ ಬರುವುದು....
8. ಚುಟುಕ
ಝಣ ಝಣ ಝಣ ಜೇಬು ತುಂಬ ಹಣ
ಮೇಲಕೆತ್ತಿ ಕೆಳಗೆ ಬಿಡಲು ಸದ್ದು....ಠಣ್ ಠಣ ಠಣ
9. ರೊಟ್ಟಿಯಂಗಡಿಯ ಕಿಟ್ಟಪ್ಪ
ರೊಟ್ಟಿಯಂಗಡಿಯ ಕಿಟ್ಟಪ್ಪ ನನಗೊಂದು ರೊಟ್ಟಿ ತಟ್ಟಪ್ಪ..
ಪುಟಾಣಿ ರೊಟ್ಟಿ ಕೆಂಪಗೆ ಸುಟ್ಟು ಒಂಬತ್ತು ಕಾಸಿಗೆ ಕಟ್ಟಪ್ಪ।।
10. ನಾಯಿಮರಿ ನಾಯಿಮರಿ
ನಾಯಿ ಮರಿ ನಾಯಿ ಮರಿ ತಿಂಡಿ ಬೇಕೆ?
ತಿಂಡಿ ಬೇಕು ತೀರ್ಥ ಬೇಕು ಎಲ್ಲ ಬೇಕು
ನಾಯಿ ಮರಿ ನಾಯಿ ಮರಿ ತಿಂಡಿ ತಿಂದು ಏನು ಮಾಡುವೆ?
ತಿಂಡಿ ತಿಂದು ಗಟ್ಟಿಯಾಗಿ ಮನೆಯ ಕಾಯುವೆ
ನಾಯಿ ಮರಿ ನಾಯಿ ಮರಿ ಕಳ್ಳಬಂದರೇನು ಮಾಡುವೆ?
ಲೋಳ್ ಲೋಳ್ ಬೌ ಎಂದು ಕೂಗಿಯಾಡುವೆ ।।
11. ಈ ಕತೆ
ಒಂದು ಕಾಡಿನ ಮಧ್ಯದೊಳಗೆ ಎರಡು ಮರಗಳ ನಡುವೆ ಮಲಗಿ
ಮೂರು ಕರಡಿಗಳಾಡುತಿದ್ದವು ನಾಲ್ಕು ಮರಿಗಳ ಸೇರಿಸಿ
12. ಒಂದು ಎರಡು
ಒಂದೆಂಬೋದು ಒಬ್ಬನೇ ಸೂರ್ಯ
ಎರಡೆಂಬೋದೇನೆ ಹೆಸರ್ ಹೇಳೇ
-----------

ನಾವು ಚಿಕ್ಕಂದಿನಲ್ಲಿ ಇನ್ನಷ್ಟು ಪದ್ಯಗಳನ್ನ ಹಾಡುತ್ತಿದ್ವಿ,ಯಾರು ಬರೆದದ್ದು ಅಂತ ಗೊತ್ತಿಲ್ಲ

ಬಸ್ ಬಂತು ಬಸ್ಸು ಗವರ್ಮೆಂಟ್ ಬಸ್ಸು
ಕೆಂಪು ಬಿಳಿಯ ಬಣ್ಣ ನೋಡು ಬಾರಣ್ಣ
ನಾನು ಡ್ರೈವರ್ ಆಗುವೆ
ನೀನು ಕಂಡಕ್ಟರ್ ಆಗುವೆ
ನೀನು ರೈಟ್ ಎಂದು ಹೇಳುವೆ
ನಾನು ಬಸ್ಸನ್ನು ಬಿಡುವೆ :)

ತೋಟಕೆ ಹೋಗೋ ತಿಮ್ಮ ತೋಳ ಬಂದೀತಮ್ಮ
ಹಸು ಮೇಯ್ಸೊ ತಿಮ್ಮ ಹಸು ಹಾದೀತಮ್ಮ
ಒಲೆ ಉರ್ಸೊ ತಿಮ್ಮ ಉರಿ ಸುಟ್ಟೀತಮ್ಮ
ಪಾಟ ಬರೆಯೊ ತಿಮ್ಮ ಬಳಪ ಇಲ್ಲವಮ್ಮ
ಹೂವು ಬಿಡ್ಸೊ ತಿಮ್ಮ ಹಾವು ಕಚ್ಚೀತಮ್ಮ
ಕಾವಲಿತಾರೊ ತಿಮ್ಮ ಕಾಲುನೋವುತ್ತಮ್ಮ
ನೀರು ಸೇದೊ ತಿಮ್ಮ ಕೈ ನೋವುತ್ತಮ್ಮ
ಊಟಕೆ ಬಾರೊ ತಿಮ್ಮ ಓಡಿಬರ್ತೀನಮ್ಮ :)

ಮಳೆ ಬಂತು ಮಳೆ
ಕೊಡೆ ಹಿಡಿದು ನಡೆ
ಜಾರಿ ಬಿದ್ದರಾಯ್ತು ನೋಡು
ಬಟ್ಟೆಯೆಲ್ಲ ಕೊಳೆ
ಸೋಪು ಹಾಕಿ ಒಗೆ
ನೊರೆ ಬಂತು ನೊರೆ
....ಮುಂದಿನ ಸಾಲುಗಳು ಮರೆತು ಹೋಗಿವೆ ನಿಮ್ಮಲ್ಲಿ ಯಾರಿಗಾದರೂ ನೆನಪಿದ್ರೆ ಬರೀರಿ... :)
----------
ಜಿ.ಪಿ.ರಾಜರತ್ನಂ ಬರೀ ಸಾಹಿತ್ಯಕ್ಕಷ್ಟೇ ಅಲ್ಲದೆ ಜೈನ ಮತ್ತು ಭೌದ್ಧ ಧರ್ಮದ ಅನೇಕ ಪುಸ್ತಕಗಳನ್ನ ಅನುವಾದ ಮಾಡಿದ್ದಾರೆ. ಪಾಳಿ ಭಾಷೆ ಕಲಿತು ಬೌದ್ಧ ಧರ್ಮದ ಅನೇಕ ಸೂತ್ರಗಳನ್ನ ಕನ್ನಡಕ್ಕೆ ಅನುವಾದಿಸಿದ್ದು ಸಾಧನೆಯೇ ಸರಿ. ಹೆಚ್ಚಿನ ವಿಚಾರಗಳಿಗೆ ಅವರ ಪುಸ್ತಕಗಳನ್ನ ಓದಿ. ಜೊತೆಗೆ ವಿಕಿಪೀಡಿಯದಿಂದ...
ಹಾಗೇ 'ಯೆಂಡ ಕುಡುಕ ರತ್ನ ಓದಿದವರಿಗೆ ರಾಜರತ್ನಂ ಸಕತ್ ಲೆವೆಲ್ ಕುಡುಕರು ಅನ್ನಿಸೇ ಅನ್ನಿಸುತ್ತೆ ಆದ್ರೆ ಅವ್ರು ಮಾತ್ರ ಕುಡೀತಿರ್ಲಿಲ್ಲ! :)
ಧನ್ಯವಾದಗಳು
ಸವಿತ

ಯುವ ಕವಿಗೆ ಬರೆದ ಪತ್ರಗಳು....

2008-12-08T08:43:00.000-08:00

ಕಳೆದ ವಾರ ಡಿಸೆಂಬರ್ ೫ರಂದು ಸಂಜೆ ಮಲ್ಲೇಶ್ವರಂ ಗಾಂಧಿ ಸಾಹಿತ್ಯ ಭವನದಲ್ಲಿ "ಜಿ ಪಿ ರಾಜರತ್ನಂ ಜನ್ಮ ಶತಮಾನೋತ್ಸವ" ಸಮಾರಂಭವಿತ್ತು. ಕವಿ ಜಿ.ಎಸ್.ಶಿವರುದ್ರಪ್ಪನವರ ಅಧ್ಯಕ್ಷತೆಯಲ್ಲಿ, ಪ್ರೊ.ಅ.ರಾ.ಮಿತ್ರ ಅವರಿಂದ 'ರಾಜರತ್ನಂ-ಒಂದು ಮರು ನೆನಪು' ಉಪನ್ಯಾಸ, ಅತಿಥಿ - ಹೊ.ಶ್ರೀನಿವಾಸಯ್ಯನವರು.

ಪ್ರೊ.ಅ.ರಾ.ಮಿತ್ರ, ಜಿ.ಎಸ್.ಶಿವರುದ್ರಪ್ಪನವರು ರಾಜರತ್ನಂ ಅವರ ಸಾಧನೆಗಳನ್ನ ನೆನಪಿಸಿಕೊಟ್ಟು ಅವರ ಅನುಭವಗಳನ್ನ ಹಂಚಿಕೊಂಡರು. ಗಾಂಧಿ ಸಾಹಿತ್ಯ ಭವನದ ಪೂರ್ತಿ ಎಪ್ಪತ್ತು ಎಂಬತ್ತು ದಾಟಿದ ಹಿರಿಯರೇ ಇದ್ದರು. ಅಬ್ಬಾ....ಇಷ್ಟು ಇಳಿ ವಯಸ್ಸಿನಲ್ಲಿ ನಡೆದಾಡಲು,ಕುಳಿತುಕೊಳ್ಳಲು ಕಷ್ಟವಾದರೂ ಸಹ ಅವರವರ ಜೀವನ,ಅನುಭವಗಳ ಜೊತೆ ಬೆಸೆದುಕೊಂಡಿರುವ ರಾಜರತ್ನಂ ಅವರ ನೆನಪುಗಳನ್ನ ಇನ್ನಷ್ಟು ಹಸಿ ಮಾಡಿಕೊಳ್ಳಲು ಬಂದವರನ್ನೆಲ್ಲಾ ಕಂಡು ಬಹು ಅಚ್ಚರಿಯೆನಿಸಿತು...

ಉಪನ್ಯಾಸದ ಜೊತೆಗೆ ಪ್ರೊ.ಓ.ಎಲ್.ಎನ್.ಸ್ವಾಮಿಯವರು ಅನುವಾದಿಸಿರುವ ರೈನರ್ ಮಾರಿಯಾ ರಿಲ್ಕ್ - ಯುವ ಕವಿಗೆ ಬರೆದ ಪತ್ರಗಳು, ಸಂಧ್ಯಾ ದೇವಿಯವರ ಅಗ್ನಿ ದಿವ್ಯ, ಲಕ್ಕೂರು ಆನಂದರ ಬಟವಾಡೆಯಾಗದ ರಸೀತಿ ಪುಸ್ತಕಗಳ ಅನಾವರಣ ಕಾರ್ಯಕ್ರಮವೂ ಇತ್ತು.
ಸಂಪದದಲ್ಲಿ ‘ಇಂದು ಓದಿದ ವಚನ ಮಾಲಿಕೆ’ಯಲ್ಲಿ ಬರೆಯುವ ಪ್ರೊ.ಓ.ಎಲ್.ಎನ್.ಸ್ವಾಮಿಯವರ ಮತ್ತು ಕಾರ್ಯಕ್ರಮಕ್ಕೆ ಬಂದ ಕೆಲವಾರು ಸಂಪದಿಗರ ಪರಿಚಯವಾದದ್ದು ಸಂತಸವಾಯ್ತು :).

ರೈನರ್ ಮಾರಿಯಾ ರಿಲ್ಕ್ ಯುವ ಕವಿ ಕಾಪ್ಪಸ್ ಗೆ ಬರೆದ ಪತ್ರಗಳು ಪುಸ್ತಕ ಬಹು ಇಷ್ಟವಾಯ್ತು. ಓದುತ್ತಾ ಹೋದಂತೆ ಅರಿವಿಲ್ಲದೆಯೇ ಆ ಪತ್ರಗಳು ನಿಮಗಾಗಿಯೇ ಬರೆದವೇನೋ ಅನ್ನಿಸುವುದು ಖಂಡಿತ. ಏಕಾಂತ, ಮೌನಕ್ಕೆ ರಿಲ್ಕ್ ತನ್ನ ಜೀವನದಲ್ಲಿ ಕೊಟ್ಟ ಆಯಾಮವನ್ನ ಆತನ ಪತ್ರಗಳೇ ಸೊಗಸಾಗಿ ತಿಳಿಸುತ್ತವೆ.

ಕೆಲವು ಸಾಲುಗಳು....
ಒಂದಷ್ಟು ಕಾಲ ಈ ಪುಸ್ತಕಗಳಲ್ಲೇ ಬದುಕು. ಅವುಗಳಿಂದ ಏನು ಕಲಿಯಬಹುದೋ ಅದನ್ನು ಕಲಿತುಕೋ. ಅದಕ್ಕಿಂತ ಮಿಗಿಲಾಗಿ ಪುಸ್ತಕಗಳನ್ನು ಪ್ರೀತಿಸು. ಪುಸ್ತಕಗಳಿಗೆ ನೀನು ತೋರಿದ ಪ್ರೀತಿ ಸಾವಿರ ಪಟ್ಟು ಹೆಚ್ಚಾಗಿ ನಿನ್ನ ಬಳಿಗೆ ಮರಳುತ್ತದೆ. ಬದುಕಿನಲ್ಲಿ ನೀನು ಏನು ಬೇಕಾದರೂ ಆಗು, ನಿನ್ನ ಎಲ್ಲ ಅನುಭವ, ನಿರಾಶೆ,ಸಂತೋಷಗಳ ಎಳೆಗಳ ನಡುವೆ ಈ ಓದಿನ ಪ್ರೀತಿಯ ಎಳೆಗಳು ದೃಡವಾಗಿ ಬಲು ಮುಖ್ಯವಾಗಿ ಇರುತ್ತವೆ.

ನೀನು ಬರೆಯಲೇ ಬೇಕೆ,ಯಾಕೆ? ಎಂಬ ಕಾರಣವನ್ನು ಹುಡುಕಿಕೋ, ಬರೆಯಲೇಬೇಕೆಂಬ ಆಸೆ ಹೃದಯದ ಆಳದಲ್ಲಿ ಬೇರು ಬಿಟ್ಟಿದೆಯೋ, ಬರೆಯುವ ಅವಕಾಶ ನಿನಗೆ ದೊರೆಯದಿದ್ದರೆ ಸಾಯುತ್ತೀಯೋ-ನೋಡಿಕೋ. ಇದು ಮುಖ್ಯ. ಇರುಳಲ್ಲಿ, ನಿನ್ನ ಮನಸ್ಸು ಅತ್ಯಂತ ಶಾಂತವಾಗಿರುವಾಗ ಕೇಳಿಕೋ - ನಾನು ಬರೆಯಲೇ ಬೇಕೆ? ನಿನ್ನ ಅಂತರಂಗದ ಆಳಕ್ಕಿಳಿದು ಉತ್ತರ ಹುಡುಕು. ಸರಳವಾದ ದೃಡವಾದ 'ಹೌದು, ಬರೆಯಲೇಬೇಕು' ಎಂಬ ಉತ್ತರ ನಿನ್ನೊಳಗೆ ಮೊಳಗಿದರೆ ನಿನ್ನ ಇಡೀ ಬದುಕನ್ನು ಈ ಅಗತ್ಯಕ್ಕೆ ತಕ್ಕಂತೆ ಕಟ್ಟಿಕೋ. ಆಮೇಲೆ ಇದುವರೆಗೂ ಯಾರೂ ಹೇಳಿಯೇ ಇಲ್ಲವೇನೋ ಎಂಬಂತೆ ನೀನು ಕಂಡದ್ದು, ಅನುಭವಿಸಿದ್ದು, ಬಯಸಿದ್ದು,ಕಳೆದುಕೊಂಡದ್ದು ಎಲ್ಲವನ್ನೂ ಹೇಳಲು ಪ್ರಯತ್ನಿಸು.

ನಿನ್ನ ಕವಿತೆಗಳು ಚೆನ್ನಾಗಿವೆಯೇ ಎಂದು ಕೇಳಿದ್ದೀಯೆ, ನನ್ನನ್ನು. ಈ ಮೊದಲೇ ಬೇರೆಯವರನ್ನೂ ಕೇಳಿದ್ದೀಯೆ. ಪತ್ರಿಕೆಗಳಲ್ಲಿ ಪ್ರಕಟವಾಗಲೆಂದು ಕಳಿಸಿದ್ದೀಯೆ. ಬೇರೆಯವರ ಕವಿತೆಗಳೊಂದಿಗೆ ಹೋಲಿಸಿಕೊಂಡು ನೋಡಿದ್ದೀಯೆ. ಕೆಲವು ಸಂಪಾದಕರು ನಿನ್ನ ಕವಿತೆಗಳನ್ನು ನಿರಾಕರಿಸಿ ಹಿಂದಿರುಗಿಸಿದಾಗ ಹತಾಶನಾಗಿದ್ದೀಯೆ. ಇಂಥ ಕೆಲಸ ಮಾಡುವುದನ್ನು ದಯವಿಟ್ಟು ನಿಲ್ಲಿಸು ಎಂದು ಕೋರುತ್ತೇನೆ. ನೀನು ನನ್ನ ಸಲಹೆ ಸೂಚನೆಗಳು ಬೇಕು ಎಂದು ಕೇಳಿದ್ದರಿಂದ ಈ ಮಾತು. ಈಗ ನೀನು ದೃಷ್ಟಿಯನ್ನು ಹೊರಗೆ ಹಾಯಿಸಿದ್ದೀಯೆ. ತಕ್ಷಣದಲ್ಲಿ ಮಾಡಬೇಕಾದ ಕೆಲಸವೆಂದರೆ ಹೀಗೆ 'ಹೊರಗೆ ನೋಡುವುದು' ನಿಲ್ಲಬೇಕು. ಯಾರೂ. ಯಾರೆಂದರೆ ಯಾರೂ ಕೂಡ ನಿನಗೆ ಸಲಹೆ ಕೊಡುವುದಕ್ಕೆ, ಉಪದೇಶ ಮಾಡುವುದಕ್ಕೆ, ಸಹಾಯ ಮಾಡುವುದಕ್ಕೆ ಸಾಧ್ಯವಿಲ್ಲ, ನಿನ್ನ ಒಳಹೊಕ್ಕು ನೋಡಿಕೋ.

ಅಗಾಧವಾಗಿರಬೇಕು ಈ ಮೌನ.ಸದ್ದುಗಳಿಗೆ ಚಲನೆಗಳಿಗೆ ಅವಕಾಶವಿರುವ ಮೌನ; ದೂರದ ಸಮುದ್ರದ ಮೊರೆತವೂ ಕೇಳುವ ಮೌನ; ಇತಿಹಾಸ ಪೂರ್ವ ಕಾಲದ ಸಾಮರಸ್ಯದ ಸ್ವರಗಳು ಕೇಳಿಸುವ ಮೌನ. ಈ ಅದ್ಭುತವಾದ ಏಕಾಂತವು ನಿನ್ನ ಮೇಲೆ ವರ್ತಿಸುವುದಕ್ಕೆ ನೀನು ಸಮಾಧಾನದಿಂದ ಅವಕಾಶ ಮಾಡಿಕೊಟ್ಟಿರುವೆ ಎಂದು ಆಶಿಸುತ್ತೇನೆ.

ನಿನ್ನ ದಿನನಿತ್ಯದ ಬದುಕು ರಿಕ್ತವಾದದ್ದು ಎನಿಸಿದರೆ ಬದುಕನ್ನು ನಿಂದಿಸಬೇಡ, ನಿನ್ನನ್ನೇ ನಿಂದಿಸಿಕೋ.... ಬದುಕಿನ ಶ್ರೀಮಂತಿಕೆಯನ್ನು ಕಾಣಲಾರದ ನಿನ್ನ ರಿಕ್ತತೆಯನ್ನು ನಿಂದಿಸಿಕೋ.

ಇಷ್ಟು ಸೂಕ್ಷ್ಮವಾಗಿ ತಿಳಿ ಹೇಳುವ ಪತ್ರಗಳನ್ನ ಬರೆದ ಕವಿ ರಿಲ್ಕ್ ಗೆ,
ಅವು ನನಗಷ್ಟೇ ಅಲ್ಲ ಬೆಳೆಯುತ್ತಿರುವ ಪ್ರತಿ ಯುವ ಕವಿಗೆ ಅವಶ್ಯವಾದವೆಂದು ಪ್ರಕಟಿಸಿದ ಕವಿ ಕಾಪ್ಪಸ್ ಗೆ,
ಅವುಗಳನ್ನ ಕನ್ನಡಕ್ಕೆ ಅನುವಾದಿಸಿ ಹಳೆಯ ಮತ್ತು ಹೊಸ ಕವಿಗಳ ನಡುವೆ ಸಾತತ್ಯವನ್ನ ಬೆಸೆಯುವ ದಿಶೆಯಲ್ಲಿರುವ ನಮ್ಮ ಪ್ರೊ.ಓ.ಎಲ್.ಎನ್.ಸ್ವಾಮಿಯವರಿಗೆ ಧನ್ಯವಾದಗಳು.
-ಸವಿತ

ಹೆಚ್ಚಿನ ವಿಚಾರಗಳು:http://kn.wikipedia.org/wiki/ಓ.ಎಲ್.ಎನ್.ಸ್ವಾಮಿ

ಸಂಪದದಲ್ಲಿ ರಿಲ್ಕ್ ಕವಿತೆಗಳು:
ಚನ್ನಾಗಿಯೇ ಗೊತ್ತಿದೆ , ಆದರೂ...
ವಾಕಿಂಗ್

ಕೆ.ಎಸ್.ನರಸಿಂಹಸ್ವಾಮಿ - ನನ್ನ ನೆಚ್ಚಿನ ಕವಿಯ..ಮೆಚ್ಚಿನ ಕವನಗಳು

2008-09-16T09:00:00.000-07:00

ಕೆ.ಎಸ್.ನರಸಿಂಹಸ್ವಾಮಿ ನನ್ನ ಅಚ್ಚು ಮೆಚ್ಚಿನ ನೆಚ್ಚಿನ ಕಬ್ಬಿಗ...ಅವರ ಕವನಗಳನ್ನ ಅದೆಷ್ಟು ಬಾರಿ ಓದಿದರೂ ಭಾವ ಬರಿದಾಗದ ಚಿಲುಮೆಯೆನಿಸುತ್ತೆ...ಹಾಗೆ ಓದಿದ ಕವನಗಳಲ್ಲಿ ತೀರಾ ಇಷ್ಟವಾದ ಸಾಲುಗಳನ್ನ ಒಂದೆಡೆ ಬರೆದಿಡುತ್ತೇನೆ... ನೆನಪಾದಾಗ ಆ ಸಾಲುಗಳನ್ನ ಓದಿದಂತೆಲ್ಲಾ ಕವನದೊಳಗಿನ ಭಾವ ಮನಸ್ಸನ್ನಾವರಿಸಿಬಿಡುತ್ತದೆ....ಅದೇನೋ ಹುರುಪು..ಅದೇನೋ ಪುಳಕ!
ಅವರ ಮುಕ್ಕಾಲು ಪಾಲು ಕವನಗಳು...ಮಡದಿ,ದಾಂಪತ್ಯ,ಪ್ರೀತಿ,ವಿರಹ,ಕನಸು,ನಿರೀಕ್ಷೆ,ಅಳು ಮುನಿಸುಗಳ ಬಗ್ಗೆ.... ಒಟ್ಟಾರೆ ಕೌಟುಂಬಿಕ ಜೀವನದ ಬಗ್ಗೆ ಅದೆಷ್ಟೊಂದು ಒಲವು! ಅಚ್ಚರಿಯೆನಿಸುತ್ತೆ!! ತಮ್ಮ ಪ್ರತಿ ಕವನಗಳಲ್ಲಿ ತುಂಬಿ ಬರೆದಿರುವ ಆ ಕಡುಭಾವನೆಗಳೇ ಓದುಗರನ್ನು ಸೆಳೆಯೋದು....:)
ಮಂತ್ರಮುಗ್ಧಗೊಳಿಸುವ ಕವನಗಳ ಒಡೆಯ ಕೆ.ಎಸ್.ನರಸಿಂಹ ಸ್ವಾಮಿಯವರಿಗೊಂದು ನಮನ!
ನನಗಿಷ್ಟವಾದ ಕವನಗಳು.."ಎದೆ ತುಂಬ ನಕ್ಷತ್ರ" & "ಮೈಸೂರು ಮಲ್ಲಿಗೆ" ಸಂಕಲನದಿಂದ...ಕವನದ ಶೀರ್ಷಿಕೆ ( )ಯೊಳಗೆ.

ಹಕ್ಕಿಯ ಹಾಡಿಗೆ ತಲೆದೂಗುವ ಹೂ
ನಾನಾಗುವ ಆಸೆ ( ಆಸೆ )

ಸಿರಿಗೆರೆಯ ನೀರಲ್ಲಿ ಬಿರಿದ ತಾವರೆಯಲ್ಲಿ
ಕೆಂಪಾಗಿ ನಿನ್ನ ಹೆಸರೂ....
ನಿನ್ನ ಪ್ರೇಮದ ಪರಿಯ ನಾನರಿಯೆ....ಕನಕಾಂಗಿ
ನಿನ್ನೊಳಿದೆ...ನನ್ನ ಮನಸು ( -ಗೆ )

ನವಿಲೂರಿನೋಳಗೆಲ್ಲ ನೀನೆ ಬಲು ಚೆಲುವೆ
ಅದಕೆ ನಮ್ಮಿಬ್ಬರಿಗೆ ನಾಳೆಯೇ ಮದುವೆ ( ಹಳ್ಳಿಯ ಚೆಲುವೆಗೆ )

ಒಂದಿರುಳು ಕನಸಿನಲಿ ನನ್ನವಳ ಕೇಳಿದೆನು
ಚೆಂದ ನಿನಗಾವುದೆಂದು?
ನಮ್ಮೂರು ಹೊನ್ನೂರು, ನಿಮ್ಮೂರು ನವಿಲೂರು
ಚೆಂದ ನಿನಗಾವುದೆಂದು ( ಪ್ರಶ್ನೆಗೆ ಉತ್ತರ )

ಕೀತಕೆಯ ಬನಗಳಲಿ ಸಂಚರಿಸದಿರು ಚೆಲುವೆ...
ಸರ್ಪಮಂದಿರವಂತೆ ಕಂಪಿನೊಡಲು ( ಎಚ್ಚರಿಕೆ )

ಮದುವೆಯಾಗಿ ತಿಂಗಳಿಲ್ಲ ನೋಡಿರಣ್ಣ ಹೇಗಿದೆ!
ನಾನು ಕೂಗಿದಾಗಲೆಲ್ಲ ಬರುವಳೆನ್ನ ಶಾರದೆ!
ಹಿಂದೆ ಮುಂದೆ ನೋಡದೆ, ಎದುರು ಮಾತನಾಡದೆ! ( ಬಾರೆ ನನ್ನ ಶಾರದೆ! )

ರಾಯರು ಬಂದರು ಮಾವನ ಮನೆಗೆ ರಾತ್ರಿಯಾಗಿತ್ತು
ಹುಣ್ಣಿಮೆ ಹರಸಿದ ಬಾನಿನ ನಡುವೆ ಚಂದಿರ ಬಂದಿತ್ತು! ( ಮಾವನ ಮನೆಯಲ್ಲಿ )

ಒಬ್ಬಳೇ ಮಗಳೆಂದು ನೀವೇಕೆ ಕೊರಗುವಿರಿ?
ಒಬ್ಬಳೇ ಮಡದಿಯೆನಗೆ!
ಹಬ್ಬದೂಟದ ನಡುವೆ ಕಣ್ಣೀರ ಸುರಿಸದಿರಿ...
ಸುಮ್ಮನಿರಿ ಮಾವನವರೆ ( ಒಬ್ಬಳೇ ಮಗಳು )

ಹೋಗಿಬಾ ಬಂಗಾರ, ಸಾಕಿನಿತೆ ಶೃಂಗಾರ..
ಹೋಗಿ ಬಾ ಅವರ ಮನೆಗೆ
ಹೋಗಿ ಬಾ ಕರೆದಾಗ ; ಬೇಗ ಬಾ ನೆನೆದಾಗ..
ನಿಲ್ಲದೆಯೇ ನಿನ್ನ ಮನೆಗೆ! ( ಬಿಸಿಲ ಕೋಲು )

ಮೂರು ತಿಂಗಳು ಕಳೆದ ಮಾರನೆಯ ದಿವಸವೇ
ಬರುವೆನೆಂದಾಣೆಯಿಟ್ಟೊಲವ ಮಿಡಿದು,
ತೌರಿಗೊಡಿದ ಗೌರಿ ಮೂರು ತಿಂಗಳ ಮೇಲೆ
ವಾರವೊಂದಾದರೂ ಬಂದಿಲ್ಲವು..!
ಓಲೆ ತಲುಪಿರಬಹುದು; ನಿಲ್ಲಲಾರಳು ಇನ್ನು
ನಾಳೆ ಬರುವಳು ನನ್ನ ಪ್ರೇಮಲಹರಿ
ತೌರ ಬಳಗದ ಕೋಟೆ ಕೊತ್ತಲವ ದಾಟಿ ಬಹು
ದೇನು ಸುಲಭವೇ? ಇನ್ನು ಹುಡುಗಿ ಗೌರಿ ( ನಾಳೆ ಬರುವಳು ಗೌರಿ )

ತೌರಸುಖದೊಳಗೆನ್ನ ಮರೆತಿಹಳು ಎನ್ನದಿರಿ
ನಿಮ್ಮ ಪ್ರೇಮವ ನೀವೇ ಒರೆಯನಿಟ್ಟು
ನಿಮ್ಮ ನೆನಸೆ ನನ್ನ ಹಿಂಡುವುದು ಹಗಲಿನಲಿ
ಇರುಳಿನಲಿ ಕಾಣುವುದು ನಿಮ್ಮ ಕನಸು
....
ಚಿತ್ರದುರ್ಗದ ರೈಲು ನಿತ್ಯವೂ ಓಡೋಡಿ
ಮೈಸೂರ ಸೇರುವುದು ನಾನು ಬಲ್ಲೆ
ನಾಳೆ ಮಂಗಳವಾರ; ಮಾರನೆಯ ದಿನ ನವಮಿ
ಆಮೇಲೆ ನಿಲ್ಲುವೇನೆ ನಾನು ಇಲ್ಲೇ? ( ಹೆಂಡತಿಯ ಕಾಗದ )

ಕಣ್ಣ ಹನಿಯು ಮಣಿಯ ತೆರದಿ
ಕಣ್ಣಿನೊಡವೆಯಾಯಿತು
ತುಟಿಗೆ ಬಂದ ಮಾತು ತಿರುಗಿ
ಬಂದ ಕಡೆಗೆ ಹೋಯಿತು ( ಪಶ್ಚಾತ್ತಾಪ )

ನಗುವಿಗೂ ಅಳುವಿಗೂ ನಡುವೆ ನಿಂತಿಹೆ ನೀನು
ನಾನದನು ಒಲವೆಂದು ಕರೆಯಲಾರೆ
ಹಗಲಿಗೂ ಇರುಳಿಗೂ ನಡುವೆ ಬಂದಿದೆ ಸಂಜೆ
ನಾನದರ ಚೆಲುವನ್ನು ಮರೆಯಲಾರೆ ( ತನ್ನ ಪಾಡಿಗೆ ತಾನು ಲೋಕದುರುಳು )

ಮುಳಿಸು ಮಾವನ ಮೇಲೆ; ಮಗಳೇನ ಮಾಡಿಹಳು?
ನಿಮಗೆತಕೀ ಕಲ್ಲು ಮನಸ್ಸು?
ಹೋಗಿ ಬನ್ನಿರಿ, ಒಮ್ಮೆ ಕೈ ಮುಗಿದು ಬೇಡುವೆನು
ಅಮ್ಮನಿಗೆ ನಿಮ್ಮದೇ ಕನಸು
.... ಬಳೆಗಾರ ಚೆನ್ನಯ್ಯ ಬಾಗಿಲಿಗೆ ಬಂದಿಹೆನು
ಒಳಗೆ ಬರಳಪ್ಪನೆಯೇ ದೊರೆಯೇ? ( ಬಳೆಗಾರನ ಹಾಡು )

ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ ನನಗದೆ ಕೋಟಿ ರುಪಾಯಿ!
ಹೆಂಡತಿಯೊಬ್ಬಳು ಹತ್ತಿರವಿದ್ದರೆ...ನಾನೂ ಒಬ್ಬ ಸಿಪಾಯಿ! ( ಹೆಂಡತಿಯೊಬ್ಬಳು )

ಅಕ್ಕಿ ಆರಿಸುವಾಗ ಚಿಕ್ಕ ನುಚ್ಚಿನ ನಡುವೆ..ಬಂಗಾರವಿಲ್ಲದಾ ಬೆರಳು..
ತಗ್ಗಿರುವ ಕೊರಳಿನಾ ಸುತ್ತ ಕರಿಮಣಿ ಒಂದೆ, ಸಿಂಗಾರ ಕಾಣದಾ ಹೆರಳು.. ( ಅಕ್ಕಿ ಆರಿಸುವಾಗ )
ನನ್ನವಳು ನನ್ನೆದೆಯ ಹೊನ್ನಾಡನಾಳುವಳು
ಬೆಳಗುಗೆನ್ನೆಯ ಚೆನ್ನೆ ನನ್ನ ಮಡದಿ
.... ನಮಗಿಲ್ಲ ನೂರು ಚಿಂತೆ...ನಾವು ಗಂಧರ್ವರಂತೆ! (ಗೃಹಲಕ್ಷ್ಮಿ )

ಬೆಳಗಾಗ ಹೋದವರು ಸಂಜೆಗೂ ಬಾರದೆಯೆ
ತುಂಬಿಕೊಂಡಿತು ಇರುಳು ಬಾನತುಂಬ ( ಅವರ ಮಾತು )

ಹೆರಿಗೆಯ ನೋವನೆ ಹಾಡುವಿರೇತಕೆ
ಪಕ್ಕದಲೇನಿದೆ ನೋಡಿ
ಒಲವಿನ ಬಳ್ಳಿಯ ಚೆಲುವಿನ ಮೊಗ್ಗಿಗೆ
ಒಪ್ಪುವಂತದನೆ ಹಾಡಿ (ಹೆರಿಗೆಯಾಸ್ಪತ್ರೆಯಲ್ಲಿ )